😨 «Терезеден дүкенге жұмсаған»: Ақтөбеде 16 жастағы студенттің өліміне қатысты іс сотта қаралып жатыр Ақтөбеде колледж жатақханасының төртінші қабатынан құлап, кейін ауруханада көз жұмған 16 жастағы студенттің өліміне қатысты іс сотта қаралып жатыр. «Время» газетінің Ақтөбе облысындағы меншікті тілшісі Ақмарал Майкөзованың жазуынша, айыптау тарапы жоғары курс студенті жасөспірімді терезе арқылы дүкенге жұмсаған деп есептейді, деп хабарлайды Qaz365.kz. Қайғылы оқиға 29 сәуірде Ақтөбе көлік, байланыс және жаңа технологиялар колледжінің жатақханасында болған. Бес жамылғыны бір-біріне байлаған Іс материалдарына сәйкес, сол түні жатақхана бөлмелерінің бірінде 16 жастағы үш студент телефоннан ойын ойнап отырған. Бір кезде олардың бөлмесіне төртінші курс студенті, 21 жастағы Мәди Сүгербай келген. Алдымен ол жасөспірімдердің бірін темекі іздеуге жұмсаған. Студент темекі таппай оралғаннан кейін Сүгербай тамақ алғысы келетінін айтқан. Алайда бұл уақытта жатақханада ұйқы уақыты басталып, кіреберіс пен қабаттардағы есіктер кілттелген. Айыптау материалдарында осыдан кейін жоғары курс студенті балалардың бірін төртінші қабаттағы терезе арқылы дүкенге жібермек болғаны айтылады. Ақырында 16 жастағы Нұрбақыт Бақытқа 2 мың теңге мен азық-түлік салатын қара сөмке берілген. Оны төмен түсіру үшін жасөспірімдер бес жамылғыны бір-біріне байлаған. Нұрбақыт алғашында қорқатынын айтып, бөлмеге қайта кірген. Алайда айыптау тарапының нұсқасы бойынша, Мәди Сүгербай келіп, оны асықтырғаннан кейін жасөспірім қайтадан терезеден шыққан. Үшінші және төртінші қабаттың арасында Нұрбақыт төменге құлап кеткен. Дәрігерлер оның өмірі үшін 42 күн күресті Оқиғадан кейін студенттер тәрбиешіні шақырған. Жедел жәрдем келгенше құрдастары Нұрбақытқа алғашқы медициналық көмек көрсетуге тырысқан. Ақмарал Майкөзованың сот материалдарына сүйеніп жазуынша, осы кезде Сүгербай зардап шеккен жасөспірімге қатысты «жата берсін, шіріп» деген сөз айтқан. Сондай-ақ айыптау тарапы оның басқа екі студенттен полицияға Нұрбақыт терезеден өз еркімен түсті деп айтуды талап еткенін мәлімдейді. Ауыр жарақат алған жасөспірім ауруханаға жеткізілген. Дәрігерлер оның өмірін сақтап қалуға тырысқанымен, Нұрбақыт жарақат алғаннан кейін 42-күні көз жұмған. Қазір Мәди Сүгербайға Қылмыстық кодекстің екі бабы бойынша айып тағылып отыр. Оған адамды қауіпті жағдайда қалдыру және абайсызда адам өліміне себеп болу айыптары тағылған. Сотталушы тағылған айыптарды мойындамайды. Сотта жатақханадағы әлімжеттік туралы да айтылды Сот барысында кәмелетке толмаған студенттер жоғары курс студенттері тарапынан қысым мен әлімжеттік болғанын айтқан. Олардың сөзінше, кейбір студенттерді металл құбырмен, жұдырықпен ұрып, шапалақпен жазалаған жағдайлар болған. Жасөспірімдер мұндай әрекеттер туралы ешкімге шағымданбағанын жеткізген. Себебі шағым айтқандарды қатарластары арасында кемсітетін атаулармен атаудан қорыққан. Сотта айтылған мәліметке сәйкес, Мәди Сүгербай бұған дейін басқа студенттерді ұрғаны үшін жатақханадан шығарылған. Алайда біраз уақыттан кейін қайта оралып, жатақханада тұра бастаған. Қайғылы оқиғадан кейін колледж жатақханасында бірінші курс пен жоғары курс студенттерін бөлек орналастырған. Жаңадан қабылданған студенттер екінші, жоғары курс студенттері үшінші қабатта тұрады. Олардың кіреберістері де бөлінген. «Мен оларға баламды сеніп тапсырдым» Марқұм Нұрбақыттың анасы Күлайым Колова колледж бен жатақхана басшылығының жауапкершілігі де қаралуы керек деп есептейді. – Жауапкершілік қайда? Мен оларға баламды сеніп тапсырдым ғой. Колледж директорын мүлде көрген жоқпын. Келмеді, кешірім де сұрамады, – дейді ол. Ананың айтуынша, Нұрбақыт ауруханада өмір үшін күресіп жатқан кезде отбасы тәрбиешілердің бірінен балалардың неге қараусыз қалғанын сұраған. Құлайым Колованың сөзінше, тәрбиеші: «Егер бізді соттаса, соттай берсін, біз ұйықтап жаттық», – деп жауап берген. Ал басқа педагогтер отбасыға көмектесіп, Нұрбақытты соңғы сапарға шығарып салуға қатысқан. - @qaz365kz