🍁 သူများရင်ဘတ်တော့ မထိစေနဲ့ 🍁 ___________________________________ မနေ့က ဆရာတော်တစ်ပါး စကားပြောနေတာကို နားထောင်ရင်း စကားဆန်းလေးတစ်ခု ကြားမိခဲ့တယ်။ “လောကမှာ ဘုရားတောင် ကဲ့ရဲ့ မလွတ်ဘူး၊ ဟုတ်တယ်မို့လား။ အာ့တော့ အရှင်ဘုရား (အများအတွက်)ကောင်းမယ်ထင်ရင် အကျိုးရှိမယ်ထင်ရင် လုပ်သာ လုပ်။ အေး ဒါပေမယ့် သူများရင်ဘတ်တော့ မထိစေနဲ့“ တဲ့။ နားထောင်ရင်း ပထမတစ်ခါတော့ သိပ်ပြီး သတိမထားမိလိုက်ဘူး။ ဆရာတော်က ဒီစကားကို သုံးလေးခါ ထပ်ပြောနေတော့မှ သတိထားမိလိုက်တယ်။ “သူများရင်ဘတ်တော့ မထိစေနဲ့“ တဲ့။ ဆရာတော်က သက်တော် ဝါတော် ရနေပေမယ့် သူ့စကားက ခေတ်ဆန်နေသလို ဖြစ်နေတယ်။ “သူများရင်ဘတ်တော့ မထိစေနဲ့“ဆိုတဲ့ စကားဟာ လူသားဆန်မှုကို ဖော်ပြပေးနေသလိုပဲ။ ဗြဟ္မစိုရ်တရားကိုလည်း ရိုးရိုးလေး အဓိပ္ပါယ်ဖွင့်ပြသွားသလိုပါပဲ။ လူအချင်းချင်း လှည့်ပတ်တာဟာလည်း သူ့ရင်ဘတ်ကို ထိတာပါပဲ။ အထင်သေးတာဟာလည်း သူ့ရင်ဘတ်ကို ထိတာပါပဲ။ ဆင်းရဲအောင်လုပ်တာဟာလည်း သူ့ရင်ဘတ်ကို ထိတာပါပဲ။ ဘေးဥပဒ်တွေ၊ရန်ဘေးတွေ၊အန္တရာယ်တွေနဲ့ ကြုံအောင်လုပ်တာဟာလည်း သူ့ရင်ဘတ်ကို ထိတာပါပဲ။ အဆင်မပြေအောင်၊ အနှောင့်အယှက်ဖြစ်အောင် တစ်နည်းတစ်ဖုံ ဖန်တီးတာတွေဟာလည်း သူ့ရင်ဘတ်ကို ထိတာပါပဲ။ စာနာခြင်းကင်းတာတွေ၊ ရန်လိုညှင်းပန်းနှိပ်စက်တာတွေ၊ မလိုမုန်းထားတာတွေဟာလည်း သူ့ရင်ဘတ်ကို ထိတာပါပဲ။ ကူညီရိုင်းပင်မှုမရှိတာတွေ၊ သနားငဲ့ညှာမှုမရှိတာတွေ၊ ဖိနှိပ်ချုပ်ချယ်တာတွေဟာလည်း သူ့ရင်ဘတ်ကို ထိတာပါပဲ။ ဝမ်းမြောက်ဝမ်းသာ မကြိုဆိုနိုင်တာတွေ၊ လက်တွဲ မခေါ်နိုင်တာတွေ၊ အပုပ်ချတာတွေ၊ ချောက်ချတာတွေဟာလည်း သူ့ရင်ဘတ်ကို ထိတာပါပဲ။ ဆရာတော်က အဲဒါတွေ မပြောဘူး။ ဗြဟ္မစိုရ်တရားကို ရိုးရိုးလေးပဲ အဓိပ္ပါယ်ဖွင့်ပြသွားတာ။ “သူများရင်ဘတ်တော့ မထိစေနဲ့“ တဲ့။ အများအတွက် ကောင်းမယ်ထင်လို့၊အကျိုးရှိမယ်ထင်လို့ လုပ်တာတောင်မှ သူများရင်ဘတ်ကို မထိစေဖို့အတွက် မှာထားတာလေးက သတိပြုစရာ၊ လိုက်နာကျင့်သုံးစရာပါပဲ။ အများအတွက် မကောင်းဘူးဆိုရင်၊အကျိုးမရှိဘူးဆိုရင် အထူးပင် ပြောနေစရာမလိုတော့ပါဘူး။ ဘယ်လက်နက်တွေ ဘယ်လောက်ကောင်းတယ်ပဲ ပြောပြော၊ လောကမှာ စိတ်နှလုံးကို(ရင်ဘတ်ကို) ထိမှန်တဲ့ခဲလုံးဟာ အပြင်းထန်ဆုံးပဲ မဟုတ်လား။ ဗြဟ္မစိုရ်တရားကို လက်ကိုင်ထားချင်သူတွေအတွက် ဆရာတော့်စကားလေးက အမှတ်တရ ဖြစ်နေမှာပါ။ “သူများရင်ဘတ်တော့ မထိစေနဲ့“ တဲ့။ -#အရှင်ဝါယာမိန္ဒာလင်္ကာရာဘိဝံသ #Credit: ကူးယူဖော်ပြပါသည်။ - @user710487501