#म जापानमा आफ्नो भविष्य खोज्दै हिँडेकी थिएँ। धेरै सपना बोकेर जापान पुगेकी म एक महिना पनि नपुग्दै आफ्नो ज्यान जोगाएर फर्किन बाध्य भएँ। तर आज संसारले गलत मलाई नै देखिरहेको छ। मेरो वास्तविक पीडा, मैले भोगेको यातना र म किन जापानबाट फर्किन बाध्य भएँ भन्ने कुरा कसैले बुझ्ने प्रयास गरेन। मलाई मार्छु भन्दै पटक–पटक धम्की दिइयो। जापान गएको पाँच दिनदेखि नै तेरो बुबासँग पैसा माग, माइतीबाट पैसा मगाऊ भन्दै दबाब दिइयो। मेरो माइतीबाट पठाइएको पैसाको प्रमाण र स्टेटमेन्टसमेत मेरो बाबासँग सुरक्षित छ। मैले पटक–पटक मानसिक यातना सहेँ। मान्छेको मुखबाट खान बनाएको हो कि दिसा गर्न मात्रै बनाएको हो जस्ता अपमानजनक शब्दहरू सुन्नुपर्‍यो। शारीरिक दुर्व्यवहारसमेत भएपछि अब म यो व्यक्तिसँग जीवन बिताउन सक्दिनँ भन्ने निर्णय गरेर आफ्नो ज्यान जोगाउन अगाडि बढेकी हुँ। तर आज मलाई नै विभिन्न आरोप लगाएर गलत साबित गर्न खोजिँदै छ। दिदीबहिनीहरू, तपाईंहरूको पनि कुनै दिन यस्तो अवस्था नआउला भन्न सकिँदैन। एउटा नारीले अर्को नारीलाई दिनुपर्ने साथ, सहानुभूति र न्याय तपाईंहरूबाटै नपाएपछि म चुप बस्न बाध्य भएकी हुँ। मैले आफ्नो सुनसमेत जापान गएको दिन नै फिर्ता गरेकी थिएँ। म पनि त एउटा सपना बोकेर गएकी थिएँ। आफ्ना दुःख गरेर कमाउने आमाबुबालाई खुसी बनाउँला, हामी पनि खुसीसाथ जीवन बिताउँला भन्ने आशा थियो। तर त्यहाँ पुगेपछि तैँले कमाएको एक रुपैयाँ पनि घरमा पठाउन पाउँदैनस्, सबै पैसा मेरो हो भन्दै मलाई निरन्तर मानसिक यातना दिइयो। मैले कहिल्यै आफूलाई क्यान्सर लागेको भनेर भनेकी थिइनँ। तर मलाई तँजस्ती क्यान्सर लागेको आइमाईलाई झुन्ड्याएर मार्छु, म पनि मर्छु, तँलाई मसँग राख्दिनँ जस्ता अत्यन्तै डरलाग्दा धम्कीहरू दिइयो। अन्ततः मलाई २५ लाख रुपैयाँ तिर अनि जा भनियो। मसँग त्यति ठूलो रकम थिएन, म तिर्न सक्दिनँ भनेपछि आफ्नो ज्यान र आत्मसम्मान जोगाउन म आफैँ फर्किएकी हुँ। आज मेरो बदनाम गर्न र मलाई गलत साबित गर्न कुनै कसर बाँकी राखिएको छैन। तर सत्यलाई सधैँ झुटले छोप्न सकिँदैन। आज कसैले मेरो पीडा नबुझे पनि कुनै दिन सत्य अवश्य बाहिर आउनेछ। मलाई गलत देखाउनेहरूलाई यति मात्रै भन्न चाहन्छु—समय सधैँ एउटै हुँदैन। आज तपाईंहरूको कुरा सुनिएला, तर भोलि मेरो सत्य पनि सुनिने दिन आउनेछ। मेरो मौनतालाई कमजोरी नसम्झनुहोला। म चुप बसेकी हुँ, किनकि म झगडा होइन, न्याय चाहन्छु। - @kamana.bhattarai87