တကယ်တော့ ကိုယ်လည်း လူပဲလေ ပင်ပန်းရင် နားချင်တယ်၊ စိတ်ညစ်ရင် ရင်ဖွင့်ချင်တယ်၊ အဆင်မပြေတဲ့အခါ ကိုယ့်ဘေးမှာ နားလည်ပေးမယ့်သူတစ်ယောက်လောက် ရှိစေချင်တယ်။ ဒါပေမဲ့ ကိုယ့်ဘဝမှာ ဖြစ်လာသမျှအရာတိုင်းကို ကိုယ်တစ်ယောက်တည်းပဲ ဖြေရှင်းနေရတယ်။ အလုပ်မှာ အဆင်မပြေတဲ့နေ့တွေရှိတယ်၊ လူတွေရဲ့စကားတွေကြောင့် စိတ်ထိခိုက်ရတဲ့နေ့တွေရှိတယ်။ အိမ်ပြန်ရောက်ရင်တော့ စိတ်အေးချမ်းရမယ်ထင်ခဲ့ပေမဲ့ တစ်ခါတလေ အဲဒီနေရာမှာတောင် စိတ်ညစ်စရာတွေက ရှိနေပြန်တယ်။ အပြင်မှာတော့ ဘာမှမဖြစ်သလို နေတတ်အောင် ကြိုးစားနေတယ်။ ရယ်စရာရှိရင် ရယ်လိုက်တယ်၊ စကားပြောစရာရှိရင် ပြောလိုက်တယ်။ ဒါပေမဲ့ ကိုယ်တစ်ယောက်တည်း ကျန်ခဲ့တဲ့အချိန်တွေမှာတော့ ရင်ထဲက ပင်ပန်းမှုတွေကို ဘယ်လိုဖုံးကွယ်ရမလဲတောင် မသိတော့ဘူး။ တစ်ခါတလေ ကိုယ်ဘာမှားခဲ့လို့ ဒီလောက်တောင် အဆင်မပြေရတာလဲလို့ ကိုယ့်ကိုယ်ကိုယ် ပြန်မေးမိတယ်။ သူများတွေလို အဆင်ပြေပြေနဲ့ ဘဝကို ဖြတ်သန်းချင်ရုံလေးပါ။ ကိုယ်ကြိုးစားသလောက် အရာရာ အဆင်ပြေလာဖို့ မျှော်လင့်ခဲ့မိတာပါ။ ဒါပေမဲ့ ဘာလို့ ကိုယ်ကြိုးစားနေရင်းနဲ့တောင် ပိုပိုပြီး ပင်ပန်းလာရတာလဲ။ ငွေရှာရတာလည်း ပင်ပန်းတယ်၊ ဘဝကို ရှေ့ဆက်ဖို့လည်း မလွယ်ဘူး။ ကိုယ်စိတ်ညစ်နေတဲ့အချိန်မှာတောင် ရပ်နားလို့မရဘူး။ မနက်ဖြန်အတွက် ဒီနေ့ အလုပ်လုပ်ရဦးမယ်။ ကိုယ်မပျော်နေလည်း ပြုံးပြရဦးမယ်။ ကိုယ်ငိုချင်နေလည်း ဘယ်သူမှမမြင်အောင် မျက်ရည်တွေကို သုတ်ပြီး ရှေ့ဆက်ရဦးမယ်။ အပင်ပန်းဆုံးက ကိုယ်ပင်ပန်းနေတာကို ဘယ်သူမှ သတိမထားမိတာပဲ။ ကိုယ်အဆင်ပြေနေတယ်လို့ ထင်နေကြတဲ့သူတွေကိုလည်း ကိုယ်ဘယ်လောက်တောင် ရုန်းကန်နေရလဲဆိုတာ ရှင်းပြဖို့ အားမရှိတော့ဘူး။ တကယ်ဆို ကိုယ်လည်း တစ်ခါတလေ ကလေးတစ်ယောက်လို ငိုချလိုက်ချင်တယ်။ ဘာမှစဉ်းစားစရာမလိုဘဲ ခဏလောက် နားနေချင်တယ်။ ဘဝကြီးကို အမြဲတမ်း အားတင်းပြီး ရင်ဆိုင်နေရတာတွေကို ခဏလောက်တော့ မေ့ထားချင်တယ်။ တကယ်ကို ပင်ပန်းနေပါပြီ ဘဝကို မုန်းလို့မဟုတ်ဘူး။ ဒီဘဝမှာ အဆင်ပြေဖို့အတွက် ကြိုးစားနေရတာတွေ များလွန်းလို့ပါ။ လူတွေကို စိတ်ကုန်လို့မဟုတ်ဘူး။ နားလည်ပေးမယ့်သူမရှိတဲ့အချိန်တွေမှာ ကိုယ့်စိတ်ကိုယ် ပြန်ဖြေသိမ့်နေရတာ ကြာလာလို့ပါ။ တစ်ခါလောက်တော့ ကိုယ်လည်း ဘာမှစိတ်ပူစရာမရှိဘဲ ပျော်ပျော်ရွှင်ရွှင် နေကြည့်ချင်တယ်။ အိပ်ရာဝင်တဲ့အခါ မနက်ဖြန်အတွက် စိတ်မပူချင်တော့ဘူး။ မျက်ရည်တွေနဲ့ အိပ်ပျော်ရတဲ့ညတွေထက် စိတ်အေးချမ်းစွာ အိပ်ပျော်ရတဲ့ညတွေကို ပိုင်ဆိုင်ချင်တယ်။ ကိုယ်လိုချင်တာတွေက အများကြီးမဟုတ်ပါဘူး။ စိတ်ပင်ပန်းမှုတွေ ခဏလောက်ကင်းဝေးချင်တယ်။ ကိုယ်ကြိုးစားနေတာတွေ တစ်နေ့နေ့မှာ အရာထင်လာတာကို မြင်ချင်တယ်။ ကိုယ်ချစ်တဲ့သူတွေအတွက်လည်း စိတ်ပူစရာနည်းတဲ့ဘဝမျိုး ပိုင်ဆိုင်ချင်တယ်။ အခုတော့ ကိုယ့်ကိုယ်ကိုယ်ပဲ ပြန်ပြောနေရတယ်။ တောင့်ခံထားပါဦး ဒီလောက်အထိတောင် ဖြတ်သန်းလာနိုင်ခဲ့တာပဲ။ နောက်ထပ်တစ်ရက်လောက်တော့ ကြိုးစားကြည့်ပါဦး။ တစ်နေ့နေ့မှာ ကိုယ်မျှော်လင့်ထားတဲ့ အေးချမ်းမှုလေးကို ရလာနိုင်ပါတယ် လို့ပေါ့။ ဒါပေမဲ့ တစ်ခါတလေတော့ အားတင်းထားရတာတောင် ပင်ပန်းလွန်းလှပါတယ်။ #စာသားcrd - @twin.kle386