پھر میں نے اپنے بیٹے کو غسل کے لیے لے جاتے دیکھا۔۔۔۔ میرا بچہ، جس کے ننھے ہاتھ کبھی میرے چہرے پر بہتے آنسو پونچھا کرتے تھے، آج بالکل ساکت تھے۔ وہ ہاتھ جنہیں تھام کر میں نے نہ جانے کتنی بار اسے پیار کیا تھا، آج انہیں چھو کر بھی اس کا لمس محسوس نہیں ہو رہا تھا۔ اس کی پیشانی پر عجیب سا سکون تھا۔ میں اس کے قریب جھکی، اس کی پیشانی کو چوما اور روتے ہوئے کہا ”دیکھو، مما جانی رو رہی ہیں“ میں شاید اب بھی کسی معجزے کی منتظر تھی۔ شاید دل کے کسی کونے میں یہ امید باقی تھی کہ میرا بچہ آنکھیں کھولے گا، میری طرف دیکھے گا، میرے آنسو پونچھے گا اور ہمیشہ کی طرح کہے گا ”مما جانی، آپ روئیں نہیں۔“ مگر اس بار میرا محمد عمر خاموش تھا۔ وہ بچہ جو میری آواز پر فوراً جواب دیا کرتا تھا، آج میری پکار بھی نہ سن سکا۔ جس کے لیے میں کبھی ایک لمحہ بھی خاموشی برداشت نہیں کر پاتی تھی، آج اس کی خاموشی کے سامنے بےبس کھڑی تھی۔ ایک ماں کے لیے اس سے بڑھ کر بےبسی کیا ہوگی کہ جس بچے کو اس نے اپنی آواز سے بلایا، اپنی بانہوں میں سنبھالا، جس کے آنسو پونچھے، آج اسی کے سامنے اس کے اپنے آنسو بہہ رہے ہوں اور وہ انہیں پونچھنے کے لیے ہاتھ بھی نہ بڑھا سکے۔ محمد عمر، میرے بچے! تمہیں کیا معلوم کہ تمہارے بعد تمہاری مما جانی نے کتنی بار تمہیں آواز دی ہے۔ کتنی بار دل چاہا ہے کہ تم ایک مرتبہ پھر میری طرف دیکھو، میری بات سنو اور جواب میں کہو ”جی مما جانی!“ لیکن اب میرے حصے میں تمہاری یادیں ہیں، تمہاری خاموش تصویر ہے اور وہ آخری بوسا، جو میں نے تمہاری پیشانی پر دیا تھا۔ کاش! اس وقت تم ایک بار میری طرف دیکھ لیتے، میرے بچے۔۔۔۔صرف ایک بار😭💔۔ ایک امید کا اختتام 7 اپریل 2026 - @umarkabirian