1 Nov 2026 By Matichon ထိုင်းနိုင်ငံ ဘန်ကောက်မြို့ရှိ ကုလသမဂ္ဂရုံးရှေ့တွင် CI စင်တာများ ဖျက်သိမ်းပေးရန် ဆန္ဒပြခဲ့သည့် မြန်မာရွှေ့ပြောင်းအလုပ်သမားအဖွဲ့ခေါင်းဆောင် ကိုဆူရတ်ဂ်ျဂီရီ ကိုယ်ထိလက်ရောက် တိုက်ခိုက်ခံခဲ့ရပြီးနောက် ကျူးလွန်သူများကို ဥပဒေအရ အရေးယူပေးရန် ဘန်ကောက်လွှတ်တော်အမတ်တစ်ဦးက တောင်းဆိုလိုက်သည်။ နိုဝင်ဘာ ၁ ရက် နံနက်ပိုင်းတွင် Bright Future ရွှေ့ပြောင်းအလုပ်သမားအဖွဲ့ခေါင်းဆောင် ကိုဆူရတ်ဂ်ျဂီရီသည် ဘန်ကောက်မြို့ ရတ်ချာဒမ်နွန်းနော့လမ်းရှိ ကုလသမဂ္ဂရုံးရှေ့တွင် မြန်မာရွှေ့ပြောင်းအလုပ်သမားများအတွက် ဖွင့်လှစ်ထားသည့် နိုင်ငံသားစိစစ်ရေးစင်တာ (CI စင်တာ) များကို ဖျက်သိမ်းပေးရန် ဆန္ဒပြတောင်းဆိုခဲ့သည်။ CI စင်တာလုပ်ငန်းစဉ်သည် ရွှေ့ပြောင်းအလုပ်သမားများအပေါ် မမျှတသည့် ငွေကြေးပေးဆောင်ရမှုဝန်ထုပ်ဝန်ပိုး ဖြစ်စေသည့်အတွက် ပန်းရောင်ကတ်တစ်မျိုးတည်းကိုသာ ကိုယ်ရေးအထောက်အထားအဖြစ် အသုံးပြုခွင့်ပေးရန် ၎င်းက တောင်းဆိုခဲ့သည်။ ဆန္ဒပြနေစဉ် ဘုရင်စနစ်ကာကွယ်ရေးအဖွဲ့များဖြစ်သည့် အဖွဲ့အစည်းကာကွယ်ရေး ပြည်သူ့စုစည်းမှုအဖွဲ့နှင့် ပြည်သူ့သစ္စာစောင့်သိရေးနှင့် ဘုရင်စနစ်ကာကွယ်ရေးအဖွဲ့တို့ ရောက်ရှိလာပြီးနောက် ထိုင်းနိုင်ငံသားအချို့ပါဝင်သည့် အုပ်စုတစ်စုက ကိုဆူရတ်ဂ်ျဂီရီကို ဝိုင်းဝန်းတိုက်ခိုက်ခဲ့သည်။ တိုက်ခိုက်သူများသည် ၎င်းကို လက်သီးဖြင့်ထိုးခြင်း၊ ခေါင်းကို ပါးရိုက်ခြင်း၊ ဆိုင်ကယ်ဦးထုပ်ဖြင့် ရိုက်ခြင်းနှင့် ခြေထောက်ဖြင့် ကန်ခြင်းတို့ ပြုလုပ်ခဲ့ကြောင်း Prachatai သတင်းဌာနက ဖော်ပြသည်။ ထို့အပြင် ထိုင်းနိုင်ငံအတွင်း မငြိမ်မသက်ဖြစ်အောင် လုပ်ဆောင်သူဖြစ်ပြီး ကျေးဇူးမသိတတ်သူဖြစ်ကြောင်းလည်း အော်ဟစ်ဆဲဆိုခဲ့ကြသည်။ ရဲတပ်ဖွဲ့က