"မိတ်" တွေထွက်ပြီး အရမ်း ယားနေပါသလား? မင်္ဂလာပါခင်ဗျာ…. ဒေါက်တာရဲ ဖြစ်ပါတယ်။ ရာသီဥတုက ပူအိုက်စွတ်စိုလာတာနဲ့အမျှ ကလေးတွေရော လူကြီးတွေမှာပါ ကျောကုန်း၊ ရင်ဘတ်နဲ့ လည်ပင်းတွေမှာ နီရဲပြီး ယားယံတဲ့ "မိတ်ဖု" လေးတွေ အများကြီး ထွက်လာတတ်ပါတယ်။ တချို့ဆို ယားလွန်းလို့ ညဘက်တောင် ကောင်းကောင်း မအိပ်ကြရပါဘူး။ ဒါကြောင့် "မိတ်" ဘာကြောင့်ထွက်ရသလဲဆိုတာနဲ့ အမြန်ဆုံး သက်သာအောင် ဘယ်လို သဘာဝနည်းလမ်းတွေ၊ ဘယ်လို လိမ်းဆေးတွေ သုံးရမလဲဆိုတာကို ပြောပြပေးချင်ပါတယ်။ 🛑 မိတ် ဘာကြောင့် ထွက်ရတာလဲ? အဓိက တရားခံကတော့ "ချွေးပေါက်တွေ ပိတ်သွားလို့" ပါပဲ။ ရာသီဥတု အရမ်းပူလို့ ချွေးတွေ အများကြီးထွက်တဲ့အခါ လေဝင်လေထွက်မကောင်းတဲ့ အဝတ်အစားတွေ ကြောင့်ဖြစ်စေ၊ ချွေးပေါက်ကို ပိတ်စေတဲ့ အဆီတွေ လိမ်းထားလို့ဖြစ်စေ ချွေးတွေက အပြင်ကို မထွက်နိုင်တော့ဘဲ အရေပြားအောက်မှာ ပိတ်မိသွားပါတယ်။ အဲဒီ ပိတ်မိနေတဲ့ ချွေးတွေက အရေပြားကို ရောင်ရမ်းစေပြီး နီရဲတဲ့ မိတ်ဖုလေးတွေနဲ့ အလွန်အမင်း ယားယံမှုကို ဖြစ်စေတာပါ။ ✅ သဘာဝအတိုင်း သက်သာအောင် ဘယ်လိုလုပ်ရမလဲ? ၁။ ရေအေးအေးနဲ့ ချိုးပါ: ရေခဲရေ မဟုတ်ဘဲ ရိုးရိုးရေအေးအေးလေးနဲ့ တနေ့ (၂) ကြိမ် ရေချိုးပေးတာက အရေပြား အပူချိန်ကို ကျစေပြီး ချွေးပေါက်တွေကို ပွင့်စေပါတယ်။ ၂။ ချည်သားပွပွ ဝတ်ဆင်ပါ: ချွေးစုပ်လွယ်ပြီး လေဝင်လေထွက်ကောင်းတဲ့ ချည်သား (Cotton) အင်္ကျီ ပွပွချောင်ချောင်လေးတွေကိုသာ ဝတ်ဆင်ပါ။ ၃။ အေးမြတဲ့ နေရာမှာ နေပါ: ပန်ကာ သို့မဟုတ် အဲယားကွန်း ရှိတဲ့နေရာမှာ နေပါ။ ယားယံနေတဲ့ နေရာတွေကို ရေခဲဝတ်လေး (၁၀) မိနစ်ခန့် ကပ်ပေးတာ၊ ရှားစောင်းလက်ပတ် (Aloe Vera gel) အေးအေးလေး လိမ်းပေးတာကလည်း ယားယံခြင်းကို အမြန်သက်သာစေပါတယ်။ ✅ ဘယ်လို ဆေးဝါးတွေ သုံးလို့ရလဲ? မိတ်က များသောအားဖြင့် အရေပြားအေးသွားရင် ရက်အနည်းငယ်အတွင်း သူ့အလိုလို ပျောက်သွားတတ်ပါတယ်။ ဒါပေမယ့် အရမ်းယားယံနေရင် ဒီဆေးတွေ သုံးနိုင်ပါတယ်။ ၁။ Calamine Lotion (ကာလာမင်း လိုးရှင်း): မိတ်ထွက်တဲ့ နေရာတွေကို သန့်ရှင်းအောင်လုပ်ပြီး Calamine lotion လေး လိမ်းပေးတာက အရေပြားကို အေးမြစေပြီး ယားယံတာကို သက်သာစေပါတယ်။ ၂။ ယားယံသက်သာစေသော သောက်ဆေးများ: ညဘက် ယားလွန်းလို့ အိပ်မရဘူးဆိုရင် ဆရာဝန်ညွှန်ကြားချက်နဲ့ Cetirizine ၊Levocetrizine လိုမျိုး (Antihistamines) ဆေးတွေ သောက်သုံးနိုင်ပါတယ်။ ၃။ အရမ်းရောင်ရမ်းပြီး နီရဲနေလျှင် ဆရာဝန်ညွှန်ကြားချက်နဲ့ Hydrocortisone 1% လို စတီးရွိုက် လိမ်းဆေး အပျော့စားကို ၂ ရက်၊ ၃ ရက်ခန့် သုံးနိုင်ပါတယ်။ (မိမိသဘောဖြင့် မလိမ်းရပါ) ⚠️ သတိပေးချက် မိတ်ဖုတွေကို ပေါင်ဒါမှုန့်တွေ၊ အဆီများတဲ့ လိမ်းဆေးတွေ မလိမ်းသင့်ပါဘူး။ ချွေးပေါက်တွေကို ပိုပိတ်စေပြီး မိတ် ပိုဆိုးသွားတတ်ပါတယ်။ ယားလို့ဆိုပြီးလည်း အရမ်းမကုတ်သင့်ပါဘူး၊ လက်သည်းထဲက ဘက်တီးရီးယားပိုးတွေကြောင့် မိတ်ဖုတွေကို ပိုးဝင်စေတတ်ပါတယ်။ မိတ်ဖုတွေက မသက်သာဘူး၊ ပိုများလာတယ်၊ ပြည်တည်လာတယ်၊ ကိုယ်ပူလာတယ်၊ ဖျားလာတယ်ဆိုရင်တော့ နီးစပ်ရာဆရာဝန်နဲ့ ပြသဖို့လိုအပ်ပါတယ်။ ကိုယ့်အိမ်မှာ မိတ်တွေထွက်ပြီး ယားယံနေတဲ့ ကလေးတွေနဲ့ မိသားစုဝင်တွေ အမြန်ဆုံး သက်သာသွားအောင် ဒီ Post လေးကို အခုပဲ Share ပြီး မျှဝေပေးလိုက်ပါဦးခင်ဗျာ။ အားလုံးပဲ ကျန်းမာကြပါစေ ဒေါက်တာရဲ #DrYe #ဒေါက်တာရဲ #မူရင်းရေးသားသူဒေါက်တာရဲအားcrdပေးပါတယ် - @subulay30