@kidanzelalem: ለማጽ ጉዕዞ የለን! ምናልባት ኵርኳሕ ዘይብሉ ምቹእ ዓራት ምግዛእ ይከኣል ይኸውን፤ ኵርኳሕ ዘይብሉ ጉዕዞ ምጕዓዝ ግን ፍጹም ኣይከኣልን እዩ። ምናልባት ዓይነት እቲ ኵርኳሕ ይፈላለ ይኸውን፤ ምናልባት እውን ኣጠማምታና በበይኑ ይኸውን። እንተዀነ ግን፡ ኵሉ እትሓልፎ ጉዕዞ ህይወት ኵርኳሕ ዘይብሉ የለን። ብቐንዱ ዓወት ማለት ተቓሊስካ ኣብ እትስዕረሉ ግጥም እምበር፡ ስያመ ጥራይ ሂብካ እትጽምብሎ ዓወት የለን። ጉዕዞ ፍቕሪ እውን ከምቲ ኵሉ ጉዕዞ ኵርኳሕ ኣለዎ! ኵርኳሕ ዘይብሉ ፍቕሪ ኣብ ስእሊ ጥራይ እዩ ዘሎ፤ ለማጽ ፍቕሪ ኣብ ሾው (Show) ጥራይ እዩ ዝርከብ። እቲ ሓቀኛ ፍቕሪ ዋጋ ኣለዎ፤ ዋጋ እውን የኽፍል እዩ። ኵርኳሕ ኣለዎ፤ ውረድ-ደይብ ዘለዎ፡ ዓቐብን ቍልቍለትን ዘካተተ ነዊሕ ጉዕዞ እዩ። ምረት ኣለዎ ልክዕ ከም ዕረ፥ ግን ድማ ኣብ ውሽጡ ጣዕሚ ዘለዎ ምረት! እሾኽ ኣለዎ ልክዕ ከም በለስ፥ ግን ድማ ድሕሪ እቲ ቅላጥ ምቁር ፍረ ዝሓዘ! ፍቕሪ ብኽያትን ሰሓቕን ዘካተተ፡ ሓጐስን ትራጀዲን ዝሓቘፈ ዓቢ መጽሓፍ እዩ። እቶም ብዛዕባ ፍቕሪ ዘለዉና ግጉያት ኣመለኻኽታታት፥ ካብቶም ናይ ሓሶት ስምዒታትናን ኣጀማምራናን ዝነቅሉ እዮም። ኣጀማምራና ክዳን ብምጽራይ፡ ጨጉሪ ብምምሻጥ፡ ደገኻን ምስልኻን ኣጽሪኻ እንከን ዘይብሉ "ካብ ሰማይ ዝወረደ መልኣኽ" መሲልካ ዝግበር ኣቀራርባ እዩ ሳዕቤን ናይ ደሓርና። እቲ ኵሉ ግዜ እንገብሮ ረሳሕን ቀዳድን ክዳን፡ እቲ ኵሉ ግዜ እንጥቀመሉ ኣበላልዓን ኣኰላልሳን፡ እቲ ኵሉ ግዜ ንዅሉ ሰብ እንጥቀመሉ ኣዘራርባን ጠባይን ሒዝናዮም እንተንመጽእን ብእኡ እንተንጅምሮን ነይርና፦ "ጸገማት ዘይምህላው ዘይኰነስ፡ ንጸገማት ከመይ ጌርካ ትስዕሮም ኣብ ምሕባር እዩ ዘሎ ምስጢር ጽንዓት" ዝብል መረዳእታ ምሓዝና፤ ዝያዳ ድማ ምተጠቐምና ነይርና! ጽንዓት ፍቕሪ ማለት ንብድሆታትካ ከመይ ጌርካ ሓቢርካ ትቃለሶም እምበር፡ ጸገም ዘይምህላው ኣይኰነን። ከምቲ ኵሉን ኣብ ኵሉን፡ ኣብ ፍቕራዊ ጉዕዞ እውን ጸገም ኣሎ፡ ብድሆ ኣሎ። እቶም ጽቡቕ ሮማንቲካዊ ምስሊ ዘርእዩና ሰባት እውን ብድሕሪ መጋረጃ ዝነብዕሉን ዝሓምምሉን ከቢድ ጉዕዞ ኣለዎም። እቲ ምስጢር ግን በቲ ዝገጠሞም ጸገም ስለ ዘይተሳዕሩ ጥራይ እዮም ጸኒዖም ዘለዉ! ስለዚ ጸገማት ከምዘሎ እመን፤ ንጸገማት ከመይ ጌርካ ሓቢርካ ትስዕሮም ድማ ተቓለስ! ሓቀኛ ፍቕሪ ብደጋዊ ምስሊ ዘይኰነስ፡ ብውሽጣዊ ጽንዓት እዩ ዝረጋገጽ! ብዙሓት ቀይሕ ሕብሪ ጽቡቕ ክዳን ብምግባር ነታ ሓንቲ መዓልቲ ዘኽብሩ ኣለዉ፤ ኣነ ግን ንሓንቲ መዓልቲ ዘይኰነስ፡ ነተን ብዙሓት መዓልታት ክርእዩ እዩ ባህገይ! -ዘፍጥረት #ሰረት #kidanzelam #ትምህርቲ_ህይወት #ፍቕሪ #ክውንነት

ሰረት

Open In TikTok:

Region: GB

Saturday 07 November 2026 10:40:16 GMT