በሚኒሶታ ግዛት በአሰቃቂ የመኪና አደጋ ህይወቱ የጠፋው ወጣት የኢትዮጵያዊያን ማህበረሰብን በሀዘን አስደንግጧል። በሚኒሶታ ግዛት በርንስቪል ከተማ ትላንት ምሽት በተከሰተ ድንገተኛ የመኪና አደጋ የ22 ዓመቱ ኢትዮጵያዊ የዩኒቨርሲቲ ተማሪ ክርስቲያን ጌታቸው ህይወቱ ማለፉ ተረጋገጠ። በአራተኛ ዓመት የከፍተኛ ትምህርቱን በዩንቨርስቲ ዉስጥ በመከታተል ላይ የቆየው እና በዘንድሮው አመት ትምህርቱን ጨርሶ ለመመረቅ ዝግጁ የነበረው ወጣቱ ክርስቲያን ጌታቸው፣ ከወንድሙ ጋር አብሮ ከሚኖርበት ቤት ምሽት 12 ሰዓት ገደማ ወጥቶ እንደነበርና ከሰዓታት በኋላ ግን መኪናው ከመንገድ ወጥቶ በመገልበጥ ዛፍ ገጭቶ መገኘቱን የበርንስቪል ፖሊስ አስታውቋል። የአደጋው መንስኤ እስካሁን በውል ያልታወቀ ሲሆን፣ አስከሬኑ በሄነፒን ካውንቲ የህክምና መርማሪ ቢሮ ውስጥ ለዝርዝር ምርመራ ይገኛል። የኢትዮጵያ ኮምዩኒቲ ሊቀመንበር አቶ ደምሴ ከበደ እንደገለጹት፣ አደጋው የደረሰው በውስጥ ለውስጥ መንገድ ላይ በመሆኑ እና ከአንድ ወር በፊት በተመሳሳይ ሁኔታ በሮዝማውንት ከተማ ሌላ ኢትዮጵያዊ ወጣት ህይወቱ ማለፉን ተከትሎ፣ የኮምዩኒቲው አመራሮች የአሟሟቱን ትክክለኛ መንስኤ ለማወቅ ከመርማሪዎች ጋር የቅርብ ክትትል እያደረጉ ነው። በአሁኑ ወቅት ማህበረሰቡ ድንገተኛ መርዶ ለደረሳቸው ወላጆቹ ማጽናኛ እና የክርስቲያንን አስከሬን ወደ ትውልድ ሀገሩ ኢትዮጵያ ለመላክ የ”GoFundMe” የገንዘብ ማሰባሰቢያ ዘመቻ ጀምሯል። የኮምዩኒቲው አመራሮች በአካባቢው የሚኖሩ ወገኖች በሙሉ በገንዘብም ሆነ በሞራል ከሟች ቤተሰብ ጎን እንዲቆሙ ጥሪያቸውን አስተላልፈዋል። የጎ ፈንድ ሚ ሊንክ: https://gofund.me/89878da37 - @meznagnia_media