Қаланың әдеттегі шуы,бүгін жүрегімізді бір мезет ауыр мұң мен шексіз сағыныш кернеп тұр.Бәріміз балалық пен жастық шағымыздың куәсі болған,талайдың арманын қанаттандырған, талай адамға алғашқы өмір жолын ашқан сол қасиетті қара шаңырақпен бүгін қимай қоштасып қайттық.Әкеміздің көрегендігімен қаладан алынған бұл үй жай ғана төрт қабырға емес. Бұл — бүкіл әулеттің үміті мен сенімі тоғысқан үлкен шаңырақ болатын. Ауылда тұрса да, әкем мен анам күн сайын бір екі рет соғып, қалада оқып жатқан бауырлардың балаларының алаңсыз оқуына жағдай жасайтын. Ауылдан қалаға келген қай туыс болсын, әуелі осы үйге соғып дәм татпай, қаланың басқа жағына аттамайтын еді-ау! Бұл үйдің табалдырығынан аттаған әрбір жан мейірім мен жылулыққа бөленетін. Әкем мен анамның бауырлары, сол үйде тұрып студент атанған балалардың талайы осы шаңырақтан түлеп ұшып, өмірден өз орындарын тапты. Бүгінде өз орындары бар, бала-шағалы, қызметте жүрген аға-апаларымыздың бәрінің де осы үйге қатысты жылы естеліктері жүректерінде сақтаулы. Әкеміз өмірден озса да,анамыз сол шаңырақтың түтінін бір сәт те сөндірмей, барша ағайынның басын қосатын киелі шаңырақ етті. Бұл үйде тек студенттер ғана тұрған жоқ. Студенттердің күлкісі мен емтихан алдындағы толқынысы, анамыздың ыстық шайы мен әкеміздің ақылға толы әңгімелері бұл үйдің қабырғасына сіңіп қалғандай. Әкеміздің көзін көргендер, сол шаңырақтан ұшқан жастар бүгінгі күнге дейін бұл үйді сағынышпен, алғыспен еске алады.Әр кезеңнің өз тәмамдалар сәті болады. Балалардың шешімімен, анамыздың келісімімен бүгін осы бір ыстық мекенді басқа иесіне тапсырып қайттық. Бүгін барлық бауырлар, балалар жиналып, сол үйді соңғы рет тазалап, Құран оқытып, қимастықпен қоштастық. Қабырғаларды аралап жүріп, әр бұрышынан балалық шақтың сыңғырлаған күлкісін, студенттік шақтың қызықты күндерін көргендей болдық. Жүректің бір түкпірі сыздап, көздің ұшына жас үйірілгенімен, бұл үйдің бізге сыйлаған шексіз бақыты мен жылуы үшін алғыстан басқа айтарымыз жоқ. Үй сатылғанымен, сол шаңырақтың рухы, әкеміздің ақ батасы, анамыздың алақанының жылуы біздің жүрегімізде мәңгі сақталады. Қош бол, біздің балалығымыздың бесігі, ағайынды қылған құтты қара шаңырақ! Жылуың мен берекең ешқашан ұмытылмайды.#бауыр#қарашаңырақ#төлеби103 - @psihologkzogulshara