@cimilotv: Afhayeenka Madaxweynaha Jamhuuriyadda Somaliland Mudane Xuseen Aadan Cige Deyr ayaa Mahadnaq ballaadhan u diray Senator Ted Cruz oo ka tirsan Aqalka Senate-ka Maraykanka, isagoo ku Bogaadiyey Taageerada joogtada ah ee uu la garab taagan yahay Qadiyadda qaranimada Somaliland. Afhayeenku wuxuu tilmaamay in Senator Cruz uu si geesinimo leh u difaaco qadiyadda Somaliland iyo sidii ay u heli lahayd maqaamkeeda rasmiga ah ee beesha caalamka. Afhayeenka Madaxweynaha Somaliland ayaa qoraal uu ku baahiyey bartiisa xidhiidhka bulshada ee X oo Wakaaladda Solna soo xigatay ku sheegay in isaga oo ku hadlaya magaca Xukuumadda iyo shacabka Jamhuuriyadda Somaliland uu Senator Ted Cruz uga mahadnaqayo doorka muuqda ee uu ka qaato u doodista xaqa Somaliland u leedahay inay ka mid noqoto dalalka caalamka. Xuseen Aadan Cige Deyr waxa uu xusay in codka xooggan ee hiilka u ah ummada Somaliland ee Senator Ted Cruz ku soo bandhigo fadhiyada Aqalka Senate-ka, iyo dedaalada wax ku oolka ah ee uu ka wado magaalada Washington uu ku kasbaday quluubta shacabka Somaliland meel kasta oo ay joogaan. Afhayeenku waxa kale oo uu sheegay in taariikhdu ay xusto shakhsiyaadka ku dhiirrada difaaca xaqa iyo caddaaladda, isla markaana ku adkaysta mabda’ooda, isagoo intaas ku daray in taageerada iyo saaxiibtinimada Senator Ted Cruz ee Somaliland ay ka mid noqon doonto dhacdooyinka raadka ku yeelan doona taariikhda Somaliland. Ugu dambayn Afhayeenka Madaxweynaha ayaa mar kale muujiyey mahadnaqa iyo qaddarinta weyn ee ay Xukuumadda iyo shacabka Somaliland u hayaan Senator Ted Cruz. Nagu_Soo_Biir Shabakada Cimilonews
