@ks22631: Қазақстандық боксшы Марал Төлепберген жасөспірімдер Олимпиадасының жартылай финалына шықты Бокстан Қазақстан құрамасының өкілі Марал Төлепберген Сенегалдың Дакар қаласында өтіп жатқан жазғы жасөспірімдер Олимпиадасында жүлде үшін күресті жалғастыруда. 54 келіге дейінгі салмақ дәрежесінде өткен ширек финалдық кездесуде қазақстандық спортшы Мысыр өкілі Хаджер Эльшербини Вахбамен кездесті. Үш раундтың қорытындысы бойынша Марал қарсыласын 5:0 есебімен айқын басымдықпен жеңіп, жартылай финалға жолдама алды. Осылайша, бокстан Олимпиада турнирінің жартылай финалына Қазақстан атынан үш спортшы шықты. Бұған дейін бұл кезеңге Ақнұр Тұрсынғали (57 келіге дейін) мен Бибарыс Аширбай (70 келіге дейін) өткен болатын. Үш спортшы да кемінде қола жүлдені қамтамасыз етіп, енді финалға шығу үшін бақ сынайды. Жас қазақстандық спортшылардың бұл жетістігі – табандылықтың, мақсатқа ұмтылыстың және тынымсыз еңбектің нәтижесі. Боксшыларымызға алдағы жекпе-жектерде сәттілік пен жеңіс тілейміз! Дереккөз: Kazinform
