مرحوم طلا محمد خان المعروف طلا بدمعاش یا طلا خان، جرات، غیرت اور بہادری کا روشن نشان، ضلع مردان کے نواحی علاقے جلالہ پارخو سے تعلق رکھتے تھے، جو اپنی غریب پروری اور دیدہ دلیری کی وجہ سے مشہور تھے۔ ان کی بہادری کے قصے پورے صوبے میں مشہور تھے۔ لوگ کہتے تھے کہ جب ان کا نام سنا جاتا تو بڑے بڑوں کی ٹانگیں کانپنے لگتی تھیں۔ یہ خوف کسی ظلم سے نہیں بلکہ ان کے کردار کے رعب سے پیدا ہوتا تھا۔ وہ نڈر تھے مگر ان کی یہ دیدہ دلیری بے مقصد نہیں تھی؛ ان کی طاقت ہمیشہ حق اور کمزور کے ساتھ کھڑی رہی۔ وہ جب بھی کسی علاقے سے گزرتے تو ماحول بدل جاتا، لوگ کہتے کہ دیکھو "طلا خان آ گیا ہے"۔ نظریں احترام سے ان کی طرف اٹھتیں، لوگ سلام کے لیے ہاتھ آگے بڑھاتے اور نوجوان انہیں دیکھ کر فخر محسوس کرتے۔ طلا خان غریبوں کے ہمدرد تھے۔ اگر علاقے میں کوئی کسی غریب پر ظلم کرتا اور وہ اپنی فریاد طلا خان کو کرتا تو وہ اس کی مدد کرتے اور ساتھ ہی ساتھ اس ظالم کو کڑی سزا بھی دیتے تھے تاکہ آئندہ کوئی کسی پر ظلم کرنے کی جرأت نہ کر سکے۔ ایک واقعہ بھی مشہور ہے کہ ایک دن ایک بڑھیا نے طلا خان سے شکایت کی کہ اس کے جانور چوری ہو گئے ہیں۔ طلا خان نے وہ جانور برآمد کروائے اور چور کو بھی سزا دی۔ اسی طرح جمعے کے دن مسجد کے سامنے غریبوں پر ظلم کرنے والوں کو طلا خان پکڑتا اور ان کا سر منڈوا دیتا تھا۔ اس لیے طلا خان کو رابن ہڈ بھی کہا جاتا تھا۔ ان کی زندگی کے اور بھی بہت سے واقعات مشہور ہیں۔ ان کا اثر و رسوخ اتنا تھا کہ ان کے ایک خط پر پوری تحصیل کے سکول بند ہو جایا کرتے تھے۔ وہ جب بھی علاقے میں نکلتے تو ان کے پیچھے 40، 50 مسلح افراد چلتے۔ علاقے میں ان کا بڑا رعب اور دبدبہ تھا۔ طلا خان کی وفات 19 اگست 1994 کو ہوئی، لیکن آج بھی علاقے کے لوگ ان کی بہادری کے قصے ایک دوسرے کو سناتے ہیں۔ اللہ ان کی بخشش فرمائے۔ #tilabadmash #viralvideo #repost - @jalalaking94