@qazaqstan.tv_: «Келер ұрпаққа қамқорлық бүгіннен басталады» «Ашық алаң» бағдарламасында саясаттанушы, ҚҚДИ Институционалды талдау және реформалар орталығының директоры Риззат Тасым Президент Жолдауында көтерілген инфрақұрылымды дамыту және келер ұрпақ алдындағы жауапкершілік мәселелеріне тоқталды. Оның айтуынша, халық санының өсуі мен экономикалық белсенділіктің артуы инфрақұрылымға түсетін жүктемені күшейтіп отыр. Экономикалық ынтымақтастық және даму ұйымының болжамына сүйенген сарапшы 2040 жылға дейін Қазақстанның инфрақұрылымына шамамен 292 млрд доллар қажет болуы мүмкін екенін айтты. Қазіргі қаржыландыру қарқыны сақталса, қаражат тапшылығы 84 млрд долларға жетуі ықтимал. «Келер ұрпаққа қамқорлық балалардың бүгін қандай жағдайда өсіп жатқанынан басталады. Мектептегі білім сапасы, медициналық көмектің қолжетімділігі және қауіпсіз орта олардың ертеңгі мүмкіндіктерін айқындайды. Сондықтан инфрақұрылымдық өзгерістерді кейінге қалдырмауымыз керек», – деді Риззат Тасым.
