السلام عليكم انا زياد سعد من محافظة سوهاج عندي ٢٣ سنه بدرس في كلية علوم حاسب جامعه النهضه ببني سويف هو إحنا مستنيين كام حادث قطار تاني علشان نقتنع إن أرواح الناس مش مجال للتجارب والاستهتار؟! المؤلم في حادث قطاري العياط مش بس عدد الضحايا والمصابين، المؤلم إن جزءًا كبيرًا من الكوارث دي كان ممكن نتجنبها لو فيه تفكير استباقي حقيقي، بدل ما نتحرك بعد ما الناس تموت. من فترة اشتغلت على مشروع متكامل لحصر مشكلات السكك الحديدية وأسباب حوادث القطارات، وقدمت من خلاله حلولًا تقنية، مش مجرد أفكار على ورق، بل دعمت المشروع بتجربة واقعية لإثبات إمكانية تطبيق الحلول وقدمت بيه طلب لحصول علي براءة اختراع لسنه ٢٠٢٢/٢٠٢١ وشاركت بيه وقتها في مسابقات كتيرة واتعرض علي جهات كتير وكان شريك معايا ف المشروع وقتها صديقي د محمد علاء وكان المشروع بيشمل: 1️⃣ نظام استشعار المسافات بين القطارات: مستشعرات في كابينة القيادة تراقب المسافة بين القطار وأقرب قطار أمامه، ومع وجود خطر تصادم يتدخل النظام تلقائيًا لإيقاف القطار قبل الوصول إليه بمسافة أمان. 2️⃣ نظام مراقبة الحالة الصحية للسائق: مستشعرات لمتابعة الحالة الصحية واليقظة للسائق، ورصد الحالات التي قد تؤثر على قدرته على القيادة، مع إرسال إنذار والتدخل عند الضرورة. 3️⃣ نظام الفحص الذكي لخطوط السكك الحديدية: مستشعرات تكشف أي تلف أو خلل في القضبان، وتحدد مدى صلاحية السكة لمرور القطارات، وترسل تحذيرًا قبل وقوع الكارثة. 4️⃣ نظام سينافورات إلكترونية ذكية: تعمل على إغلاق المزلقانات تلقائيًا عند اقتراب القطار، مع رصد وجود أشخاص أو سيارات عالقة على القضبان وإرسال إنذار فوري للقطار القادم لاتخاذ إجراء وقائي. 5️⃣ منظومة مراقبة مركزية متصلة بسيرفر خاص: تربط جميع القطارات بغرفة تحكم مركزية لمتابعة حالتها التشغيلية، ورصد الأعطال والمخاطر وإرسال التنبيهات الفورية لاتخاذ الإجراءات اللازمة. والأغرب من كل ده؟ لما عرضت المشروع، كان رد كل اللي اتعرض عليهم المشروع وقتها إن الأنظمة دي تمت إضافتها بالفعل! 😂 طيب يا جماعة، لو الأنظمة دي موجودة واتضافت بالفعل، إيه اللي بيحصل؟ وليه بنفضل نشوف كوارث كان المفروض إن التكنولوجيا دي وُجدت أساسًا لمنعها؟ أنا مش بكتب الكلام ده علشان أقول أنا كنت صح أو أعمل دعاية لنفسي على حساب أرواح الضحايا. أنا بكتبه لأن عندي غضب حقيقي من ثقافة الاستهانة بالأفكار، ومن التعامل مع المخترعين والشباب أصحاب الحلول وكأنهم بيقدموا رفاهية مش حلول لمشكلات بتمس حياة ملايين المواطنين. مش عايزين نسمع بيانات بعد الحوادث، ولا لجان تتشكل بعد فوات الأوان، ولا وعود بتطوير المنظومة كل مرة. عايزين نظام يمنع الحادث قبل وقوعه، ومحاسبة حقيقية للمقصر، وتطبيق فعلي للتكنولوجيا، مش مجرد وجودها في التقارير والتصريحات. أرواح الناس مش حقل تجارب، وسلامة المواطنين مش رفاهية، والاختراع اللي ممكن ينقذ حياة إنسان يستحق إنه يتسمع ويتدرس ويتطبق، مش يتحط في درج! رحم الله ضحايا حادث العياط، وشفى المصابين، وحفظ كل مسافر وأهله من وجع الفقد. #سلامة_السكك_الحديدية #الابتكار_مش_رفاهية #حوادث_القطارات #nub - @dr_ziad03