@kalyanamittaofficial: තෙරුවන්ගේ අසිරිමත් ගුණ මහිමය මේ ලෝකයේ සියලු දේ අතරින් දුර්ලභම වූත්, සිතක සැබෑ නිවීම උදෙසා මඟ පෙන්වන්නා වූත්, අසිරිමත් උරුමයක් වන සම්මා සම්බුද්ධ ශාසනයක් පවතින කාලයක ජීවත් වීමට අපට වාසනාව ලැබී තිබේ. අප සිතන්නටත් පෙර අප වෙනුවෙන් මඟක් විවර කළ ඒ අසිරිමත් බුද්ධ රත්නයේ ගුණ මහිමය කෙතරම් නම් අප්‍රමාණද? සියලු කෙලෙස් දුරුකොට, සියලු දුක් නිමාකොට, තමන් වහන්සේ විසින්ම අවබෝධ කරගත් උතුම් නිර්වාණ ධර්මය ලෝකයට දේශනා කළ භාග්‍යවතුන් වහන්සේගේ පහළවීම කෙතරම් නම් දුර්ලභ වාසනාවක්ද? ඒ උතුම් ධර්ම රත්නය දෙස බලන්න. එය කාලයෙන් කාලයට වෙනස් වන මතවාදයක් නොවේ. ලෝභ, ද්වේෂ, මෝහයන්ගෙන් පීඩිත වූ සිතකට නිදහස සොයා යා හැකි මඟ පෙන්වන, තම තමන් විසින්ම අවබෝධ කරගත යුතු, ඒහිපස්සික වූ උතුම් ධර්මයකි. ඒ ධර්මය අවබෝධ කරගනිමින්, ප්‍රතිපත්තියෙහි හැසිරෙමින්, ලෝකයට ඒ උතුම් මඟ ජීවමානව පෙන්වා දෙන ආර්ය මහා සංඝ රත්නය දෙස බලන්න. අල්පේච්ඡතාවයෙන්, සන්තුෂ්ටියෙන්, සංවරයෙන් හා ප්‍රඥාවෙන් යුතුව සසරින් එතෙර වීමේ අරමුණ පෙරදැරිව වැඩ සිටින ඒ උතුම් ශ්‍රාවක පිරිස බුදු සසුනේ ජීවමාන අසිරියයි. බුද්ධ රත්නයෙන් මඟ පහළ විය. ධර්ම රත්නයෙන් ඒ මඟ පැහැදිලි විය. සංඝ රත්නයෙන් ඒ මඟෙහි ගමන් කළ හැකි බව ලෝකයට ප්‍රත්‍යක්ෂ විය. මේ උතුම් තෙරුවන්ගේ සරණ හා ඇසුර ලැබීමටත්, උන්වහන්සේලාගේ ගුණ සිහි කිරීමටත්, සසුනේ අසිරිය සියැසින් දැක පැහැදීමටත් අපට ලැබී ඇත්තේ කෙතරම් නම් භාග්‍යයක්ද? මොහොතක් සිතන්න... අප ජීවත් වන මේ සමාජයේ, මේ ගම්මානවල, මේ නිහඬ විහාරස්ථානවල අදටත් සිවුරක් දරාගත් උතුම් පැවිදි රුවක් දැකගත හැකිය. පාත්‍රයක් දරා පිණ්ඩපාතයේ වැඩම කරන ස්වාමීන් වහන්සේ නමකගේ සන්සුන් ගමනක් දැකගත හැකිය. එය හුදෙක් අප ඉදිරියේ ගමන් කරන පුද්ගලයකුගේ දසුනක් පමණක් නොවේ. එය සසරින් එතෙර වීමේ අරමුණ උදෙසා ජීවිතය කැප කළ උතුම් ප්‍රතිපදාවක ජීවමාන සිහිවටනයකි. නිහඬ බවේ අසිරිය සහ පිණ්ඩපාතයේ ගැඹුරු අර්ථය ඒ නිහඬ ගමන තුළ අපට