🌿ဘုရားပန်းအိုးကို စုံဂဏန်း/မဂဏန်းခွဲထားဖို့လို့လား🌿 ဘုရားပန်းအိုး ၂ အိုးပဲထားရမလား၊ ၃ အိုးထားရမလား သေချာမသိသေးသူများအတွက်... ဂေါတမမြတ်စွာဘုရားရှင် ဇေတဝန်ကျောင်းတော်ရှိ ဂန္ဓကုဋီတိုက်တော်၌ သီတင်းသုံးတော်မူစဉ်က ရပ်ဝေး၊ရပ်နီး အရပ်ဒေသအသီးသီးမှ ရဟန်းရှင်လူအများသည် ဘုရားဖူးလာရောက်၍ တရားနာယူကြလေ့ရှိကြသည်။ ထိုခေတ်က ခရီးသွားလာရေးမှာ ခက်ခဲကြမ်းတမ်းသဖြင့် တရားနာပရိသတ်များသည် ဖုန်မှုန့်များကပ်လျက်၊ ချွေးနံ့များပါလျက် ရောက်ရှိလာကြရသည်။ ထို့ကြောင့် ဂန္ဓကုဋီတိုက်တော်အတွင်း အနံ့အသက်မသန့်ရှင်းမှုများ ဖြစ်ပေါ်လာတတ်သည်။ ယင်းအခြေအနေကို သတိပြုမိသော အရှင်အာနန္ဒာမထေရ်မြတ်နှင့် ရဟန်းရှင်လူအချို့က မြတ်စွာဘုရားရှင်နှင့် တရားနာပရိသတ်များအကြား ပန်းများကို ချထားပူဇော်ကြသည်။ ထိုသို့ပြုလုပ်ခြင်းကြောင့် ပန်းရနံ့များက ပတ်ဝန်းကျင်ကို မွှေးကြိုင်စေပြီး တရားနာပရိသတ်များလည်း စိတ်ကြည်လင်ချမ်းမြေ့ကာ အမောပြေစေသည်။ ထို့အပြင် တရားတော်ကိုလည်း ပိုမိုကြည်ညိုစွာ နာယူနိုင်ကြသည်။ ဤသို့သော အကြောင်းအရင်းများကြောင့် ဘုရားပန်းပူဇော်သည့် ဓလေ့သည် ပေါ်ပေါက်လာခဲ့သည်ဟု ဆိုကြသည်။ ပန်းများကို ဘုရားရှင်အား ပူဇော်ခြင်းသည် မိမိကိုယ်တိုင် ပန်းပန်ဆင်ခြင်းမဟုတ်သဖြင့် “မာလာဂန္ဓ ဝိလေပန” နှင့်ဆိုင်သော သီလချိုးဖောက်မှု မဖြစ်စေဘဲ အပြစ်ကင်းသော ကုသိုလ်ကောင်းမှုတစ်ရပ် ဖြစ်ပါသည်။ ပန်းအိုး ဘယ်နှအိုးထားရမလဲ? “ဘုရားပန်းအိုး ၂ အိုးပဲထားရမလား၊ ၃ အိုးထားရမလား” ဟူသော မေးခွန်းအတွက် အဖြေမှာ ရှင်းပါသည်။ ဗုဒ္ဓမြတ်စွာဘုရား၏ အဆုံးအမများတွင် ပန်းအိုးကို မဂဏန်းဖြင့်သာထားရမည်၊ သို့မဟုတ် စုံဂဏန်းဖြင့်သာထားရမည်ဟူသော ဟောကြားချက် မရှိပါ။ ထို့ကြောင့် ပန်းအိုး ၁ အိုး၊ ၂ အိုး၊ ၃ အိုး၊ ၄ အိုး စသည်ဖြင့် မိမိဘုရားကျောင်းဆောင်၏ အနေအထား၊ နေရာအကျယ်အဝန်းနှင့် လိုက်ဖက်သလို ထားရှိပူဇော်နိုင်ပါသည်။ စုံဂဏန်းဖြစ်သည်၊ မဂဏန်းဖြစ်သည်ဟု ခွဲခြားသတ်မှတ်ပြီး ယင်းအပေါ် အယူအဆတစ်ခုတည်ဆောက်ခြင်းသည် ဗုဒ္ဓဘာသာ၏ မူလအဆုံးအမမဟုတ်ပါ။ အရေးကြီးသည်မှာ ပန်းအိုးအရေအတွက် မဟုတ်ဘဲ ဘုရားကျောင်းဆောင်နှင့် သင့်လျော်တင့်တယ်မှု၊ ကြည်ညိုမှုနှင့် စေတနာသဒ္ဓါတရားတို့ ဖြစ်ပါသည်။ အချို့သော ပုဂ္ဂိုလ်များသည် မိမိတို့၏ အဓိဋ္ဌာန်၊ ယုံကြည်မှု သို့မဟုတ် ဓလေ့ထုံးတမ်းများအရ ပန်းအိုးအရေအတွက် အမျိုးမျိုးဖြင့် ပူဇော်ကြသည်။ မည်သို့ပင် ပူဇော်စေကာမူ စေတနာသန့်ရှင်းစွာဖြင့် လှူဒါန်းပါက ကုသိုလ်တရားသည် ကုသိုလ်တရားပင် ဖြစ်ပါသည်။ ဘုရားပန်းများ လန်းဆန်းလှပနေသည့်အခါ ဘုရားကျောင်းဆောင်လည်း မင်္ဂလာကျက်သရေ တိုးပွားစေပါသည်။ တရားချစ်ခင် စိတ်ကောင်းဝင်ကြကုန်သော သူတော်စင်ပရိသတ်အပေါင်းတို့သည် ကပ်သုံးပါးဘေးမှ ကင်းဝေး၍ အမြတ်ဆုံးတရားတော်နှင့် အေးချမ်းကြပါစေ။ ကိုယ်၏ကျန်းမာခြင်း၊ စိတ်၏ချမ်းသာခြင်းတို့နှင့် ပြည့်စုံကာ လန်းဖြာကြပါစေ။🙏🙏🙏 #Credit. 🙏 🙏 🙏 - @yamonekhin111