@azmediaaz: Cəbrayılda yeni sənaye müəssisəsi fəaliyyətə başlayıb. 70 milyon manatlıq layihə çərçivəsində yaradılan zavodda müxtəlif növ alkoqolsuz içkilər istehsal ediləcək və 300 nəfər daimi işlə təmin olunacaq. Azmedia.Az xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva noyabrın 6-da Cəbrayıl rayonunda “Sunbeverage” MMC-nin alkoqolsuz içki istehsalı müəssisəsinin açılışında iştirak ediblər. “Azersun Holding”in Müşahidə Şurasının sədri Tahir Gözel dövlət başçısına və birinci xanıma müəssisə barədə məlumat verib. Bildirilib ki, holdinq tərəfindən Şərqi Zəngəzur iqtisadi rayonunda yaradılan bu müəssisədə qazlı və qazsız sular, soyuq çay, meyvə tərkibli, vitaminli və azkalorili içkilər istehsal olunacaq. Ərazisi 10 hektar olan müəssisənin illik istehsal gücü 150 min tondur. Məhsulların daxili bazarla yanaşı, xarici bazarlara da ixracı nəzərdə tutulur. Zavodda İtaliya istehsalı olan müasir avadanlıqlar quraşdırılıb. İstehsal prosesi suyun təmizlənməsi, şərbətin hazırlanması, qarışdırma, qazlaşdırma, məhsulun plastik butulka və şəffaf qida qablarına doldurulması, qapaqlanması, etiketlənməsi və qablaşdırılması mərhələlərini əhatə edir. Layihənin ümumi dəyəri 70 milyon manat təşkil edir. Müəssisənin maliyyələşdirilməsində özəl vəsait və bank kreditləri ilə yanaşı, İqtisadiyyat Nazirliyinin tabeliyində olan Azərbaycan Biznesinin İnkişafı Fondunun (ABİF) dəstəyindən də istifadə edilib. Belə ki, layihəyə 5 milyon manat məbləğində güzəştli kredit ayrılıb. Bundan əlavə, 5 milyon manat kredit üzrə zəmanət və faiz subsidiyası mexanizmindən yararlanılıb. Müəssisədə 300 nəfərin daimi işlə təmin edilməsi nəzərdə tutulur. Qeyd edək ki, zavod Şərqi Zəngəzur iqtisadi rayonunda qida sənayesinin inkişafına töhfə verməklə yanaşı, əhalinin məşğulluğunun təmin edilməsində də mühüm rol oynayacaq. Eyni zamanda, layihənin reallaşdırılması Azərbaycanın ixrac potensialının artırılmasına xidmət edəcək. #AzmediaAz #Cəbrayıl #İlhamƏliyev #MehribanƏliyeva #Sunbeverage

azmediaaz

Open In TikTok:

Region: AZ

Friday 06 November 2026 14:13:28 GMT