@nawhmue52: တရားကိုသာ အားကိုးပါ ရုပ်နဲ့နာမ်ပဲရှိတယ်။ ဒီရုပ်နှင့်နာမ်ကလည်း ဘယ်တန်ခိုးရှင်ကမှ လုပ်ပေးတာ မဟုတ်ဘူး။ ဘယ်အထက်ဆရာ၊ အောက်ဆရာကမှ လုပ်ပေးတာ မဟုတ်ဘူး။ အကြောင်းကြောင့် အကျိုးဖြစ်နေတာပဲ။ ကောင်းတဲ့အကြောင်းကြောင့် ကောင်းတဲ့အကျိုးဖြစ်နေတာပဲ။ ကောင်းရောင်းကောင်းဝယ် လုပ်နိုင်လို့ အကျိုးစီးပွား ဖြစ်ထွန်းလာတာပဲ။ မလုပ်ဘဲနဲ့တော့ အလိုအလျောက် ဖြစ်လာတာ မရှိဘူး။ ဘယ်တန်ခိုးရှင်၊ ဘယ်ကယ်တင်ရှင်ကမှ အကျိုးစီးပွား ဖြစ်အောင် လုပ်မပေးနိုင်ပါဘူး။ အဲဒီ အကြောင်းအကျိုး ပိုင်နိုင်တဲ့ ဉာဏ်ရသွားမှ။ မဟုတ်ရင် ဟိုဟာဟုတ်နိုးနိုး၊ ဒီဟာဟုတ်နိုးနိုး၊ ဟိုဟာ အားကိုးရကောင်းနိုးနိုး၊ ဒီဟာ အားကိုးရကောင်းနိုးနိုးနဲ့ အားကိုးတွေ လွဲပြီးတော့ ဖြစ်နေကြတယ်။ အဲဒီမှာ သမ္မာဒိဋ္ဌိကနေပြီး မိစ္ဆာဒိဋ္ဌိဖြစ်သွားရတာ သိပ်နာတာပဲ။ မိစ္ဆာဒိဋ္ဌိလမ်းကြောင်းက တဏှာရေကြော မျောဖို့ပဲ။ ဒုက္ခစက်က လွတ်ရက်မရှိတာ အဲဒီ ဒိဋ္ဌိဦးဆောင်တာပဲ။ အမှားသိမှု။ အမှန်မသိတော့ဘူး။ တကယ်တော့ ရုပ်နဲ့နာမ်ပဲရှိတယ်။ အကြောင်းနဲ့ အကျိုးပဲ ရှိတယ်။ ဘယ်သူ့ကို ဘယ်သူကမှ ကောင်းအောင်၊ ဆိုးအောင် ပြုလုပ်လို့မရဘူး။ ကိုယ့်မှာရှိတဲ့ စိတ် စေတသိက်တွေကို အကြောင်းခံပြီးတော့ အကြောင်းမှန်၊ အကျိုးမှန်တွေ ဖြစ်ပေါ် နေတယ်။ အကြောင်းဆိုးကြောင့် အကျိုးဆိုးတွေ ဖြစ်ပေါ်နေတယ်။ အချဉ်မျိုးစေ့စိုက်ရင် အချဉ်သီး သီးမယ်။ အခါးမျိုးစေ့ စိုက်ရင် အခါးသီးသီးလာမယ်။ အချိုမျိုးစေ့စိုက်ရင် အချိုသီး သီးလာမယ်။ ဒူးရင်းပင်စိုက်ရင် ဒူးရင်းသီး သီးလာမယ်။ တမာပင် စိုက်ရင် တမာသီး သီးလာမယ်။ သံပရာပင်စိုက်ပြီး ဒူးရင်းသီး သီးပါစေလို့ ဘယ်လိုမှ ယတြာချေလို့ မရဘူး။ တရားသဘောက အဲလို။ ဘယ်သူ့ကို ဘယ်သူကမှ အားကိုးလို့ မရဘူး။ သူတစ်ပါးကို အားကိုးစရာမဟုတ်။ ကိုယ့်အားကိုယ်ကိုးရ မယ်တဲ့။ ကိုယ်(မိမိ) ဆိုတာ အခြားမဟုတ်ဘူး။ ဓမ္မဒီပါ ဓမ္မ သရဏာ၊ အနညသရဏာ တရားသည်သာ မှီခိုရာ၊ ကိုးစားရာ အစစ်ပဲတဲ့။ တရားမှတစ်ပါး အခြား မှီခိုရာ၊ အားထားရာ မရှာပါနဲ့တဲ့။ ဒါ ဘုရားရှင် အဆုံးအမပဲ။ * သူတစ်ပါးအား မကိုးစား ကိုယ့်အားကိုယ်ကိုးပါ။ * အခြားသူအား မကိုးစား ကိုယ့်အားကိုယ်ကိုးပါ။ တရားအားကိုးရင် ဒိဋ္ဌိအနှောင်အဖွဲ့က လွတ်မြောက်သွားမယ်။ နိဗ္ဗာန်တည်းဟူသော သန္တိသုခ အေးငြိမ်းရာ ရောက်သွားမယ်။ ရောက်သွားဖို့အတွက် အမြဲတမ်း သတိသမ္ပဇဉ် မကင်းရဘူး။ သတိသမ္ပဇဉ်ရှိနေရင် အချိန်တိုင်း အချိန်တိုင်း အသိမှန်၊ အမြင်မှန်တွေရနေမယ်။ အဲလိုရနေရင် စင်ကြယ်နေမယ်၊ လွတ်မြောက်နေမယ်၊ အေးငြိမ်းချမ်းသာနေမယ်။ ရွှေဥမင်ဆရာတော်ဘုရားကြီး အဆုံးအမဩဝါဒတော်များ အမှတ်(၁) @NawHmue