من أميرة بنت ملك.. لعاملة نظافة في حي فقير.. إزاي وصلت حياة الأميرة فتحية للنهاية دي؟ الأميرة فتحية فؤاد كانت أصغر بنات الملك فؤاد الأول، وأخت الملك فاروق. اتولدت سنة 1930 في قصر القبة، وكبرت في حياة كلها ترف، لكن فيها كمان قواعد وحراسة، ودي كانت مشكلتها. اللحظة الفارقة في حياتها جت سنة 1946، لما سافرت فتحية مع أمها الملكة نازلي وأختها فايقة لفرنسا. ولأول مرة، خرجت من غير حرس وقيود القصر. ركبت تاكسي، ودخلت مطاعم ومحلات، وعاشت لأول مرة إحساس إنها بنت عادية تقدر تتحرك براحتها. والحياة دي عجبتها جدًا. وظهر رياض غالي في حياتها. كان شاب مصري بيشتغل في القنصلية المصرية في فرنسا، وأكبر منها بـ12 سنة، وكان معروف عنه إنه «حلنجي». وهي كان عمرها 16 سنة تقريبًا، وكل حاجة في حياتها في فرنسا كانت جديدة عليها، وأهمها طريقة تعامل رياض معاها، اللي من أول يوم استغل سنها الصغير وحاول يتقرب منها كصديق. ومع الوقت، الصداقة بينهم اتحولت لحب، وبعدها قرروا يتجوزوا، بمباركة من الملكة نازلي، اللي كانت بدأت تعادي ابنها فاروق وتتهمه بالعقوق. لكن أول ما الخبر وصل للملك فاروق، حصلت الأزمة. فاروق رفض الجواز بسبب اختلاف الدين والمستوى الاجتماعي، واعترض بشدة على رياض. وحاول يقنعه يبعد عن فتحية مقابل منصب دبلوماسي، لكن رياض رفض. وفي النهاية، بعد شد وجذب وصراعات مع الملك فاروق، الأميرة فتحية اتجوزت رياض سنة 1950، بعد ما أعلن إسلامه. بس ثمن التصرف ده كان تقيل جدًا. الملك فاروق جرّد أمه وأخته من ألقابهم الملكية، وسحب ممتلكاتهم وجنسيتهم المصرية، وسافرت فتحية مع أمها وجوزها لأمريكا، وهناك خلفت 3 أولاد. لكن بعد سنين، بدأت حياتهم تنهار. لأن نازلي كانت ائتمنت رياض على إدارة شؤونها المالية، وادته توكيل عام وشيكات موقعة. ورياض استخدم التوكيل في التصرف في أموال وممتلكات نازلي وفتحية، وخسرها في البورصة والقمار، لحد ما ضاعت ثروتهم واتحجز على القصر اللي اشتروه والمجوهرات. فتحية طلبت الطلاق ورفعت قضية على رياض، وانتقلت مع أمها وأولادها لمنطقة فقيرة في لوس أنجلوس. والأميرة اضطرت تشتغل عاملة نظافة عشان تعيش، وأولادها كمان اشتغلوا. وبعد سنين، بدأت تستعد للرجوع لمصر. لكن رياض عرف إنها راجعة، وطلب يقابلها للمرة الأخيرة عشان يودعها، وفعلاً راحت له فتحية، وهو استقبلها بمسدس! خمس رصاصات أنهت حياة الأميرة فتحية، والرصاصة السادسة حاول رياض ينهي بيها حياته. تفتكر مين كان السبب في اللي حصل لها؟ رياض غالي اللي استغل مراهقتها وسذاجتها؟ ولا أمها الملكة نازلي اللي عشان تعاند ابنها، خلت بنتها تخسر كل حاجة؟ - @4t.w5