सन् १९६० मा वैज्ञानिकहरूले गरेको एउटा अनौठो भविष्यवाणी अहिले फेरि चर्चामा आएको छ। उनीहरूले सन् २०२६ नोभेम्बर १३ शुक्रबारका दिन अत्यधिक जनसंख्या वृद्धिका कारण मानव सभ्यता विनाशको नजिक पुग्न सक्ने अनुमान गरेका थिए। उक्त भविष्यवाणी गरिएको मिति आउन अब जम्मा दुई दिन बाँकी रहेकाले धेरैको ध्यान यसतर्फ खिचिएको छ। अस्ट्रियाली मूलका वैज्ञानिक हाइन्ज भोन फोर्स्टर र उनका दुई विद्यार्थी प्याट्रिसिया मोरा तथा लरेन्स एमियोटले सन् १९६० मा विश्वकै प्रतिष्ठित वैज्ञानिक पत्रिका ‘साइन्स’ मा प्रकाशित अनुसन्धानमार्फत यस्तो अनुमान गरेका थिए। उनीहरूले विगत दुई हजार वर्षको जनसंख्या वृद्धिको तथ्यांक अध्ययन गर्दै मानिसको संख्या असामान्य गतिमा बढिरहेको निष्कर्ष निकालेका थिए। उनीहरूको गणितीय प्रक्षेपणअनुसार सन् २०२६ नोभेम्बर १३ सम्म पुग्दा पृथ्वीको जनसंख्या अनियन्त्रित रूपमा बढेर मानिसहरू भोकमरीले नभई एकअर्काको अत्यधिक चापका कारण मर्नुपर्ने अवस्था आउन सक्थ्यो। उनीहरूले यसलाई मानव सभ्यताका लागि सम्भावित विनाशकारी अवस्थाका रूपमा चित्रण गरेका थिए। तर अहिलेको वास्तविकताले भने उक्त भविष्यवाणी गलत साबित हुने देखाएको छ। सन् १९९० को दशकदेखि विश्वको जनसंख्या वृद्धिदर उनीहरूले अनुमान गरेअनुसार बढ्न छाड्यो। जन्मदर घट्दै गएपछि वैज्ञानिकहरूको गणितीय प्रक्षेपण र वास्तविक अवस्थाबीच ठूलो अन्तर देखियो। आज विश्वको जन्मदर सन् १९६० को तुलनामा आधाभन्दा पनि कम छ। त्यसैले नोभेम्बर १३ मा पृथ्वी ध्वस्त हुने वा मानव सभ्यता समाप्त हुने कुनै वैज्ञानिक प्रमाण छैन। वास्तवमा यो भविष्यवाणी पृथ्वी विनाशको निश्चित मिति नभई जनसंख्या वृद्धिबारे गरिएको एउटा पुरानो गणितीय अनुमान थियो। तर ६६ वर्षअघि गरिएको भविष्यवाणीको मिति नजिकिँदै गर्दा यसले फेरि विश्वभर चासो बढाएको छ। #Doomsday #November132026 #PopulationGrowth #Science #WorldNews - @bhuntu100