ဘဝမှာ နောက်ကျသွားပြီလို့ ခံစားနေရတဲ့သူတွေအတွက်… တစ်ခါတလေ ကိုယ့်အသက်ကိုယ် ပြန်ကြည့်မိတဲ့အခါ စိတ်ထဲမှာ တစ်ခုခု လေးနေတတ်ကြတယ်။ ကိုယ်နဲ့ရွယ်တူတွေ အိမ်ဝယ်ပြီးသွားပြီ။ တချို့က စီးပွားရေးလုပ်ငန်းတွေ စနေပြီ။ တချို့က မိသားစုဘဝ တည်ဆောက်နေကြပြီ။ ကိုယ်ကတော့ ဒီနေ့အထိ အလုပ်လုပ်လိုက်၊ ငွေရှာလိုက်၊ အသုံးစရိတ်ရှင်းလိုက်နဲ့ ဘဝကို ရှေ့ဆက်နေရတုန်းပဲ။ အထူးသဖြင့် နိုင်ငံခြားမှာ နေတဲ့သူတွေဆို ပိုပြီး ခံစားရတတ်တယ်။ အိမ်ကနေ ထွက်လာတုန်းက ဒီအရွယ်ရောက်ရင် ဘယ်လိုဖြစ်နေရမယ်ဆိုတဲ့ မျှော်လင့်ချက်တွေ ရှိခဲ့ကြတယ်။ ဒါပေမဲ့ လက်တွေ့ဘဝက ကိုယ်စိတ်ကူးထားသလို ဖြစ်မလာတဲ့အခါ ငါများ နောက်ကျနေပြီလားဆိုပြီး ကိုယ့်ကိုယ်ကို မေးမိလာတယ်။ တကယ်တော့ ဘဝဆိုတာ လူတိုင်း အချိန်တူတူနဲ့ ရှေ့ရောက်ကြတာ မဟုတ်ဘူး။ တချို့လူတွေက အသက် ၂၅ မှာ အောင်မြင်နိုင်တယ်။ တချို့က အသက် ၃၅ မှာမှ ကိုယ့်လမ်းကိုယ် ရှာတွေ့တယ်။ တချို့က အသက် ၄၀ ကျော်မှ ဘဝကို ပြန်စတင်နိုင်ကြတယ်။ ကိုယ်မသိတဲ့ နောက်ကွယ်မှာ သူတို့ဖြတ်သန်းခဲ့ရတဲ့ အခက်အခဲတွေ ရှိနေတတ်တယ်။ ဒါကြောင့် သူများရဲ့ ရလဒ်ကိုကြည့်ပြီး ကိုယ့်ရဲ့ လက်ရှိအခြေအနေကို အပြစ်မတင်ပါနဲ့။ “အပင်တစ်ပင် အမြစ်တွယ်ဖို့ အချိန်ယူရသလို” လူတစ်ယောက်ရဲ့ ဘဝလည်း တည်ငြိမ်ဖို့ အချိန်ယူရတတ်တယ်။ တချို့အချိန်တွေမှာ ကိုယ်ကြိုးစားနေပေမဲ့ ရလဒ်မမြင်ရဘူး။ ငွေစုနေပေမဲ့ မလောက်သေးဘူး။ အလုပ်လုပ်နေပေမဲ့ ရှေ့တိုးမလာသလို ခံစားရတယ်။ ဒါပေမဲ့ အဲဒီကာလတွေက ဘာမှမဖြစ်ထွန်းခဲ့တဲ့ အချိန်တွေ မဟုတ်ပါဘူး။ ကိုယ်ခံနိုင်ရည်ရှိလာတယ်။ လူရွေးတတ်လာတယ်။ ငွေရဲ့တန်ဖိုးကို နားလည်လာတယ်။ ဘယ်အရာကို လက်လွှတ်သင့်တယ်ဆိုတာ သိလာတယ်။ တစ်ခါတလေ ဘဝမှာ ရှုံးနိမ့်ခဲ့တဲ့အချိန်တွေက ကိုယ့်ကို ပိုပြီး ရင့်ကျက်လာစေတတ်တယ်။ ဒါပေမဲ့ တစ်ခုတော့ သတိထားပါ။ နောက်ကျနေပြီလို့ ခံစားရတာနဲ့ ကိုယ့်ဘဝကို လက်လျှော့လိုက်တာ မတူဘူး။ အသက်ကြီးလာလို့ အခွင့်အရေးနည်းသွားနိုင်တယ်။ တာဝန်တွေ များလာလို့ အချိန်နည်းသွားနိုင်တယ်။ ဒါပေမဲ့ ကိုယ့်ဘဝကို ပြန်ပြင်ဖို့ ဒီနေ့လုပ်နိုင်တဲ့ အရာလေးတွေတော့ ရှိနေသေးတယ်။ အရင်က မစုနိုင်ခဲ့တဲ့ငွေကို ဒီနေ့ကစပြီး စုပါ။ မသင်ယူခဲ့ရတဲ့ပညာကို ဒီနေ့ကစပြီး သင်ယူပါ။ မကောင်းတဲ့အကျင့်တွေကို တစ်ခုချင်း ပြင်ပါ။ သူများနဲ့ ပြိုင်ဖို့မလိုဘူး။ မနေ့က ကိုယ့်ထက် ဒီနေ့ကိုယ် ပိုကောင်းလာဖို့ပဲ လိုတယ်။ “လမ်းပျောက်နေသူအတွက်တော့ ခြေတစ်လှမ်းမှန်တာကလည်း ရှေ့တိုးခြင်းပဲ” ဆိုတဲ့သဘောပါ။ ဘဝမှာ အရေးကြီးတာက ဘယ်အသက်အရွယ်မှာ စတင်ခဲ့သလဲဆိုတာထက် စတင်ပြီးနောက် ဘယ်လောက်အထိ ဆက်လျှောက်နိုင်သလဲဆိုတာပါ။ ကိုယ့်ဘဝက သူများထက် နောက်ကျနေနိုင်တယ်။ ဒါပေမဲ့ ကိုယ့်အနာဂတ်ကိုတော့ ဒီနေ့ကစပြီး ပြောင်းလဲနိုင်သေးတယ်။ #ဘဝအတွက်ခွန်အားဖြစ်စေ #ဗဟုသုတ - @khinmaungtun283