Një fotografi ku shfaqet një kuti e kuqe e mbushur me kartëmonedha 50-euroshe është bërë pjesë e dosjes hetimore të SPAK për vilën në kompleksin turistik “White Rocks” në Dhërmi, e cila, sipas dyshimeve të Prokurorisë së Posaçme, përdorej nga ish-zëvendëskryeministrja Belinda Balluku, ndonëse në dokumente rezulton në emër të ish-futbollistit Igli Tare. Sipas dokumenteve të publikuara, fotografia është dërguar më 17 korrik 2021 nga Lavdrim Smone, bashkëshorti i sanitares që punonte në banesën e Ballukut në Tiranë. SPAK dyshon se fotografia është realizuar në ambientet e vilës F6, ndërsa komunikimet telefonike të shoferit të Ballukut, vartësve, punonjësve të pastrimit dhe administratorëve të kompleksit përmbajnë referenca për pronën si “vila e shefes”. Nga hetimet rezulton se familjarët Smone shkonin herë pas here në Dhërmi për pastrimin e vilës, ndërsa transporti i tyre organizohej shpesh nga shoferi personal i Ballukut. Prokurorët kanë analizuar qindra komunikime dhe të dhëna telefonike të periudhës 2018-2025 për të dokumentuar përdorimin e pronës. Vila dykatëshe, me sipërfaqe ndërtimi 103 metra katrorë dhe e vendosur në një parcelë prej të paktën 300 metrash katrorë, vlerësohet nga SPAK me rreth 720 mijë euro. Sipas Prokurorisë së Posaçme, pavarësisht regjistrimit në emër të Igli Tares, pronësia faktike i përket Belinda Ballukut, e cila dyshohet se e ka përdorur pronën nga viti 2019 deri në fillim të vitit 2026. Vila është sekuestruar me vendim gjykate, ndërsa fotografia dhe komunikimet e administruara janë pjesë e provave që SPAK paraqet në mbështetje të dyshimeve të tij. - @joq