@halyqmedia: ❗️ «Аялдамада түнеп жүрмін»: «Человек в маске» ДЦП диагнозы бар курьерге үй мен көлік сыйлады Әлеуметтік желіде «Человек в маске» атымен танылған қайырымдылық жобасының кезекті видеосы көпшіліктің көңілін босатты. Бұл жолы ол ДЦП диагнозы бар, есту қабілеті жоқ әрі сөйлей алмайтын 29 жастағы Давидке көмектесті. 🟨 Давид күнкөріс үшін курьер болып жұмыс істейді. Алайда аяғының ауыратынына байланысты ұзақ жүру оған қиын. Тұрақты баспанасы болмағандықтан, кейде аялдамада түнеуге мәжбүр. 💬 «Менің атым Давид. 29 жастамын. Менде ДЦП бар. Естімеймін және сөйлей алмаймын. Аяғым ауыратындықтан, кейде клиенттердің алдында ыңғайсыз жағдайға қаламын. Сондықтан аялдамада түнеуге мәжбүрмін. Мен жетіммін. Үйім де жоқ. Ата-анамды қатты сағынамын», – дейді Давид видеода. Давидтің көптен бергі бір арманы болған. Ол жүріп-тұруы мен жұмыс істеуі жеңіл болсын деп үш дөңгелекті көлік алуды қалаған. 💬 «Менің бір арманым бар. Үш дөңгелекті велосипед алғым келеді. Жүріп-тұруым және жұмыс істеуім жеңіл болар еді. Жақында ислам дінін қабылдадым. Алладан болашағымды жеңілдетуін сұрадым», – дейді ол. 🟥 Осы сәтте «Человек в маске» оның арманы орындалғанын айтып, арнайы үш дөңгелекті көліктің кілтін табыстады. Сондай-ақ Давидтің ем қабылдауына мүмкіндік жасалатынын жеткізді. Бірақ ең үлкен тосынсый мұнымен аяқталған жоқ. 🟨 «Человек в маске» Давидке енді өзінің жеке баспанасы бар екенін хабарлады. Мұны естіген жігіт қуаныштан көз жасына ерік берді. Кеше ғана аялдамада түнеп, күнкөріс үшін жаяу курьер болып жүрген Давид енді өз үйінде тұрып, жұмысын арнайы көлікпен жалғастыра алады.

ХАЛЫҚ MEDIA

Open In TikTok:

Region: KZ

Wednesday 28 October 2026 14:48:35 GMT