@musabko4: أنا ما سميت غيابك غُربة.. الغُربة ياها البتخلّي الزول غريب وسط ناسه، لكن إنتي حتى لمن غبت، خليت فيني حتّة بتعرفك، وبتستناك، وبتشمّ ريحتك في الهوا لمن الليل يطوّل. سميتك سكون الغابة.. السكوت البكون مليان حفيف شجر، وونسة طيور بعيدة، وحاجات كتيرة بتحصل من غير ما العين تشوفها.. والمطرة البتنزل ضيفة، تتمطّق رحيق التُربة، وتِعَشْرِق للتراب في حلقو، وتخلّي الأرض اليابسة تتنفّس بعد طول عطش.. إنتي ما غيابك الوجعني، الوجع إنو الحاجات البسيطة البتجمعنا بيك لسه عايشة.. ريحة المطر، ضلّ المغرب، صوت الهوا في الشبابيك، والدرب البمشي وما بودّي ليك.. ياخ، في ناس لمن تغيب بتخلّي محلّها فاضي، وفي ناس لمن تغيب بتخلّي الدنيا كلّها موجودة، لكن ما فيها طعم.. وانتي من الناس البخلّوا الحنين عندو ريحة، والشوق عندو صوت، والغياب عندو ضلّ.. عشان كدا أنا ما بقول فقدتك.. بقول إنتَ بقيت فيني بطريقة ما بتعرفها المسافات، ولا بتمحيها السنين.. زي ريحة التراب بعد المطرة.. ما بتشوفها، لكن بتعرف إنّها مرّت من هنا. ♥️🌧️

Musabko

Open In TikTok:

Region: SD

Thursday 29 October 2026 19:07:59 GMT