PEREZIDA WA REPUBLIKA Y'UBURUNDI, PIERRE NKURUNZIZA, YAGENDEREYE INTARA ZA MURAMVYA NA GITEGA Umukuru w'Igihugu c'Uburundi, Nyenicubahiro Pierre NKURUNZIZA, yamaze imisi ibiri, ku wa kabiri igenekerezo rya 17 no ku wa gatatu igenekerezo rya 18 Mukakaro, mu ntara zo hagati mu gihugu. Urwo rugendo yarutanguriye mu ntara ya Muramvya, aho yagiranye ikiganiro n'abavuka muri iyo ntara hamwe n'abakozi bakuru b'igihugu, mu ntumbero yo kubaremesha no kubakangurira gukunda igihugu no gukomeza umutima wo gukorera igihugu. Inyuma y'ico kiganiro, Umukuru w'Igihugu yaruguruye ku mugaragaro inyubakwa nshasha z'ibiro vy'igisagara ca Muramvya. Izo nyubakwa zifise amagorofa atatu, zikaba zubatswe bivuye ku twigoro tw'abanyagihugu mu bikorwa rusangi, ku mfashanyo y'ikigega FONIC hamwe n'intererano z'abavuka muri iryo komine. Agaruka avuye muri Muramvya, Umukuru w'Igihugu yaratanze imfashanyo y'ibiribwa ku bantu batishoboye bo mu makomine ya Muramvya na Rutegama. I Rutegama, Umukuru w'Igihugu yari aherekejwe n'Umukuru w'Ibiro vyiwe bijejwe ibikorwa vya misi yose mu biro vy'Umukuru w'Igihugu, na we nyene akaba avuka muri iryo komine. URUGENDO RWA PEREZIDA MU NTARA YA GITEGA Ku wa gatatu, Umukuru w'Igihugu yamaze umusi wose mu ntara ya Gitega, aho yari afise ibikorwa vyinshi. Igikorwa ca mbere cari ikoraniro yagiranye n'abarongozi b'intara zose zigize Uburundi. Ico gihe barimbuye uko ibintu vyifashe mu gihugu mu vya politike, imibano n'umutekano. Inyuma y'iryo koraniro, Umukuru w'Igihugu yarongoye inama yari ifise intumbero yo gutegura Umusi Mukuru w'Isabikanywa ry'Umutekano mu Banyagihugu. Muri iyo nama yari kumwe n'Abashikiranganji bane, ari bo: Umushikiranganji w'Intwaro yo hagati mu gihugu, Indero yo gukunda igihugu n'Iterambere rusangi. Umushikiranganji ajejwe Ugufashanya kw'Igihugu, Agateka ka zina muntu n'Iterambere ry'Imibano. Umushikiranganji ajejwe Uburimyi n'Ubworozi. Umushikiranganji ajejwe ibidukikije. Abo bashikiranganji bari bajejwe kwiga ingene hashirwaho politike y'igihugu yo gufasha abantu batishoboye, kugira ngo igabanye ubukene n'amarushwa mu gihugu. Mu ijambo ryiwe, Umukuru w'Igihugu yarasiguye ido n'ido ingene Reta yari yafashe ingingo yo gufasha abantu bari mu buzima bugoye, mu buryo burama kandi butanga umusaruro. Reta yari yahisemwo guha uruhara runini inzego z'intwaro zo hasi, kuko ari zo zegereye abakeneye gufashwa kandi zikaba zishobora kumenya neza imfashanyo ikenewe kuri umwe wese. Yisunze imico kama y'Abarundi, itashigikira ko hari umuntu wo mu kibano yoreka mugenziwe akagwa mu bukene bukabije, Umukuru w'Igihugu yahamagariye abari muri iyo nama gutanga akarorero keza. Yabasavye kugira uruhara mu gufasha abantu batishoboye, cane cane abageze mu zabukuru hamwe n'abafise ubumuga butandukanye baba ku mitumba bakomokako, biciye no mu mfashanyo zoroshe ariko zifise akamaro kanini mu buzima bwabo. Ku bwa Perezida, guha ubushobozi n'uruhara runini inzego zo mu kibano bisaba ko amakomine agira uruhara rukomeye muri iyo poritike yo gufashanya. Ni co gituma abajejwe intwaro kuva ku rwego rwo hasi bahamagariwe gukuba kabiri inguvu, kugira ngo mu misi iri imbere Uburundi ntibuzosubire kugira abantu basabiriza. Yavuze ko kuba hari abantu basabiriza ari ibiterasoni ku kibano cose. IMYIMENYEREZO RUSANGI N'URWARUKA I GITEGA Umukuru w'Igihugu c'Uburundi yasozereye ibikorwa vyiwe mu ntara ya Gitega yitavye ibikorwa rusangi vyabereye ku kibuga c'Inkino Ingoma, aho yari yakoraniye n'isinzi ry'urwaruka rwari mu karuhuko k'amashure. Mu majambo yashikirije urwo rwaruka, Umukuru w'Igihugu yaribukije ko ikiringo c'akaruhuko k'amashure kitari ic'ubunebwe canke kwishora mu ngeso mbi. Ahubwo, yavuze ko ari akaryo keza ko kwijukira ibikorwa vy'amaboko n'ivy'ubwenge, mu ntumbero yo guteza imbere ikibano aho urwo rwaruka ruriko ruracumbika mu biruhuko. Yarasavye urwo rwaruka kwitabira ku bwinshi ibikorwa bitandukanye bizotunganywa n'inzego z'ubutegetsi. - @ahishakiyedesireofficial