टैरो कार्ड रिडर तथा प्रस्तोता दीपिका देवकोटाले नकारात्मक ऊर्जा र ‘नजर’ लाग्नबाट जोगिन आफू जहाँ जाँदा पनि सधैँ सर्स्युँ (तोरी) र सुकेको रातो खुर्सानी साथमै लिएर हिँड्ने गरेको रोचक खुलासा गरेकी छिन्। सूत्र टीभीमार्फत प्रसारित कार्यक्रम ‘टैरो विथ दीपिका’मा अभिनेत्री तथा उद्यमी श्वेता खड्का र सञ्चारकर्मी उत्सव रसाइलीसँगको कुराकानीका क्रममा उनले यस्तो बताएकी हुन्। कार्यक्रममा नकारात्मक ऊर्जा, नजर लाग्ने समस्या र त्यसबाट जोगिने उपायबारे चर्चा गर्दै देवकोटाले मानिसहरूलाई पत्यार नलागे पनि आफूले यसलाई नियमित पालना गर्ने गरेको बताइन्। उनले भनिन्, “नजरबाट बच्नका लागि यो एकदमै राम्रो उपाय हो। मान्छेले यो कुरा सुन्दाखेरि हाँस्लान्, कसैले विश्वास नगर्लान्। तर सधैँ आफूसँग हिँड्दा सर्स्युँ र तीनवटा सुकेको रातो खुर्सानी बोकेर हिँड्नुपर्छ। म जहाँ जाँदा पनि त्यति बोकेरै हिँड्छु।” यसरी सधैँ खुर्सानी बोकेर यात्रा गर्दा विमानस्थलमै सुरक्षा जाँचमा परेको रमाइलो तथा अनौठो अनुभव पनि उनले सुनाइन्। उनले थपिन्, “एकपटक त म एयरपोर्ट जाँदा सुकेको खुर्सानी बोकेका कारण सेक्युरिटी चेकिङमै मेरो ब्यागबाट सुकेको खुर्सानी निकालिदिएका थिए।” उनका अनुसार सर्स्युँ र रातो खुर्सानी साथमा राख्दा नकारात्मक शक्ति वा अरूको कुदृष्टि (नजर) आफूमा पर्न पाउँदैन। कुराकानीका क्रममा देवकोटाले भीडभाडमा जाँदा मानिसलाई नजर लागेको कसरी थाहा पाउने भन्ने लक्षणहरूबारे पनि प्रकाश पारिन्। जब मानिसलाई नजर लाग्छ, एक्कासि जीउ तात्ने, जोरो आउला जस्तो हुने, लगातार हाई-हाई आउने, आँखाको परेला बाङ्गो हुने र शरीर अत्यधिक भारी हुने जस्ता समस्या देखिने उनको दाबी छ। यसका अलावा घरमा एक्वेरियम राखेर माछा पाल्दा वा कुकुरलाई खाना खुवाउँदा पनि नकारात्मक ऊर्जा नष्ट हुने उनले बताइन्। नजर र नकारात्मक ऊर्जा पूर्ण रूपमा पन्छाउन उनले घरेलु विधि सुझाउँदै भनिन्, “राति ९ बजेपछि सर्स्युँ, पाँच वा सातवटा सुकेको खुर्सानी र कपुरलाई धुपौरोमा बालेर टाउकोदेखि खुट्टासम्म घडीको उल्टो दिशा (एन्टि-क्लवाइज) सात वा २१ पटक घुमाउनुपर्छ। त्यसपछि त्यसलाई घरबाहिर लगेर दोबाटोमा फाल्ने र पछाडि फर्केर नहेरी सिधै आउने गर्नुपर्छ। यस्तो प्रक्रिया लगातार २१ दिनसम्म गर्दा नकारात्मक ऊर्जा हट्छ।” - @nagariksewa