@toplumtv: Qafqaz Müsəlmanları İdarəsi və Dini Qurumlarla İş üzrə Dövlət Komitəsi (DQİDK) Yerevandakı Göy məsciddə keçirilən mərasimi və məscidin mərasim zalına erməni şairi Yeğişe Çarentsin adının verilməsini pisləyib. Hər iki qurum noyabrın 11-də bununla bağlı bəyanat yayıb. Qafqaz Müsəlmanları İdarəsi baş verənləri “aşkar vandalizm təzahürü və təxribat” adlandırıb. Noyabrın 9-da İranın Ermənistandakı səfirliyinin Mədəniyyət Mərkəzi Yerevandakı Göy məsciddə tədbir təşkil edib. Tədbirdə fars şairi Firdovsinin “Şahnamə” dastanının erməni dilinə tərcüməsi təqdim olunub. Həmçinin məscidin mərasim zalına erməni şairi Yeğişe Çarentsin adı verilib və onun büstünün qoyulacağı bildirilib. Mərasimdə İranın vitse-prezidenti Həmid Purməhəmmədi də iştirak edib. Qafqaz Müsəlmanları İdarəsi Ermənistan hökumətini oxşar tədbirlərin qarşısını almağa çağırıb. Qurum hesab edir ki, mərasim İslam ənənələrini pozub və məscidin tarixi irsini təhrif edib. “Mədəni xalqlar hər hansı kitab təqdimatını başqa dinə mənsub ibadət məkanında deyil, öz mədəniyyət ocaqlarında keçirirlər. Mədəni tədbir adı altında məsciddə şou düzənləmək heç kəsə başucalığı gətirə bilməz”, - bəyanatda deyilir. İdarə bildirib ki, belə hallar Azərbaycanla Ermənistan arasındakı sülh prosesini şübhə altına alır və revanşist qüvvələrin maraqlarına xidmət edir. DQİDK isə vurğulayıb ki, Göy məscid XVIII əsrdə İrəvan xanlığı dövründə, Hüseynəli xanın hakimiyyəti illərində inşa edilmiş Azərbaycan memarlığı və dini irsinin mühüm nümunəsidir. Abidə tarixdə “Göy məscid”, “Göy cami” və “Hüseynəli xan məscidi” adları ilə tanınıb. “İstənilən mədəni irs nümunəsinin hansısa ölkənin vəsaiti hesabına bərpası onun həmin ölkəyə məxsusluğunu iddia etmək üçün əsas sayılmır. Göy məscidin tarixi kimliyi onun inşa edildiyi dövr, İrəvan xanlığı və şəhərin Azərbaycan mədəni irsi ilə bağlılığı əsasında qiymətləndirilməlidir. Abidənin “fars məscidi” kimi təqdim olunması, adının və tarixi kontekstinin dəyişdirilməsi cəhdləri elmi-tarixi yanaşmaya deyil, siyasi məqsədlərə xidmət edir”, - qurumun bəyanatında qeyd olunub. Ermənistan hakimiyyəti ittihamlara hələlik münasibət bildirməyib.

Toplum TV

Open In TikTok:

Region: AZ

Thursday 12 November 2026 09:55:37 GMT