@megdadahmed22: زي ما بتجينا نزلة في البرد ده والتهاب في الشتاء، وتطلع روحنا ويتكسر جسمنا، بالرغم من إننا عارفين بعد كم يوم ح تنتهي ونقوم بالسلامة.. لكن في نزلات كدا ما عندها علاج، لا بتخف بي الدواء، ولا بتنتهي بي مرور الأيام، بس بتتعب روحك وتضغط على قلبك وتخليك تعيش الوجع كل يوم. المشكلة إنو النزلة دي ما بتجيك في الشتاء بس، دي بتجيك كل يوم، وفي أي ساعة من النهار، ولو قدرت تتجاوزها بالنهار، بتجيك حمتها بالليل، وتفتح ليك دفاتر ذكريات إنت ذاتك كنت قافلها، وتفكرك بي وجع كنت عامل روحك نسيتو. اسمها نزلة الحنين.. أيوة، الشوق والحنين. حنين لحاجات قديمة فقدتها، حنين لنفسك السمحة الهادية ديك، قبل ما تعرف فلان داك، وقبل ما تدخل في حكايات غيّرت فيك حاجات كتيرة. حنين لزول قريب منك لكن حاسس إنو بعيد منك شديد، وحنين لزول موجود معاك لكن اتغيّر، وبقى ما زي الزول الإنت عرفتو وألفتو. حنين للتوازن الكنت عايش بيهو، للراحة الكانت في بالك، وللزول البهدلك بي حبو، وبرغم كل الحصل منك ومنو، لسه بتحن ليهو. حنين للزول داك الفات وخلاك ومشى، وبرغم إنك عارف إنو خلاص الحكاية انتهت، لسه قلبك بفتش ليهو في تفاصيل الأيام. وحنين لزول كان سمح وبقى بايخ، ما عشان بقى كعب، لكن يمكن الظروف غيّرتو، ويمكن الدنيا عملت فيهو العمايل، لدرجة إنك بتتمنى تقول ليهو: ياخ عليك الله أرجع زي زمان، والله اشتقنا ليك. حنين لعاداتك السمحة الكنت بتعملها وبطّلتها، لأيام المدرسة وناس المدرسة البريئين ديلك، للضحكة الكانت طالعة من قلبك من غير ما تحسب حساب لبكرة، ولأول يوم قابلت فيهو زول معين. حنين لأول حب في حياتك، لأول رسالة، لأول نظرة، وللحظات الكنت فيها مبسوط وحاسس إنك مالك الدنيا وما فيها. والغريبة إنك مرات بتحن حتى للحاجات التعبتك، وللأيام الكنت بتدعي ربنا تعدّي، ولناس كنت بتتمنى تبعد منهم، لكن لمن بعدوا اكتشفت إنك برضو بتفتقد وجودهم. يمكن عشان نحنا ما بنشتاق للحاجات ذاتها، بنشتاق للإحساس الكانت بتدينا ليهو، بنشتاق لونس كان بيريّحنا، ولضحكة كانت بتهوّن علينا، ولوجود زول كان بمجرد ما يظهر بتتغيّر نفسيتنا. والأغرب من دا كلو إنك مرات ما بتكون عارف مشتاق لشنو بالضبط، ولا عايز ترجع لمتين، ولا حتى عارف الزول الإنت مفتقدو منو. بس بتحس إنو في حاجة ناقصة، في فراغ كدا ما عندو اسم، وفي ذكريات كل ما تقول خلاص نسيتها، تلقاها راجعة ليك من جديد. والحنين يا جماعة ما شرط يكون معناه إنك عايز ترجع، ولا إنك ندمان على الفات، مرات إنت بس مشتاق لزمن كنت فيهو مرتاح، لنفسك قبل ما تتعب، ولناس قبل ما تتغير، ولأيام ما كنت عارف فيها إنو الحاجات السمحة ممكن تنتهي. عشان كدا ما كل زول اشتقت ليهو مفروض ترجع ليهو، وما كل مكان حنيت ليهو مفروض تمشي ليهو تاني. في حاجات مكانها الذكريات، وفي ناس أحسن ليهم يفضلوا في الماضي، وفي إحساس مهما حاولت تلقى ليهو علاج، بتكتشف إنو الزمن ذاتو ما بقدر يرجعو. بس أها... دي نزلة الحنين، تجيك فجأة، تقلب ليك المواجع، وتخليك تشتاق لحاجات إنت ذاتك ما كنت عارف إنك لسه فاكرها. والله الحنين ده مرض غريب.. مرات ما بتكون داير حاجة، غير إنك ترجع دقيقة واحدة بس، تعيش إحساس قديم، وتقول لنفسك: يا سلام، كانت أيام سمحة والله! مقــ⁷ــداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕❤📝
واسي انت رجعت لينا نزلت الحنين دي نطلع منها كيف اسي يااااااه زكرياااااات زكرياااااات
بتمني بجد ارجع لنفسي جداً فاقده فيها كل شي بجد بتعيش احسااااس
اشتقت ليها شديد وكانت ايااام لاتتعوض
والحنين لشخص غااالي جداً أبعدته الظروف والحياه.. 💔
كيف الرجوع... 💔 @المقداد // Megdad
2026-11-09 18:53:46
1
ben Omer :
🥰🥰🥰
2026-11-11 16:40:58
1
ABDAL MOHYMEN :
🥰🥰🥰
2026-11-15 13:21:18
1
👌👌Amouri 👌👌 :
🥰🥰🥰
2026-11-13 09:37:17
1
Asaadstudio :
[تسجيل الإعجاب]
2026-11-09 17:57:12
1
👑 ترســـــك ❤abu wajouna 👑 :
💕💕💕
2026-11-09 18:24:21
1
ngama :
🥰🥰
2026-11-10 00:28:34
0
To see more videos from user @megdadahmed22, please go to the Tikwm
homepage.