@livelygeet: हिंसा वा धम्कीमा हुनुहुन्छ भने चुप नबस्नुहोस्। आज अमेरिकाको भर्जिनियाको अदालतमा Mamta Kafle को मुद्दामा सुनुवाइ भयो। उनका पति नरेश भट्टले आफैँ बयान दिँदै ममतालाई मृत भेटेपछि शव लुकाएको स्वीकार गरे। तर आफूले हत्या नगरेको र ममतालाई कहिल्यै हात नउठाएको दाबी गरे। अभियोजन पक्ष भने हत्या भएको भन्दै वैज्ञानिक र डिजिटल प्रमाणसहित प्रमाणित गर्ने प्रयासमा छ, र अन्तिम फैसला अझै आएको छैन। त्यसैले यो मुद्दाको दोषी को हो भन्ने निष्कर्ष हामी निकाल्दैनौँ। तर यो घटनाले हामी सबैलाई एउटा ठूलो पाठ सिकाएको छ। नेपालमा भागी विवाह गर्दा वा परिवारले विवाह तय गर्दा "केटा विदेशमा छ" भन्ने कुरा मात्रै पर्याप्त हुँदैन। विदेश, राम्रो कमाइ वा सुरक्षित भविष्य हुनु र असल मान्छे हुनु बेग्लाबेग्लै कुरा हुन्। विवाहअघि केटाको चालचलन, स्वभाव, रिसलाई सम्हाल्ने तरिका, महिलालाई गर्ने व्यवहार, साथीभाइ र पुरानो सम्बन्धबारे सकेसम्म बुझ्नुपर्छ। उसको परिवार, छिमेकी र साथीहरूसँग कुरा गर्नुपर्छ। एक्लै विदेश जानुअघि त्यहाँ आफ्नो कोही चिनजानको मान्छे छ कि छैन, आपत्‌मा सम्पर्क गर्ने ठाउँ कहाँ हो भन्ने पनि सोच्नुपर्छ। तर विवाहपछि मात्र थाहा पाइने कुरा पनि हुन्छन्। यदि श्रीमान् Narcissist, Abuser, Dominating वा अत्यन्त Controlling छ भने त्यसका संकेत चिन्नुपर्छ। जस्तै: तपाईंको फोन, पैसा, कागजात र आउजाउमा नियन्त्रण गर्नु, परिवार र साथीबाट अलग्याउनु, बारम्बार होच्याउनु, सानो कुरामा रिसाउनु, गल्ती सधैँ तपाईंलाई देखाउनु, र हात उठाउनु वा धम्क्याउनु। यस्तो अवस्थामा सबैभन्दा पहिले यो तपाईंको गल्ती होइन भन्ने कुरा मनमा राख्नुहोस्। आफूलाई विश्वास लाग्ने कुनै एक जना आफन्त वा साथीलाई गोप्य रूपमा सबै कुरा भन्नुहोस्। चोटपटक वा धम्कीका तस्बिर, म्यासेज र मितिहरू सुरक्षित ठाउँमा, श्रीमान्‌ले देख्न नसक्ने गरी राख्नुहोस्, किनकि ममताले पनि आफ्नो दाजुलाई गोप्य रूपमा तस्बिर पठाएकी थिइन् भन्ने कुरा आज अदालतमा आएको छ। आफ्नो राहदानी, परिचयपत्र र आवश्यक पैसा सुरक्षित राख्नुहोस्, र बाहिर निस्कने योजना श्रीमान्‌लाई थाहा नदिई बनाउनुहोस्। अमेरिकामा हुनुहुन्छ भने National Domestic Violence Hotline (1800-799-7233) मा फोन वा टेक्स्ट गर्न सकिन्छ, र खतरा तुरुन्तै छ भने 911 मा सम्पर्क गर्नुहोस्। नेपालमा हुनुहुन्छ भने प्रहरीको महिला तथा बालबालिका सेवा केन्द्र वा 100 numberमा सम्पर्क गर्न सकिन्छ। याद राख्नुहोस्, सम्बन्ध जोगाउनु जति महत्त्वपूर्ण छ, आफ्नो ज्यान र आत्मसम्मान त्योभन्दा धेरै महत्त्वपूर्ण छ। अन्तिममा, यदि तपाईं वा तपाईंले चिनेको कोही यस्तो सम्बन्धमा हुनुहुन्छ भने चुप नबस्नुहोस्, सहयोग माग्नुहोस्। #Mamtakafle #JusticeForMamta #saynotodomesticviolence #Call911 #askforhelpwhenyouneedit

Prakriti

Open In TikTok:

Region: US

Thursday 05 November 2026 22:27:01 GMT