#ဘဝဆိုတာခဏတာလာရောက်နားခိုတဲ့ခရီးတစ်ခုပါ..# ----------------------------------------------------------- တစ်ချိန်ကတော့ ပျော်ရွှင်မှုဆိုတာကို အပြည့်အဝခံစားချင်ခဲ့ဖူးတယ်။ ဝမ်းနည်းမှုတွေကြုံလာရင်လည်း အကြာကြီးနာကျင်ခဲ့ဖူးတယ်။ အခုတော့ အရာရာကို အလွန်အကျွံ မခံစားတော့ဘူး။ ရလာရင်လည်း ကျေးဇူးတင်တယ်၊ ဆုံးရှုံးရရင်လည်း သင်ခန်းစာတစ်ခုအဖြစ် လက်ခံတတ်လာတယ်။ နေ့ရက်တွေကို အေးအေးဆေးဆေး ဖြတ်သန်းတတ်လာတာပါပဲ။ လူ့ဘဝဆိုတာ ဘယ်သူမှ အမြဲတမ်းနေထိုင်ခွင့်ရတဲ့ နေရာမဟုတ်ဘူး။ ကိုယ်တိုင်ကခဏတာလာရောက်နေထိုင်တဲ့ ဧည့်သည်တစ်ယောက်ပါ။ ကိုယ့်ဘေးနားမှာ ရှိနေတဲ့သူတွေ၊ ကိုယ်မြတ်နိုးတဲ့အရာတွေ၊ စိတ်ကူးယဉ်ထားတဲ့ အိပ်မက်တွေ၊ ပိုင်ဆိုင်မှုတွေဆိုတာလည်း အချိန်တစ်ခုအထိသာ အတူရှိခွင့်ရကြတာပါ။ အချိန်က ပေးထားတဲ့ နုပျိုမှုတွေဟာလည်း တစ်နေ့မှာ အမှတ်တရအဖြစ် ပြောင်းလဲသွားမယ်။ တစ်ချိန်က အရေးကြီးလှပါတယ်ဆိုတဲ့ အရာတွေဟာလည်း နောက်တစ်ချိန်မှာ ပြန်တွေးမိရုံသာ ကျန်တော့မယ်။ ဒါကြောင့် ရှိနေစဉ်မှာ တန်ဖိုးထားဖို့နဲ့ မရှိတော့တဲ့အခါ လက်ခံတတ်ဖို့ သင်ယူထားရတယ်။ ဘဝမှာ အရာရာဟာ ကိုယ်စီကိုယ်စီ အကြောင်းတရားတွေနဲ့ ရောက်လာကြတာပါ။ မတွေ့ချင်ခဲ့ပေမယ့် ဆုံတွေ့ခဲ့ရသူတွေရှိသလို၊ တွေ့ချင်လွန်းပေမယ့် အဝေးကနေသာ ဖြတ်သန်းသွားခဲ့ရသူတွေလည်း ရှိတယ်။ အချို့က အမှတ်တရဖြစ်ဖို့ ရောက်လာကြတယ်။ အချို့ကတော့ သင်ခန်းစာတစ်ခု ပေးပြီး ပြန်ထွက်ခွာသွားကြတယ်။ ပြောချင်တဲ့စကားတွေကို နှုတ်ဆိတ်ထားရတဲ့အချိန်ရှိသလို၊ မပြောချင်တဲ့စကားတွေကိုလည်း အခြေအနေအရ ပြောလိုက်ရတဲ့အခါတွေ ရှိတယ်။ ကိုယ်မဖန်တီးခဲ့တဲ့ ပြဿနာတွေကို ဝင်ရောက်ဖြေရှင်းရတာရှိသလို၊ ကိုယ်မရွေးချယ်ခဲ့တဲ့ တာဝန်တွေကိုလည်း ထမ်းဆောင်ရတဲ့အခါ ရှိတယ်။ လိုချင်တိုင်း မရနိုင်သလို မလိုချင်တိုင်းလည်း ရှောင်လွှဲလို့မရဘူး။ ဖြစ်ချင်တဲ့အတိုင်း မဖြစ်လာတဲ့အခါ ကိုယ့်ဆန္ဒကို ကိုယ်ပြန်ထိန်းသိမ်းရတယ်။ မဖြစ်နိုင်တော့တဲ့ မျှော်လင့်ချက်တချို့ကိုလည်း အတိတ်ထဲမှာပဲ ထားခဲ့တတ်ရတယ်။ အရေးကြီးတာက ဘဝကို ကိုယ်လိုချင်တဲ့ပုံစံအတိုင်း ဖြစ်လာဖို့ အတင်းအကျပ် မတောင်းဆိုဖို့ပါပဲ။ မပြောင်းလဲနိုင်တဲ့ အခြေအနေတွေကို လက်ခံပြီး ပြောင်းလဲနိုင်တဲ့ ကိုယ့်စိတ်ထားကိုသာ ပြုပြင်တတ်ဖို့ လိုတယ်။ တစ်ခါတလေ ဘဝဟာ ချိုမြိန်တဲ့နေ့ရက်တွေထက် ခါးသီးတဲ့အချိန်တွေကို ပိုပေးတတ်တယ်။ ဒါပေမဲ့ ခါးသီးမှုတိုင်းကို မုန်းနေစရာမလိုသလို ပျော်ရွှင်မှုတိုင်းကိုလည်း အမြဲတည်မြဲနေစေချင်လို့ မရပါဘူး။ နောက်ဆုံးတော့ ကိုယ်လိုအပ်တာဟာ အရာရာပြည့်စုံနေတဲ့ ဘဝတစ်ခုမဟုတ်ဘူး။ မပြည့်စုံမှုတွေကြားမှာလည်း စိတ်အေးချမ်းစွာ နေနိုင်တဲ့ နှလုံးသားတစ်ခုပါပဲ။ ရသမျှကို ကျေးဇူးတင်မယ်။ ဆုံးရှုံးသမျှကို သင်ခန်းစာယူမယ်။ ချစ်ရသူတွေကို မေတ္တာထားမယ်။ ထွက်ခွာသွားသူတွေကိုလည်း အပြစ်မတင်တော့ဘူး။ ဘဝဆိုတာ အနိုင်ရဖို့ အမြဲကြိုးစားနေရတဲ့ ပြိုင်ပွဲတစ်ခုမဟုတ်ဘူး။ ကိုယ်ရောက်နေတဲ့ ခရီးလမ်းလေးမှာ ကောင်းတာလေးတွေ ဖန်တီးရင်း၊ မကောင်းတာတွေကို သည်းခံကျော်ဖြတ်ရင်း နေထိုင်သွားရတဲ့ ခရီးတစ်ခုသာ ဖြစ်ပါတယ်။ အဆုံးမှာတော့ ဘာတွေကို ပိုင်ဆိုင်ခဲ့သလဲဆိုတာထက် ဘယ်လိုစိတ်ထားနဲ့ နေထိုင်ခဲ့သလဲဆိုတာက ပိုအရေးကြီးတယ်။ ဘဝကို အလွန်အကျွံ မမျှော်လင့်ဘဲ၊ အလွန်အကျွံလည်း မငြိုငြင်ဘဲ... ကိုယ့်ရဲ့တစ်နေ့တာလေးတွေကို မေတ္တာတရားနဲ့ အေးချမ်းစွာ ဖြတ်သန်းသွားနိုင်ရင် အဲဒါဟာလည်း တန်ဖိုးရှိတဲ့ ဘဝတစ်ခုပဲမဟုတ်လား။ #စိတ်ကြည်နွယ်# - @umyasoemm