@moemoethwe777: ၁၀၀ ရာခိုင်နှုန်း ပြည့်စုံတဲ့ အိမ်ထောင်ဖက်ဆိုတာ ရှာတွေ့ဖို့ မလွယ်ပါဘူး။ တကယ်တော့ လူတိုင်းမှာ ကိုယ်စီအားသာချက် ရှိသလို အားနည်းချက်တွေလည်း ရှိတတ်ကြပါတယ်။ ဒါကြောင့် ကိုယ်ရွေးချယ်ထားတဲ့ အိမ်ထောင်ဖက်မှာ အားနည်းချက်တချို့ရှိတာနဲ့ “ငါတော့ လူရွေးမှားသွားပြီ” လို့ သတ်မှတ်လို့ မရသလို အားသာချက်တွေရှိတာနဲ့လည်း “လူရွေးမှန်သွားပြီ” လို့ ပြောလို့မရပါဘူး။ အရေးကြီးတာက သူ့မှာ အားနည်းချက်ရှိ၊ မရှိ မဟုတ်ပါဘူး။ အဲဒီအားနည်းချက်တွေက ဘယ်လိုအမျိုးအစားဖြစ်ပြီး ကိုယ့်ဘဝနဲ့ အိမ်ထောင်ရေးအပေါ် ဘယ်လောက်ထိ သက်ရောက်နိုင်သလဲဆိုတာပါ။ ဥပမာ— ဝင်ငွေကောင်းတာ၊ ပညာတတ်တာ၊ အလုပ်အကိုင်ကောင်းတာ၊ ရုပ်ရည်ကောင်းတာ၊ စကားပြောကောင်းတာနဲ့ လူမှုဆက်ဆံရေးပြေပြစ်တာတွေက လူတစ်ယောက်ရဲ့ အားသာချက်တွေ ဖြစ်နိုင်ပါတယ်။ ဒါပေမဲ့ အဲ့လိုလူမှာ အမြင်မတူတဲ့အခါ နားမထောင်ပေးတတ်ဘူး၊ စိတ်ဆိုးတဲ့အခါ အရှက်ခွဲတတ်တယ်၊ အမှားလုပ်မိရင် ဝန်မခံဘူး၊ ကိုယ့်အမှားကို သူတစ်ပါးအပေါ် အမြဲအပြစ် ပုံချတတ်တယ် ဆိုတဲ့ အချက်တွေရှိ‌နေရင်တော့ သူ့ရဲ့ အားသာချက်တွေက ကောင်းမွန်တဲ့ အိမ်ထောင်ရေးတစ်ခုကို တည်ဆောက်နိုင်ဖို့ မလုံလောက်ပါဘူး။ တစ်ဖက်မှာလည်း စကားပြောမတတ်တာ၊ စိတ်တိုလွယ်တာ၊ အရာရာမှာ ပြည့်စုံကျွမ်းကျင်မနေတာမျိုးတွေ က အားနည်းချက်တွေ ဖြစ်နိုင်ပါတယ်။ ဒါပေမဲ့ သူ့မှာ ကိုယ့်အမှားကို ကိုယ်သိတယ်၊ တောင်းပန်တတ်တယ်၊ ပြင်ဆင်ဖို့ ကြိုးစားတယ်၊ အိမ်ထောင်ဖက်ကို လေးစားတယ်၊ ကိုယ့်တာဝန်ကိုယ် ယူတတ်တယ်ဆိုတဲ့ အချက်တွေရှိနေရင် အဲဒီအားနည်းချက်တွေကြောင့်ပဲ လူရွေးမှားတယ်လို့ သတ်မှတ်လို့ မရပါဘူး။ ဒါကြောင့် အိမ်ထောင်ဖက်ရွေးချယ်တဲ့အခါ “သူက ဘာတွေကောင်းလဲ” ဆိုတာကိုပဲ မကြည့်ဘဲ တခြားအချက်တွေကိုပါ ထည့်စဉ်းစားဖို့ လိုပါတယ်။ အဓိကအားဖြင့် ▪️ အမြင်မတူတဲ့အခါ ဘယ်လိုဆက်ဆံတတ်သလဲ။ ▪️ အမှားလုပ်မိတဲ့အခါ ဝန်ခံပြီး ပြင်ဆင်တတ်သလား။ ▪️ ကိုယ့်ကို စိတ်ဆိုးနေတဲ့အချိန်မှာတောင် လေးစားမှုရှိရှိ ဆက်ဆံနိုင်သလား။ ▪️ မိမိရဲ့ တာဝန်တွေကို ရှောင်လွှဲမနေဘဲ ယူတတ်သလား။ ▪️ သစ္စာရှိမှု၊ ငွေကြေးနဲ့ မိသားစုအပေါ် ဘယ်လိုသဘောထားရှိသလဲ။ ဒီအချက်တွေက အိမ်ထောင်ရေးတစ်ခု ရေရှည်တည်တံ့ဖို့ အရေးကြီးတဲ့ အခြေခံတွေ ဖြစ်နိုင်ပါတယ်။ အထူးသဖြင့် လူတစ်ယောက်ရဲ့ စိတ်နေစိတ်ထားကို အရာရာအဆင်ပြေနေတဲ့အချိန်မှာပဲ ကြည့်ပြီး ဆုံးဖြတ်လို့မရပါဘူး။ စိတ် အဆင်မပြေတဲ့အချိန်၊ အခက်အခဲကြုံတဲ့အချိန်၊ ငွေကြေးအဆင်မပြေတဲ့အချိန်နဲ့ အမြင်မတူတဲ့အချိန်တွေမှာ သူဘယ်လို ပြုမူဆက်ဆံတတ်သလဲဆိုတာကိုပါ သတိထားကြည့်ဖို့ လိုပါတယ်။ ဘာကြောင့်လဲဆိုတော့ လူတစ်ယောက်ရဲ့ သဘောထားအမှန်ကို အရာရာအဆင်ပြေနေတဲ့အချိန်ထက် အဆင်မပြေတဲ့အချိန်တွေမှာ ပိုပြီး မြင်တွေ့ရတတ်လို့ပါ။ အိမ်ထောင်ရေးဆိုတာလည်း ကောင်းတဲ့နေ့တွေချည်းပဲ ဖြတ်သန်းရတာ မဟုတ်ပါဘူး။ ငွေကြေးအခက်အခဲတွေ၊ သားသမီးနဲ့ပတ်သက်တဲ့ စိတ်ပင်ပန်းမှုတွေ၊ မိသားစုနှစ်ဖက်ကြား အဆင်မပြေမှုတွေနဲ့ မမျှော်လင့်ထားတဲ့ ပြဿနာတွေကိုပါ အတူတူ ရင်ဆိုင်ဖြတ်သန်းရမှာပါ။ ဒါကြောင့် လက်တွဲဖော်ရွေးချယ်တဲ့အခါ ဘဝအဆင်ပြေနေချိန်မှာ ကိုယ့်အပေါ် ဘယ်လောက်ကောင်းသလဲဆိုတာအပြင် ဘဝအဆင်မပြေချိန်မှာ ကိုယ့်ကို ဘယ်လိုဆက်ဆံမလဲ၊ ပြဿနာတွေကို ဘယ်လို ရင်ဆိုင်မလဲ ဆိုတာကိုပါ စဉ်းစားသင့်ပါတယ်။ တကယ်တော့ လူရွေးမှားတယ်ဆိုတာ အားနည်းချက်ရှိတဲ့လူကို ရွေးမိတာတစ်ခုတည်း မဟုတ်ပါဘူး။ တစ်ခါတလေ ကိုယ့်ဘဝကို ရေရှည်ထိခိုက်စေနိုင်တဲ့ အပြုအမူတွေရှိမှန်း သိသိကြီးနဲ့ လျစ်လျူရှုမိတာ၊ အချစ်တစ်ခုတည်းကို အခြေခံပြီး အရေးကြီးတဲ့ ကွာခြားချက်တွေကို မမြင်ချင်ယောင်ဆောင်မိတာတွေကလည်း မှားယွင်းတဲ့ ရွေးချယ်မှုတွေကို ဖြစ်လာစေနိုင်ပါတယ်။ ဒါပေမဲ့ လူတစ်ယောက်ရဲ့ အားနည်းချက်တိုင်းက အိမ်ထောင်ရေးကို ပျက်စီးစေမှာ မဟုတ်သလို အားသာချက်တိုင်းကလည်း အိမ်ထောင်ရေးကို အဆင်ပြေစေမှာ မဟုတ်ပါဘူး။ အဓိကက အားနည်းချက်တွေကို အသိအမှတ်ပြုပြီး ပြင်ဆင်လိုစိတ်ရှိသလား၊ အခက်အခဲတွေကြားမှာတောင် တစ်ယောက်ကိုတစ်ယောက် လေးစားပြီး တာဝန်ယူနိုင်သလား ဆိုတာပါ။ ကိုယ်လည်း မပြည့်စုံသလို ကိုယ်ရွေးချယ်ထားတဲ့သူလည်း ပြည့်စုံနေမှာ မဟုတ်ပါဘူး။ ဒါပေမဲ့ နှစ်ယောက်စလုံးက တစ်ယောက်ကို တစ်ယောက် လေးစားတယ်၊ အမှားရှိရင် ပြင်ဆင်တယ်၊ တာဝန်ရှိရင် တာဝန်ယူတယ်၊ ပြဿနာဖြစ်လာရင် တစ်ယောက်ကိုတစ်ယောက် အပြစ်တင်ရုံနဲ့ မရပ်ဘဲ အတူတူဖြေရှင်းဖို့ ကြိုးစားတယ်ဆိုရင် မပြည့်စုံတဲ့လူနှစ်ယောက်ရဲ့ ဘဝကနေ တန်ဖိုးရှိတဲ့ အိမ်ထောင်ရေးတစ်ခုကို တည်ဆောက်နိုင်မယ်လို့ မြင်ပါတယ်။ တကယ်တော့ လူရွေးမှန်တယ်ဆိုတာ အပြစ်အနာအဆာမရှိတဲ့သူကို ရှာတွေ့တာ မဟုတ်ပါဘူး။ ကိုယ်နဲ့အတူ ဘဝကို တည်ဆောက်ဖို့ သင့်တော်တဲ့သူ၊ အခက်အခဲတွေကြားမှာ ကိုယ့်ကို လေးစားမှုမပျက် ဆက်ဆံနိုင်တဲ့သူ၊ ကိုယ့်အမှားကိုယ် မြင်ပြီး ပြင်ဆင်လိုစိတ်ရှိတဲ့သူကို ရွေးချယ်နိုင်တာပါ။ ဒါကြောင့် အိမ်ထောင်ဖက်ရွေးချယ်တဲ့အခါ လူတစ်ယောက်ရဲ့ အပေါ်ယံ အသွင်အပြင်၊ အရည်အချင်း၊ ပိုင်ဆိုင်မှုတွေ ထက် သူ့ရဲ့ အတွင်း စိတ်နေသဘောထား ၊ အမူအကျင့် ၊ ခံယူချက်တွေကို မြင်အောင်ကြည့်တတ်ဖို့အရေးကြီးပါတယ်။ April Ei

Moe Moe Thwe

Open In TikTok:

Region: MM

Thursday 29 October 2026 07:46:32 GMT