إزاي نعمل كيكة رواني ناجحة؟✅ #وصفات_وجدي #كيكة_رواني #كيك بتعملوها بالطريقة دي؟ مقادير وطريقة عمل كيكة الرواني ❤️ أولًا: المقادير * 6 بيضات متوسطة الحجم بدرجة حرارة الغرفة. * 1 كوب سكر (200 جرام)، وممكن تزودوه لكوب ونص (300 جرام) حسب الرغبة. * 1 كوب زيت نباتي جيد الجودة (240 مل). * 2 كوب دقيق متعدد الاستخدامات أو دقيق كيك (حوالي 250 جرام)، ويفضل دقيق الكيك. * 1 كوب سميد سادة، اللي هو دقيق البسبوسة من غير أي إضافات (حوالي 160–170 جرام). * 3 علب زبادي صغيرة (حوالي 350 جرام). * 1 كيس كيك شيف (23 جرام). * فانيليا بودر أو سائلة حسب الرغبة. * رشة ملح. * ¼ كوب جوز هند مطحون (حوالي 20 جرام) اختياري، وممكن تزودوه لنص كوب. ملاحظات على المقادير: * لو هتضيفوا جوز هند، يفضل تزودوا الزبادي لـ400 جرام. * ممكن تستبدلوا الزبادي بحوالي 300 مل لبن كامل الدسم، بس القوام والنتيجة ممكن يختلفوا شوية. * يفضل تستخدموا كيس كيك شيف بنفس الوزن المذكور، ولو هتستخدموا بيكنج بودر عادي لازم تراعوا اختلاف التركيبة. * كل المقادير بالكوب المعياري سعة 240 مل. ثانيًا: طريقة التحضير 1. هنحط البيض والسكر والفانيليا في العجان أو بالمضرب الكهربائي، ونضربهم كويس جدًا لغاية لما الخليط يفتح لونه ويبقى فومي وهش. 2. أثناء الخفق هننزل بكوب الزيت تدريجيًا، ونكمل ضرب لغاية لما يمتزج مع الخليط. 3. نوقف العجان ونضيف الزبادي ونقلب لغاية لما يتجانس مع الخليط. 4. في طبق منفصل ننخل الدقيق كويس جدًا، ونضيف عليه السميد ورشة الملح وكيك شيف وجوز الهند لو هنستخدمه. 5. نضيف المكونات الجافة على خليط البيض بالتدريج، ونقلب بهدوء من تحت لفوق عشان نحافظ على الهوا اللي دخلناه أثناء الخفق. هنفضل نقلب لغاية لما الدقيق يختفي تمامًا، والقوام هيكون تقيل نسبيًا وده طبيعي. 6. ندهن صينية مقاس 30×30 سم بالسمنة كويس جدًا، ونصب الخليط ونوزعه بالتساوي، ونخبط الصينية خبطات خفيفة عشان نطلع فقاقيع الهوا الكبيرة. 7. ندخل الصينية فرن مسخن مسبقًا على 180 درجة مئوية، بحرارة من تحت فقط، لمدة حوالي 40 دقيقة. 8. في الآخر ممكن نشغل الحرارة من فوق لمدة 3–4 دقايق عشان الوش ياخد لون حلو. وقبل ما نطلعها لازم نختبرها بخلة أسنان، وتطلع نظيفة أو عليها فتافيت بسيطة من غير عجين سائل. ثالثًا: الشربات (الشيرة) المقادير اللي استخدمتها: * 1½ كوب سكر (300 جرام). * 1½ كوب مياه (360 مل). * 2–3 شرائح ليمون. وممكن تضيفوا فانيليا أو قرفة أو قرنفل حسب النكهة اللي بتحبوها. وممكن تستخدموا كمية صغيرة جدًا من ملح الليمون بدل شرائح الليمون. الطريقة: أول ما ندخل الكيكة الفرن هنبدأ نجهز الشربات. هنحط السكر والمياه وشرائح الليمون على النار، ولما يبدأوا يغلوا نوطي النار ونسيبهم حوالي 7 دقايق، وبعد كده نطفي ونسيبه يبرد. الليمون بيساعد على تقليل تبلور السكر، ومش محتاجين نقلب الشربات باستمرار بعد ما يبدأ يغلي. مهم جدًا: أول ما الكيكة تطلع من الفرن وهي لسه سخنة، هنصب عليها الشربات اللي برد نسبيًا، ونوزعه بالتساوي عشان تتشرب كويس. بالنسبة لكمية الشربات: أنا استخدمت كوب ونص سكر وكوب ونص مياه عشان بحب السكر هادي. لكن ممكن تعملوه بكوبين سكر وكوبين مياه، أو حتى 3 أكواب من كل واحد حسب كمية الشربات اللي عايزينها ودرجة التشريب اللي بتحبوها. مش لازم تستخدموا الكمية كلها؛ ضيفوها بالتدريج حسب تشرب الكيكة. وبالهنا والشفا ❤️ - @wagdiaboellil