@joq: Gjykata në Romë ka dënuar me burgim të përjetshëm Mark Antony Samson, autorin e vrasjes së 22-vjeçares shqiptare Ilaria Sula, në mars të vitit 2025. Pas krimit makabër, ai e futi trupin e studentes në një qese dhe e hodhi në një humnerë, në zonën e Capranica Prenestina, pranë Romës. Vendimi u shpall nga Gjykata e Tretë e Krimeve të Rënda në Romë, në sallën e gjyqit të burgut Rebibbia. Samson, i cili e kishte pranuar autorësinë e krimit, nuk ishte i pranishëm gjatë shpalljes së dënimit. Ai akuzohej për vrasje me rrethana rënduese, përfshirë paramendimin, si dhe për fshehjen e kufomës. Pas vendimit, babai i Ilaria-s, Flamur Sula, u shpreh se drejtësia kishte dhënë përgjigjen e saj, por asnjë dënim nuk mund ta shuajë dhimbjen e familjes për humbjen e vajzës. “Drejtësia u bë, por burgimin e përjetshëm të vërtetë e kemi ne, unë dhe bashkëshortja ime. Ai ende merr frymë, ndërsa vajza ime nuk merr më frymë. Ky është një moment i rëndësishëm për drejtësinë. Unë gjithmonë kam pasur besim te drejtësia dhe nuk jam braktisur”, deklaroi ai. Në mes të dhimbjes, babai i 22-vjeçares përcolli edhe një mesazh për të rinjtë, duke i nxitur të respektojnë njëri-tjetrin dhe të mos i mbajnë të fshehta problemet që mund të përjetojnë. “U them miqve të Ilaria-s dhe në përgjithësi të rinjve: respektoni njëri-tjetrin dhe flisni me prindërit tuaj. Mos heshtni”, u shpreh ai. Edhe nëna e studentes, Gëzime Sula, iu drejtua të rinjve me një apel të ndjerë: “Respektoni gratë, duajini ato”. Mes lotësh dhe e mbështetur te bashkëshorti, ajo shtoi: “Tani ajo është në paqe”. Ilaria Sula u vra më 25 mars 2025 nga ish-i dashuri i saj. Sipas hetimeve, Samson e goditi tri herë me thikë në fyt, më pas e futi trupin e saj në një qese dhe e hodhi në një humnerë në zonën e Capranica Prenestina. Trupi i pajetë i 22-vjeçares u gjet më 2 prill 2025.

JOQ Albania

Open In TikTok:

Region: AL

Tuesday 27 October 2026 17:48:52 GMT