«ទឹកអាសុច យាយនឿន» បានចាយលុយជិត ២ម៉ឺនដុល្លារ សម្រាប់បុគ្គលិកចំនួន ៨៨នាក់ ដែលជាការចូលរួមផ្តល់កម្លាំងពលកម្មមួយនៅក្នុងមូលដ្ឋានរបស់ខ្លួន។ ទីតាំងផលិតស្រាសត្រាំឬសឈើធម្មជាតិ ដែលជីកគាស់ពីក្នុង ព្រៃរបស់ យាយនឿន ស្ថិតនៅឃុំត្បែង២ ស្រុកគូលែន ខេត្តព្រះវិហារ។ នៅតាមបណ្តាញសង្គម, ស្រាសត្រាំឬសឈើ ដែលគេហៅជាប់មាត់ថា «ទឹកអាសុច យាយនឿន» បានលក់ដាច់យ៉ាងខ្លាំង ដែលមួយថ្ងៃៗត្រូវបានបងប្អូនយើងជាពិសេសបុរសៗ កម្មង់ទិញជាច្រើនដប រហូតផ្ញើតាមឡានវីរៈប៊ុនថាំ មិនចង់ទាន់ ព្រោះខ្លះទទួលស្គាល់ថា ពេលហូបទៅបានជួយសម្រួលសរសៃសសូង ចុករោងលើដងខ្លួន និងសម្រាប់ប្រុសៗជួយរុញកម្លាំងផ្លូវភេទ (Sic) ទៀតផង។ នៅព្រឹកថ្ងៃទី៣០ ខែតុលា ឆ្នាំ២០២៦ អាជ្ញាធរ និងសមត្ថកិច្ចមូលដ្ឋាន បានចុះទៅត្រួតពិនិត្យមើលជាក់ស្តែងពីដំណើការអាជីវកម្មរបស់ យាយនឿន លើការផលិត ការវេចខ្ចប់ និងការលក់ជាដើម។ ជារួម អាជ្ញាធរ បានណែនាំឲ្យមានការរៀបវេចខ្ចប់ដាក់ដបឲ្យបានល្អ និងមានអនាម័យសម្រាប់អ្នកហូប។ បើតាមការបញ្ជាក់របស់លោកមេឃុំ ការផលិតស្រាសនេះ យាយនឿន បានផលិតចេញជាលក្ខណៈធម្មជាតិ ដោយបិតចេញពីអង្ករ និងតាប៉ែ ដោយមិននាំចូលមេស្រាពីក្រៅស្រុកនោះទេ។ អ្វីដែលខ្ញុំចាប់អារម្មណ៍នោះគឺ អាជីវកម្មរបស់យាយនឿន បានហុចផលជាកម្លាំងពលកម្មដល់ពលរដ្ឋជាបងប្អូន និងអ្នករួមភូមិរហូតដល់ ៨៨នាក់ ដោយតម្លៃពលកម្មម្នាក់ៗទទួលបាន ៣ម៉ឺនរៀលក្នុងមួយថ្ងៃនេះ។ ជារួមមួយខែ យាយនឿន ត្រូវចំណាយថវិកាសម្រាប់បើកជូនបុគ្គលិកផលិត វេចខ្ចប់ និងលក់រហូតដល់ ១៩៨០០ដុល្លារ។ យ៉ាងណាក៏ដោយ សម្រាប់ផលិតផលដែលកំពុងពេញនិយមសម្រាប់បុរសៗនេះ សូមយាយនឿន បន្តរក្សាអនាម័យ នៃការផលិតឲ្យមានគុណភាពល្អ ចៀសវាងលក់កាន់តែដាច់ បែរជាទម្លាក់គុណភាព។ ប្រពន្ធខ្ញុំ ចង់ទិញសាកមួយដបទុកឲ្យខ្ញុំដែរ យាយនឿន អើយ! - @sopheakfn