@sopheakfn: ជំងឺស្វាយ និងមេរោគអេដស៍នៅខេត្តព្រះវិហារ ផ្ទុះការកើនឡើង, មន្ទីរសុខាភិបាលខេត្តអំពាវនាវដល់ប្រជាពលរដ្ឋឱ្យបង្កើនការប្រុងប្រយ័ត្ន (ព្រះវិហារ)៖ មន្ទីរសុខាភិបាលនៃរដ្ឋបាលខេត្តព្រះវិហារ បានចេញសេចក្តីជូនដំណឹង និងណែនាំដល់បងប្អូនប្រជាពលរដ្ឋទាំងអស់ឱ្យបង្កើនការប្រុងប្រយ័ត្នខ្ពស់ចំពោះស្ថានភាពនៃការរីករាលដាលជំងឺឆ្លងតាមការរួមភេទ រួមមានជំងឺស្វាយ និងមេរោគអេដស៍ ដែលកំពុងមានការកើនឡើងគួរឱ្យបារម្ភក្នុងខេត្ត។ យោងតាមសេចក្តីជូនដំណឹងរបស់មន្ទីរសុខាភិបាលខេត្តព្រះវិហារ នៅថ្ងៃទី៥ ខែវិច្ឆិកា ឆ្នាំ២០២៦ បានឱ្យដឹងថា ក្នុងឆ្នាំ២០២៦នេះ ករណីជំងឺស្វាយ ដែលបានរកឃើញមានចំនួន ៥៣៨ករណី ស្មើនឹង ៧.៣២% ខណៈឆ្នាំ២០២៥ មានចំនួន ៥៣៣ករណី ស្មើនឹង ៥.៦៧%។ តួលេខនេះបង្ហាញថា ជំងឺស្វាយនៅតែមាននិន្នាការកើនឡើង និងទាមទារឱ្យមានការយកចិត្តទុកដាក់បន្ថែមលើការបង្ការ និងការធ្វើតេស្តសុខភាព។ ដោយឡែកចំពោះមេរោគអេដស៍ ក្នុងឆ្នាំ២០២៦ មានករណីឆ្លងថ្មីចំនួន ២៥នាក់ ដោយអត្រាឆ្លងមានចំនួន ០.៣៩% កើនឡើងពី ០.៣៣% ក្នុងឆ្នាំ២០២៥។ ស្ថានភាពនេះបង្ហាញពីភាពចាំបាច់ក្នុងការបន្តពង្រឹងការផ្សព្វផ្សាយអប់រំសុខភាព និងការការពារខ្លួន ជាពិសេសក្នុងចំណោមយុវជន និងក្រុមប្រជាពលរដ្ឋដែលមានហានិភ័យខ្ពស់។ ដើម្បីចូលរួមការពារសុខភាពផ្ទាល់ខ្លួន គ្រួសារ និងសហគមន៍ មន្ទីរសុខាភិបាលខេត្តព្រះវិហារ បានអំពាវនាវដល់ប្រជាពលរដ្ឋឱ្យទៅទទួលសេវាពិគ្រោះយោបល់ និងធ្វើតេស្តរកមេរោគអេដស៍ និងជំងឺស្វាយដោយឥតគិតថ្លៃ នៅតាមមណ្ឌលសុខភាព និងមន្ទីរពេទ្យបង្អែកទូទាំងខេត្ត។ ជាមួយគ្នានេះ ប្រជាពលរដ្ឋត្រូវប្រកាន់ខ្ជាប់នូវការប្រើប្រាស់ស្រោមអនាម័យឱ្យបានត្រឹមត្រូវ និងជាប្រចាំរាល់ពេលរួមភេទ ព្រមទាំងចៀសវាងការប្រើប្រាស់គ្រឿងញៀន និងគ្រឿងស្រវឹងមុន ឬអំឡុងពេលរួមភេទ ដែលអាចបង្កើនហានិភ័យនៃការប្រព្រឹត្តអាកប្បកិរិយាប្រឈម។ មន្ទីរសុខាភិបាលក៏បានបញ្ជាក់ថា ប្រជាពលរដ្ឋអាចស្វែងរកសេវាប្រើប្រាស់ឱសថបង្ការមេរោគអេដស៍មុនពេលប្រឈមនឹងការឆ្លង (PrEP) នៅមន្ទីរពេទ្យបង្អែក១៦មករា ខេត្តព្រះវិហារ ផងដែរ។ លើសពីនេះ ក្នុងករណីធ្វើតេស្តរកឃើញមានមេរោគអេដស៍ ឬជំងឺស្វាយ អ្នកជំងឺនឹងទទួលបានការព្យាបាលទាន់ពេលវេលា ដោយប្រើប្រាស់ឱសថដែលមានប្រសិទ្ធភាពខ្ពស់។ រាល់ព័ត៌មានផ្ទាល់ខ្លួនរបស់អ្នកជំងឺ និងអ្នកទទួលសេវាទាំងអស់ នឹងត្រូវបានរក្សាការសម្ងាត់យ៉ាងម៉ឺងម៉ាត់។ តាមរយៈសេចក្តីជូនដំណឹងនេះ មន្ទីរសុខាភិបាលខេត្តព្រះវិហារ សង្ឃឹមថា ប្រជាពលរដ្ឋទាំងអស់នឹងចូលរួមសហការ បង្កើនការប្រុងប្រយ័ត្ន និងយកចិត្តទុកដាក់លើការធ្វើតេស្តសុខភាពជាប្រចាំ ដើម្បីទប់ស្កាត់ការឆ្លងរាលដាលជំងឺស្វាយ និងមេរោគអេដស៍ ព្រមទាំងការពារសុខភាពសាធារណៈក្នុងសហគមន៍ឱ្យបានកាន់តែប្រសើរ៕

SopheakFN

Open In TikTok:

Region: KH

Thursday 05 November 2026 13:08:48 GMT