@rakhat_akimdik: ЖАҢАӨЗЕН ҚАЛАСЫНДА АБАТТАНДЫРУ ЖӘНЕ ИНФРАҚҰРЫЛЫМ МӘСЕЛЕЛЕРІ БОЙЫНША ТАПСЫРМАЛАР БЕРІЛДІ 24 қазан күні Жаңаөзен қаласының әкімі Сымбат Төретаев қаланы аралау барысында абаттандыру және инфрақұрылым мәселелерін зерделеп, жауапты мекемелердің басшыларына бірқатар тапсырмалар берді. Атап айтқанда, Теңге ауылында орналасқан трансформаторлық қосалқы станцияның (КТП) істен шығуына байланысты мәселе назарға алынды. Қала әкімі жауапты мекемелерге ақауды жою және электрмен жабдықтауды қалпына келтіру бойынша шұғыл шаралар қабылдауды тапсырды. Сонымен қатар, 3А «Жалын» шағын ауданындағы ойын-сауық дүңгіршектері орналасқан аумақтың жай-күйі қаралды. Қала әкімі дүңгіршектердің, карусельдер мен ойын автоматтарының қазіргі сыртқы келбеті қаланың сәулеттік келбетіне сәйкес келмейтінін атап өтіп, кәсіп иелеріне түсіндіру жұмыстарын жүргізді. Осыған байланысты қала әкімі жауапты мекеме басшыларына аталған аумақта абаттандыру жұмыстары аяқталғаннан кейін ойын-сауық дүңгіршектерін қаланың сәулеттік келбетіне сәйкестендіретін жаңа эскиздік жоба әзірлеуді тапсырды. Жоба бекітілгеннен кейін ғана ойын-сауық нысандарын қайта орналастыру мүмкіндігі қарастырылатыны түсіндірілді. Қазіргі уақытта Жаңаөзен қаласының сәулет және қала құрылысы бөлімі тарапынан дүңгіршектердің сыртқы келбетін қала сәулетіне сәйкестендіру және қоғамдық кеңістіктің көріктілігін қамтамасыз ету мақсатында жаңа эскиздік жобаны әзірлеу мәселесі қарастырылуда. Ұсынылған жоба қолданыстағы заңнама талаптарына сәйкес келген жағдайда, дүңгіршектерді заңды негізде орналастыру мүмкіндігі қарастырылады. Қала аумағын абаттандыру, инфрақұрылымның қалыпты жұмысын қамтамасыз ету және қоғамдық кеңістіктердің сәулеттік келбетін жақсарту бағытындағы жұмыстар жалғасады.
