@politico.kz: ҚТЖ мен «Самұрық-Қазына» басшылары ұсталғаны хабарланды Астанада «Қазақстан темір жолы» ұлттық компаниясының басқарма төрағасы Елжас Отыншиев пен «Самұрық-Қазына» қорының басшысы Нұрлан Жақыповтың ұсталғаны жайлы ақпарат тарауда, деп хабарлайды Politico.kz. Centralmedia24.kz басылымы анонимді Telegram-арнадан алынған ақпаратқа сүйеніп, Елжас Отыншиевті Ұлттық қауіпсіздік комитетінің (ҰҚК) Сыбайлас жемқорлыққа қарсы іс-қимыл қызметкерлері ұстағанын жазды. Дереккөздің мәліметінше, Отыншиев Астанадағы «Танжир» лаунж-барында қылмыс үстінде ұсталған. 100Baksov парақшасы да Елжас Отыншиев пен Нұрлан Жақыповтың ұсталғанын хабарлады. Бейнежазбамен бірге жарияланған хабарламада екі басшының да уақытша ұстау изоляторына қамалғаны айтылған. Сондай-ақ жазбада Қылмыстық кодексінің 24-бабының 3-бөлігі (қылмысқа оқталу) және 366-бабының 4-бөлігі (аса ауыр мән-жайларда пара алу) көрсетілген. Осы ақпарат тараған тұста әлеуметтік желілерде Астанадағы «Атлант» тұрғын үй кешенінің маңында түсірілген бейнежазба пайда болды. Онда белгісіз адамдардың ғимарат терезесінен ақша толы чемоданды лақтырғаны айтылады. Жерде шашылған банкноттар АҚШ долларына ұқсайды. Ақшаның жанында арнайы киім киген адамдар тұрғанын көруге болады. Politico.kz ақпараттың рас-өтірігін анықтау үшін ҚТЖ мен ҰҚК-ге сауал жолдады. Әзірге екі басшының ұсталғаны туралы мәлімет ресми расталған жоқ.
