भन्सार छली ल्याइएका २१ पोका सयपत्री माला सशस्त्र प्रहरीद्वारा नष्ट विराटनगर । भारतबाट अवैध रूपमा भन्सार छली नेपाल भित्र्याइएका २१ पोका सयपत्री फूलका तयारी माला सशस्त्र प्रहरीले नियन्त्रणमा लिई नष्ट गरेको छ। मिति २०८३ कात्तिक १६ गते दिउँसो १ः२० बजे मोरङको विराटनगर महानगरपालिका–४, गोग्राहा स्थित राधाकृष्ण कोल्ड स्टोर नजिकबाट सशस्त्र प्रहरी बल नेपाल सीमा सुरक्षा गुल्म हेडक्वार्टर रानी, मोरङको टोलीले करिब २ लाख १० हजार रुपैयाँ बराबरका सयपत्री फूलका माला नियन्त्रणमा लिएको हो। नियन्त्रणमा लिइएका मालाहरू प्लान्ट क्वारेन्टाइन कार्यालय, विराटनगर–रानीबाट खटिएका प्रतिनिधिको रोहबरमा सोही दिन सशस्त्र प्रहरी गुल्म परिसरभित्र खाडल खनी गाडेर सडाउने विधिबाट नष्ट गरिएको सशस्त्र प्रहरीले जनाएको छ। नेपाली किसानले आफ्नै खेतबारीमा मेहनत र लगानी गरेर उत्पादन गरेका सयपत्री फूलले बजार पाउनुपर्ने समयमा अवैध रूपमा भित्रिने तयारी मालाले स्थानीय उत्पादनको बजारमा असर पार्न सक्ने भएकाले यस्ता गतिविधि नियन्त्रण गर्नु आवश्यक देखिन्छ। चाडपर्वका बेला नेपाली उत्पादनलाई प्राथमिकता दिँदै स्वदेशी किसानको मेहनत, लगानी र उत्पादनको सम्मान गर्नुपर्ने आवश्यकता छ। सीमावर्ती क्षेत्रमा हुने अवैध आयात नियन्त्रण गर्दै नेपाली कृषि उत्पादनको संरक्षण र प्रवर्द्धनमा सम्बन्धित निकायको सक्रियता महत्वपूर्ण हुने देखिन्छ। - @ranbhumi.com