အခုတလော အလုပ်မရှိတဲ့သားမောင်တစ်ယောက် တရားတွေနားထောင်ဖြစ်တယ်။ တရားတော်ရဲ့ အဆီအနှစ်တွေကို နာယူတာထက် လူ့လောကသဘာဝကို ဦးတည်တာတွေကို အဓိကထားတာဆိုတော့ နားထောင်တယ်လို့ သတ်မှတ်တာက ပိုသင့်လျော်မယ် ထင်လို့ပဲ။ တရားနာတဲ့အဆင့်မရောက်ဘူးလို့ ထင်မြင်မိတာမဟုတ်လား။ ဘယ်ဆရာတော်တွေရဲ့တရားကို နားထောင်ဖြစ်သလဲဆိုရင်တော့ အဓိကအားဖြင့် ဆရာတော် ဦးကောသလ္လ(ဓမ္မစေတီဆရာတော်)၊ ဦးသုမဂ်လ(ဒယ်အိုးဆရာတော်)၊ ဦးဇောတိသာရ တို့ရဲ့တရားတော်တွေဆိုပါတော့။ အကြောင်းအရာကိုစွဲပြီးနားထောင်တယ်လို့ သတ်မှတ်မယ်ဆိုရင်လည်း သတ်မှတ်နိုင်ပါပေရဲ့။ ထေရဝါဒဗုဒ္ဓဘာသာကို ပါးပါးခြင်းရော၊ ထူထူခြင်းရော တိုက်စားနေတဲ့ နာမ်လောကဆိုင်ရာကိုးကွယ်ယုံကြည်မှုတွေအကြောင်း၊ ဝိဇ္ဇာတွေ၊ဘိုးတော်၊ဘွားတော်တွေကို ကိုးစားပြီး သာသနာပြုခေါင်းစဥ်တပ်နေတဲ့ အကြောင်းတွေ၊ အနာဂတ်မျိုးဆက်သစ်တွေအတွက် အလေးဂရုပြူရမဲ့အကြောင်းတွေ စတာတွေကို အဓိကထားဟောပြောကြတာမဟုတ်လား။ ကိုယ်တွေအမြင်နဲ့လည်း တူညီတာတွေ၊ နီးစပ်တာတွေများလေတော့ ပိုနားထောင်ဖြစ်တာပေါ့။ ကိုယ်က သိပ်မဝေးသေးတဲ့ကာလကနေ လက်ရှိကာလအထိ အပူတချို့ကို ခံစားနေရသူ ဆိုတော့ ဆက်စပ်တာတွေ ရှိနေလေတော့ ပိုပြီးနားထောင်ဖြစ်တာ။ ကိုယ်နဲ့ကိုယ့်ဇနီးတို့ဟာ သိပ်မဝေးသေးတဲ့ကာလမှာ ကောက်ရိုးမျှင်တွေ ရှာခဲ့ဖူးတယ်မဟုတ်လား။ ခင်မင်ရတဲ့မိတ်ဆွေတွေကလည်း ကောက်ရိုးမျှင် ဖြစ်တန်တယ်လို့ ယူဆပြီး ဖုန်းနဲ့တစ်မျိုး၊ စာနဲ့တစ်မျိုးကို နည်းပေါင်းစုံနဲ့ ပို့ကြတာပေါ့လေ။ ကျေးဇူးတင်တာကတော့ တကယ့်ကို အတိုင်းအဆမရှိဆိုသလိုပါပဲ။ ဒီနေရာကနေလည်း မှတ်တမ်းတင်လိုက်ပါပေရဲ့ဗျား။ သို့သော် အထက်မှာတင်ပြခဲ့တဲ့ ဆရာတော်တွေရဲ့ တရားတော်တွေကို နားထောင်ပြီးချိန်တွေမှာ ကိုယ့်အတွေးက တစ်ဘက်မှာရောက်နေပြီ။ ဤသို့ပြုခြင်းထက် ပိုသင့်လျော်သည့်အရာကား ပစ္စုပ္ပန်ကို တည့်တည့်ရှုခြင်းနဲ့ ရတနာသုံးပါး သာလျင် အဓိကကျတယ်လို့ မြင်လာတာ။ ဒီတော့လည်း ရတန်သရွေ့သော တရားစာလေးတွေရွတ်ဖတ်ပူဇော်၊ အနာဂတ်မှာဖြစ်လာနိုင်တာကို ကြိုတင်မျှော်တွေးပြီး ပြုသင့်တာပြု၊ ပြင်သင့်တာပြင်လုပ်ရတာပေါ့။ စိတ်တော့ တော်တော်ဆိုတာထက်ပိုအောင် ပေါ့ပါးလာတာအမှန်ပဲ။ အေးငြိမ်းတယ်လို့တောင် ပြောလို့ရတာပေါ့လေ။ ကြားကာလမှာ အချို့သူတွေရဲ့ ထင်မြင်ချက်တွေ၊ ယူဆချက်တွေကို ဖြစ်စဥ်ဖြစ်ရပ်မှန်သလိုလိုနဲ့ လှမ်းပြောသူတွေလည်း ရှိခဲ့သေးတာပါပဲ။။ ပုထုဇဥ်ပီပီသသဆိုသလို ဖြတ်ကနဲအပူတွေ ဝင်လာပေမဲ့ အချိန်တိုအတွင်း ငြှိမ်းသတ်လိုက်နိုင်ပါရဲ့။အေးဆေးပါလို့ သဘောထားနိုင်သွားတာပေါ့လေ။ ကံအားလျော်စွာ သီတင်းကျွတ်ကျောင်းပိတ်ရက်နဲ့လည်း ဆုံလေတော့ ဘေဘီကြယ်စင်လေးရော၊ ဘေဘီသားမောင်ရောအပါအဝင် မိသားစုတွေနဲ့ အေးအေးဆေးဆေးနေခွင့်ရတော့ ပိုကောင်းသွားသေးတာ။ မသေချာဘူးဆိုတဲ့ ကိုယ့်ရဲ့ အနာဂတ်အတွက်ကိုပါ ရင်ပူတာသက်သာသွားတယ် ဆိုပါတော့။ ဘာပဲဖြစ်ဖြစ် ဆရာတော်တွေရဲ့တရားတော်တွေက လတ်တလောကာလမှာ ပူလောင်နေတဲ့ ကိုယ့်ရဲ့အပူတွေကို အေးငြိမ်းစေခဲ့တာအမှန်ပဲ။ ဒီစာစုလေးကလည်း ဆရာတော်တွေရဲ့ တရားတော်တွေကို အသေးစိတ်ပူဇော်တာလို့ မဆိုနိုင်ပေမဲ့ ကျေးဇူးအရာကို မှတ်တမ်းပြုတဲ့ သဘောပါ။ နောက်ကြုံရင်တော့ ဆရာတော်တွေရဲ့ တရားတွေထဲက ကိုယ့်ရဲ့ မြင်ချက်ကို ရေးဖြစ်မယ်ထင်ပါရဲ့။ လောလောဆယ်တော့ ဘုရား၊တရား၊ သံဃာသည် ကိုယ့်ကို အပူငြှိမ်းပေးနိုင်တဲ့ ကျေးဇူးကြီးလှသူ၊ ကိုးကွယ်ထိုက်သူတွေလို့ သိမှတ်ပူဇော်လိုက်ပါတယ်။ ကိုယ်က ဗုဒ္ဓဘာသာဝင်ဖြစ်ရတာကို ကျေနပ်နေတဲ့သူမဟုတ်လား။ - @myo.myint.yan.nau56