🇦🇿Namiq Rəşid oğlu Abbasov 22 fevral 1940-cı ildə Naxçıvan MSSR-in Ordubad rayonunun Ordubad şəhərində anadan olmuşdur. 1962-ci ildə Azərbaycan Dövlət Universitetinin Jurnalistika fakültəsini bitirmişdir.[1] Əmək fəaliyyətinə 1956-cı ildə Ordubad Yerli Sənaye Kombinatında fəhlə kimi başlamışdır.[2] 1962–1970-ci illərdə "Abşeron" qəzetində şöbə müdiri, məsul katib və redaktor müavini vəzifələrində çalışmışdır. 1970–1974-cü illərdə Azərbaycan Kommunist Partiyasının Abşeron Rayon Komitəsində şöbə müdiri, 1974–1975-ci illərdə "Abşeron" qəzetinin redaktoru, 1975–1977-ci illərdə isə Azərbaycan KP Abşeron Rayon Komitəsinin ikinci katibi olmuşdur.[1] 1977-ci ildən dövlət təhlükəsizliyi orqanlarında xidmətə başlamışdır. 1977–1979-cu illərdə SSRİ Dövlət Təhlükəsizlik Komitəsinin Ali Məktəbində rəhbər kadrlar üçün ikiillik hazırlıq kurslarında təhsil almışdır.[1] 1979–1982-ci illərdə Azərbaycan SSR Dövlət Təhlükəsizlik Komitəsinin 2-ci şöbəsi (əks-kəşfiyyat) rəisinin müavini, 1982–1984-cü illərdə həmin şöbənin rəisi, 1984–1988-ci illərdə isə Azərbaycan SSR Dövlət Təhlükəsizlik Komitəsi sədrinin müavini (1984–1986-cı illərdə eyni zamanda kadrlar şöbəsinin rəisi) vəzifəsində çalışmışdır.[3] 1988–1992-ci illərdə SSRİ Dövlət Təhlükəsizlik Komitəsinin Murmansk vilayəti üzrə idarəsinin rəis müavini olmuşdur.[1] Namiq Abbasov 1992-ci ildən Azərbaycan Respublikası milli təhlükəsizlik nazirinin müavini vəzifəsində çalışmışdır.[1] 17 iyun – 3 iyul 1993-cü il tarixlərində nazir vəzifəsini müvəqqəti icra etmişdir.[4] 15 may 1994-cü ildə milli təhlükəsizlik nazirinin müavini vəzifəsindən azad edilərək[5] nazirin birinci müavini təyin olunmuşdur.[6] 22 sentyabr 1994-cü ildən yenidən milli təhlükəsizlik naziri vəzifəsini müvəqqəti icra etmişdir.[7] 22 mart 1995-ci ildə milli təhlükəsizlik naziri təyin olunmuş[8] və 23 iyul 2004-cü ilədək bu vəzifədə çalışmışdır.[9] 1993-cü ildən Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri olmuşdur.[1] Namiq Abbasova Azərbaycan Respublikası Prezidentinin müvafiq fərmanları ilə 15 may 1994-cü ildə general-mayor[10], 27 dekabr 1995-ci ildə general-leytenant[11], 15 yanvar 2002-ci ildə isə general-polkovnik ali hərbi rütbələri verilmişdir.[12] 16 dekabr 2004-cü ildə Namiq Abbasova fövqəladə və səlahiyyətli səfir diplomatik rütbəsi verilmiş[13] və Azərbaycanın Özbəkistandakı fövqəladə və səlahiyyətli səfiri təyin olunmuşdur.[14] 31 oktyabr 2012-ci ildə səfir vəzifəsindən geri çağırılmışdır.[15] Namiq Abbasov Abşeron rayonu ilə Bolqarıstanın Razqrad mahalı arasındakı dostluq əlaqələri və müxtəlif sahələrdə təcrübə mübadiləsinin nəticələrindən bəhs edən "Razqrad–Abşeron qardaşdırlar" (Bakı, 1973), həmçinin Azərbaycanın 1995–1999-cu illərdəki ictimai-siyasi vəziyyətinə və təhlükəsizlik məsələlərinə həsr olunmuş "Öncə, Vətəndir" (Bakı, 2000) kitablarının müəllifidir.[1] Namiq Abbasov 27 mart 2024-cü ildə 84 yaşında vəfat etmişdir.[16] Nardaran qəbiristanlığında dəfn olunmuşdur.🥀 - @naxcivanelitasi