*ملاهي السندباد.. المكان اللي كل جيل الثمانينات والتسعينات اتربى فيه! 🎡* لو انت من جيل الثمانينات أو التسعينات.. فأكيد عندك صورة وانت صغير راكب الحصان اللي بيلف.. أو صورة وانت بتصرخ في بيت الرعب! *اتفتحت امتى وفين؟* سنة 1982 - وناس بتقول 1986 - على أرض كبيرة في *النزهة الجديدة.. قدام سور مطار القاهرة بالظبط وجنب الكلية الحربية*.. كانت أول مدينة ملاهي حقيقية في مصر.. قبل دريم بارك بسنين! *ليه كانت مقدسة؟* - *رخيصة:* كنتي بتدخلي بـ 10 جنيه تلعبي كل الألعاب! الدودة والسجادة وبيت الرعب وبيت جحا وزحليقة الشلالات والبساط السحري والعربيات المتصادمة والغربال! - *بتاعة الرحلات:* مفيش رحلة مدرسية من أسوان لاسكندرية إلا وكان لازم تعدي على السندباد! - *بتاعة النجوم:* في عز مجدها كان بيتعمل فيها حفلات عمرو دياب ومصطفى قمر وحميد الشاعري! الناس كانت بتحجز قبلها بشهر! - *بتاعة السينما:* اتصور فيها فيلم *اغتيال لنادية الجندي سنة 1996* وفيلم *أبو علي لكريم عبد العزيز وخالد الصاوي* وفيلم لياسمين عبد العزيز! *ألعابها كانت إيه؟* كلها ألعاب إيطالي مستوردة درجة أمان عالية.. المدير التسويقي بتاعها سنة 2014 قال إن قيمة الألعاب اللي جواها *20 مليون جنيه*! وكان فيه ألعاب مركونة في المخازن تكفي تبني مدينة ملاهي تانية كاملة! أشهر ألعابها: بيت الرعب اللي كنا بنطلع منه بنعيط.. والغربال اللي كان بيلف بينا لحد ما ندوخ.. والمرجيحة الطايرة.. والسيارات المتصادمة! *انتهت ازاي؟* الفيس بوك والبلاي ستيشن قتلوها! سنة 2016 قفلت أبوابها بعد أكتر من 30 سنة شغالة.. الناس بطلت تروح الملاهي وبقت تقعد في البيت تلعب على الموبايل. سنة 2017 الناس صحيت على خبر: البلدوزرات بتهد السندباد عشان يبنوا مكانها *مساكن ضباط*! مصراوي راح صور.. لقى الألعاب لسه مكانها.. بيت الرعب والغربال والسيارات مرميين.. والسور الخارجي بيتهد والكافيتريات بتتكسر! دلوقتي مكانها فاضي.. بس كل ما تعدي من قدام مطار القاهرة.. هتفتكري صوت ضحكك وانتي صغيرة!💔💔 #viral - @queen....nefertiti