ဝင်ရောက်တားဆီးပြီး ကိုဆူရတ်ဂ်ျဂီရီကို ဖြစ်စဉ်ဖြစ်ပွားရာနေရာမှ ခေါ်ထုတ်သွားခဲ့သည်။ ယင်းဖြစ်ရပ်နှင့်ပတ်သက်၍ ပြည်သူ့ပါတီမှ ဘန်ကောက်လွှတ်တော်အမတ် နစ်ဆာနန်ထမ်းနိသိနန်က ဆန္ဒပြသူများ၏ တောင်းဆိုချက်ကို သဘောတူသည်ဖြစ်စေ၊ သဘောမတူသည်ဖြစ်စေ ကိုယ်ထိလက်ရောက် တိုက်ခိုက်ခြင်းသည် လက်ခံနိုင်စရာမရှိကြောင်း ပြောဆိုခဲ့သည်။ တိုက်ခိုက်ခံရသူသည် ထိုင်းနိုင်ငံသားဖြစ်စေ၊ ရွှေ့ပြောင်းအလုပ်သမားဖြစ်စေ လူတိုင်းတွင် အသက်နှင့် ကိုယ်ခန္ဓာလုံခြုံမှုဆိုင်ရာ အခွင့်အရေးရှိပြီး ဥပဒေအရ တန်းတူညီမျှ ကာကွယ်ပေးခံရမည်ဖြစ်ကြောင်း ၎င်းက ပြောသည်။ ရဲတပ်ဖွဲ့အနေဖြင့် ဖြစ်စဉ်ကို တားဆီးပြီး တိုက်ခိုက်ခံရသူကို နေရာမှ ခေါ်ထုတ်ပေးရုံသာမက သက်သေအထောက်အထားများ စုဆောင်းခြင်း၊ လုံခြုံရေးကင်မရာမှတ်တမ်းများနှင့် သတင်းမီဒီယာမှတ်တမ်းများကို စစ်ဆေးခြင်းတို့ ပြုလုပ်ကာ ကျူးလွန်သူများကို ဖော်ထုတ်အရေးယူရန်လည်း တောင်းဆိုခဲ့သည်။ ထို့အပြင် ကျူးလွန်သူများ၏ နိုင်ငံသားဖြစ်မှု၊ အဆင့်အတန်းနှင့် နိုင်ငံရေးခံယူချက်တို့အပေါ် မူတည်၍ ခွဲခြားဆက်ဆံခြင်းမပြုရန်နှင့် မည်သည့်နိုင်ငံရေးအယူဝါဒကမျှ အကြမ်းဖက်မှုကျူးလွန်ရန် အကြောင်းပြချက်မဖြစ်နိုင်ကြောင်း ၎င်းက ပြောဆိုခဲ့သည်။ တရားဥပဒေစိုးမိုးရေးဆိုတာ ကိုယ့်အတွေးအမြင်နဲ့ တူညီသူတွေကိုသာ ဥပဒေက ကာကွယ်ပေးပြီး ကိုယ့်အတွေးအမြင်နဲ့ မတူသူတွေကို မကာကွယ်ပေးဘူးဆိုရင် အဓိပ္ပာယ်မရှိတော့ပါဘူး။ ပဋိပက္ခတွေကို ဥပဒေနဲ့ ဆင်ခြင်တုံတရားအရ ဖြေရှင်းရမှာဖြစ်ပြီး အင်အားသုံးဖြေရှင်းတာမျိုး မဖြစ်သင့်ပါဘူး ဟု နစ်ဆာနန်က ပြောဆိုခဲ့သည်။ #ထိုင်းရောက်ရွှေမြန်မာ🇲🇲🇲🇲🇲🇲 #မြန်မာရွေ့ပြောင်းအလုပ်သမား #ထိုင်းသတင်း #ထိုင်းရောက်ရွှေမြန်မာ #ci - @ko.kyi.tar