@thinn4625: ဖဝါးခြေတော် နာသတဲ့ မောင်မောင်ရယ် ••••••••••••••••••••••••••••••••••••••••••••••••• ယောက်ျားမင်းသမီး မယ်အောင်ဗလ -------------------------------------------------------- မြန်မာ့သဘင်လောကမှာ လူသေသော်လည်း ယနေ့တိုင် နာမည်မသေတဲ့ မင်းသား၊ မင်းသမီးတွေ ရှိကြပါတယ်။ အဲ့ဒီအထဲမှာ ယောက်ျားမင်းသမီး မယ်အောင်ဗလဟာလည်း ထိပ်ဆုံးက အပါအဝင်တလက် ဖြစ်ပါတယ်။ ရှေးက မြန်မာ့သဘင်မှာ အမြင့်သဘင်လို့ ခေါ်တဲ့ ရုပ်သေးသဘင်နဲ့ အနိမ့်သဘင်လို့ ခေါ်တဲ့ မြေဝိုင်းသဘင်တို့ပဲ ရှိခဲ့ပါတယ်။ မယ်အောင်ဗလဟာ မြေဝိုင်းခေတ်ကို မီခဲ့သူဖြစ်ပြီး မြေဝိုင်းအနိမ့်သဘင်ကို အမြင့်သဘင်ဖြစ်အောင် ကြိုးစားခဲ့ကြတဲ့သူတွေထဲက တယောက်အပါအဝင်လည်း ဖြစ်ပါတယ်။ မြေဝိုင်းသဘင်မှာ မင်းသားနဲ့ မင်းသမီးဟာ ပဝါတကမ်း ယပ်တလှမ်းအကွာကနေပဲ ဣန္ဒြေကြီးစွာ ကပြကြတာပါ။ လူပုံလယ်မှာ ယောက်ျားနဲ့ မိန်းမ လင်မယားသဖွယ် ချစ်ကျီစယ်တာကို ရှေးလူကြီးတို့က လက်မခံခဲ့ကြပါဘူး။ ဒါ့ကြောင့် မိန်းမအတုဖြစ်တဲ့ ယောက်ျားမင်းသမီးတို့ ပေါ်ပေါက်ခဲ့ကြပါတယ်။ သီပေါမင်းလက်ထက်မှာလည်း ကိုစိန်ဒိုင်ဆိုတဲ့ ယောက်ျားမင်းသမီး ရှိခဲ့ဖူးပါတယ်။ ကိုလိုနီခေတ် မြေဝိုင်းသဘင်မှာ ‌မယ်အောင်ဗလ ပေါ်ပေါက်လာချိန်ကစပြီး တမျိုးတဖုံ ဆန်းသစ်လာပါတယ်။ မင်းသားနဲ့ မင်းသမီး အတို့အဆိတ်နဲ့ ကပြရာမှာ ယောက်ျားမင်းသမီးဖြစ်တဲ့ မယ်အောင်ဗလကိုတော့ ပရိသတ်ပြည်သူတို့က လက်ခံလာကြပါတယ်။ အသားညိုစိမ့်စိမ့်နဲ့ ကိုယ်လုံးကိုယ်ပေါက် မျက်ခုံးမျက်လုံး လှတဲ့ အောင်ဗလဟာ မင်းသမီးအသွင် ဝတ်လိုက်ရင် လည်ပင်းက လည်စလုတ်တောင်ပျောက်ပြီး တကယ့် မင်းသမီးလို့ပဲ အများအမြင်မှာ ဖြစ်ပါတော့တယ်။ ရင်ကိုမောက်အောင် လက်ကိုင်ပဝါတို့ကို အတွင်းကိုယ်ကြပ်အင်္ကျီမှာ အလိပ်လိပ်ထည့်ပြီး အောက်ခံ ဘောင်းဘီမှာ ယောပုဆိုး‌ကို အထပ်ထပ်ခေါက်လို့ တင်တု၊ ရင်တုတွေနဲ့ မိန်းမပုံဖြသ်အောင် ဝတ်ဆင်ခဲ့တယ်လို့ ဆိုပါတယ်။ ဒါ့အပြင် မယ်အောင်ဗလရဲ့ နောက်တမူထူးခြားတာကလည်း ဆန်းသစ်တဲ့ကကြိုးကကွက်တွေနဲ့ နွဲ့တွဲ့တွဲ့ နှာသံပဲ ဖြစ်ပါတယ်။ မယ်အောင်ဗလရဲ့ နှာသံအညု အခရာကို မင်းသမီးများပင် တုပမမီအောင်ထိ ရှိခဲ့ပြီး အင်မတန်မှ ကျော်ကြားခဲ့ပါတယ်။ မယ်အောင်ဗလနဲ့ တွဲဖက်ပြီး ကျော်ကြားခဲ့ကြတဲ့ မင်းသားတွေကတော့ ဂရိတ်ဦးဖိုးစိန်နဲ့ စိန်ကတုံးတို့ပဲ ဖြစ်ပါတယ်။ မယ်အောင်ဗလဟာ ဘယ်လောက်ထိ စန်းကောင်းခဲ့သလဲဆို ယောက်ျားစင်စစ်မှန်း သိတာတောင် လိုက်လံပိုးပန်းခဲ့ကြတဲ့ ယောက်ျားသားတွေတောင် ရှိခဲ့ပါတယ်။ ဒါပေမဲ့ မယ်အောင်ဗလဟာ မိန်းမလျာမဟုတ်ပါဘူး။ သူကိုယ်တိုင် နှစ်သက်လို့ တောင်းရမ်းလက်ထက်ယူထားတဲ့ ဇနီးသည် မသဲညွန့်ရှိပါတယ်။ ဝမ်းနည်းဖွယ်ရာကတော့ ယောက်ျားမင်းသမီး မယ်အောင်ဗလဟာ အသက် ၃၀ အရွယ် ၁၉၁၃ မှာ ကွယ်လွန်ခဲ့ပါတယ်။ မယ်အောင်ဗလရဲ့ ဈာပနမှာ အမြှောက်ပစ်ဖောက် ဂုဏ်ပြုခဲ့ပြီး ယောက်ျားတလှည့် မိန်းမတလှည့် ဝတ်ဆင်ပေးခဲ့တယ်လို့လည်း ဆိုပါတယ်။ မယ်အောင်ဗလ မရှိတော့တဲ့နောက်မှာ ပရိတ်သတ်ရဲ့ အောင်ဗလအပေါ် အလွမ်းမပြေမှုတွေ ရှိခဲ့တဲ့ပါတယ်။ ပရိသတ်တောင်းဆိုမှုကြောင့် တောင်ရှည်ပုဆိုးကို ထဘီသဖွယ်ပတ် အောင်ဗလတုကခဲ့တဲ့ မင်းသားတွေလည်း ရှိခဲ့ပါတယ်။ အငြိမ့်မင်းသမီးကြီး ဩဘာသောင်းဟာလည်း အောင်ဗလရဲ့အသံကို တုကာ နှာသံချွဲချွဲကို အမြဲသီဆိုခဲ့ရတဲ့အတွက် အသံပျက်ခဲ့ရတယ်လို့ ဆိုပါတယ်။ ဒုတိယကမ္ဘာစစ်ဝန်းကျင်ကာလလောက်မှာလည်း မယ်အောင်ဗလဝင်စားတယ်ဆိုတဲ့ ဇာတ်မင်းသမီးကြီး ဗလပြန် လည်း ပေါ်ပေါက်ခဲ့ပါတယ်။ ဒေါ်ဗလပြန်ဟာလည်း အင်မတန် အသံကောင်း အကကောင်းပြီး မင်းသားကြီး ဝဏ္ဏကျော်ထင် စိန်အောင်မင်းနဲ့ တွဲဖက်လို့ ကျော်ကြားခဲ့ပါတယ်။ ယနေ့ခေတ်မှာလည်း မင်းသား စမ်းရေမိုးဟာ အောင်ဗလအသွင်နဲ့ ကပြခဲ့ရာ ပရိသတ်ရဲ့ ‌အားပေးမှုကို ရရှိခဲ့ပါတယ်။ ဒီနေရာမှာတော့ မင်းသားစိန်ကတုံးနဲ့ မယ်အောင်ဗလတို့ သီဆိုခဲ့တဲ့ ကရမက်တုံးမြိုင်ထကို စမ်းရေမိုးက စိန်ကတုံးနေရာ ဒေါ်မြင့်မြင့်ဇော်က အောင်ဗလနေရာကနေ သီဆိုပြီး ပလေးဘက်(playback)နဲ့ မြေဝိုင်းခေတ်ပုံစံ ဖြော်ဖြေတာမျိုးပါ။ ယနေ့ခေတ်မှာတော့ မိန်းမအသွင် ဝတ်စားဆင်ယင်ပြီး ကပြတဲ့ ယောကျ်ားမင်းသမီးအမည်ခံတွေ ရှိပေမဲ့လည်း မယ်အောင်ဗလလို ကိုယ်တိုင် ပင်ကိုယ်ဟန်၊ ပင်ကိုယ်သံနဲ့ ဆိုနိုင်၊ ငိုနိုင်၊ ပြောနိုင်၊ ကနိုင်ပြီး သဘင်ပညာရည်ပြည့်ဝတဲ့ ယောက်ျားမင်းသမီးတို့ ပေါ်ပေါက်လာဖို့တော့ မျှော်လင့်မိပါသေးတယ်။ သန့် (ပန်းဟေဝန်) စာကိုး - အောင်ဗလ ဖိုးစိန် စိန်ကတုံး (လူထုဒေါ်အမာ) #သန့် #ပန်းဟေဝန် #ယောက်ျားမင်းသမီး #မယ်အောင်ဗလ #ဖိုးစိန်

🅣🅗🅘🅝🅝

Open In TikTok:

Region: MM

Tuesday 03 November 2026 03:19:25 GMT