දැකිය හැක්කේ කුමක්ද? පාත්‍රය දෝතින් දරා, දෑස් පහතට යොමා, සන්සුන් පියවරින් වැඩම කරන ස්වාමීන් වහන්සේ තුළින් අපට සිහිපත් වන්නේ අල්පේච්ඡතාවයයි. ලද දෙයින් සෑහීමට පත්වීමයි. ඉන්ද්‍රිය සංවරයයි. නිහඬ බව තුළින් ප්‍රකට වන සංවරවත් පැවිදි ජීවිතයේ අසිරියයි. ඒ නිහඬ බව තුළ හිස් බවක් නැත. එය සිත හික්මවීමේ ප්‍රතිපදාවක සුන්දරත්වයයි. ඒ වැඩම කිරීම තුළ ලෝකයට පෙන්වන්නේ තමන් වෙනුවෙන් රැස්කරගැනීමේ ජීවිතයක් නොව, අත්හැරීම තුළින් නිදහස සොයන ජීවිතයක අසිරියයි. පිණ්ඩපාතය පූජා කරන දායකයාගේ තුළද ඇත්තේ එවැනිම උතුම් අවස්ථාවකි. තමන් සතු ආහාරයෙන් කොටසක් ශ්‍රද්ධාවෙන් පූජා කිරීම තුළින් දායකයා දානය නම් වූ පුණ්‍ය ක්‍රියාවෙහි යෙදෙයි. එය හුදෙක් ආහාරයක් ලබාදීමක් නොව, ලෝභය දුරුකරන සිතක් පුහුණු කරගැනීමේ අවස්ථාවකි. භික්ෂූන් වහන්සේලාගේ පැවිදි ජීවිතයට අවශ්‍ය සිව්පසය සපයමින්, උතුම් ශාසනික ප්‍රතිපදාව අඛණ්ඩව පවත්වාගෙන යාමට ගිහි පිරිසටද දායක විය හැකි අවස්ථාවකි. එහිදී පූජා කරන්නේ බත් පිඬක් පමණක් නොවේ. ශ්‍රද්ධාවයි. ගෞරවයයි. කරුණාවයි. සසුන කෙරෙහි ඇති නොසැලෙන පැහැදීමයි. පාත්‍රයට ආහාර එක්වන මොහොතේ දායක සිතට පින් රැස්වීමට අවස්ථාව උදාවේ. නිහඬව වැඩම කරන ඒ පැවිදි රුව දකින මොහොතේ අපේ සිතටද අත්හැරීමේ අගය සිහිපත් වේ. අවසානයේ මේ සියල්ල අපට සිහිපත් කරන්නේ එකම උතුම් අරමුණකි. සසර ගමන දිගු කරවන තණ්හාවෙන් මිදී, ප්‍රඥාවෙන් යුතුව මේ දුක්ඛිත සංසාරයෙන් එතෙර වීමයි. නිහඬ බවේ අසිරිය දකිමු. කරුණාවේ ගුණය වඩමු. දානයෙන් සිත පිරිසිදු කරගනිමු. තෙරුවන්ගේ ගුණ සිහි කරමින් උතුම් ධර්ම මාර්ගයේ ගමන් කරමු. මේ සා අසිරිමත් සම්බුද්ධ ශාසනයක් පවතින කාලයක, එහි පහස ලැබීමටත්, එහි ගුණ දැක පැහැදීමටත් අපට ලැබුණු මේ දුර්ලභ භාග්‍යය අපතේ නොයවමු. #තෙරුවන්_සරණයි🙏🌹🌼🌺🙏🙏 #සාදු🌸🙏සාදු🌸🙏සාදු🌸🙏 #kalyanamittaofficial #බුදුසරණයි_හැමෝටම☸️♥️🙏 #නිවන්_මග_සොයා

Kalyanamitta

Open In TikTok:

Region: LK

Friday 30 October 2026 14:48:45 GMT