#أول مرتب استلمته وأنا عندي ٢٣ سنة، أبويا قالّي: «كل شهر تحوّل لي ١٠٠ جنيه». قلت له: «ليه يا بابا؟» قال: «حق التربية». ضحكت، بس هو ما ضحكش. ومن يومها، كل يوم ٢٧، أول ما المرتب ينزل، أحوّل له الـ١٠٠ جنيه، وأكتب في الملاحظة: «حق التربية». ويرد عليا كل مرة: «وصل.. ربنا يرزقك». ولا يزيد كلمة. حوّلت له وأنا لسه أعزب. وحوّلت له في شهر جوازي، والدنيا مقلوبة عليا والديون فوق دماغي. وحوّلت له الشهر اللي ابني اتولد فيه، وماكانش فاضل في حسابي غير ١٤٠ جنيه. مراتي كانت بتقول لي: «أبوك متقاعد وعنده بيته.. عايز الـ١٠٠ جنيه ليه؟» وصحابي كانوا بيقولوا: «أبوك حاطط عليك ضريبة ولا إيه؟» وأقول لهم: «أبويا كده.. دي طبيعته». مرة اتأخرت عليه يوم واحد. الساعة ٧ الصبح اتصل بيا وقال: «خير يا ابني؟ عسى ما يكون حصل حاجة؟» حوّلت له وأنا بضحك بيني وبين نفسي وقلت: «والله أبويا دقيق أوي في موضوع الفلوس». وعدّت ١٢ سنة على نفس الحال. لحد ما جه يوم الشركة استغنت عني. ما قلتش لحد.. حتى مراتي. كل يوم ألبس وأخرج الساعة ٧ الصبح، وأقعد في العربية قدام كافيه لحد الظهر، وبعدين أرجع البيت كأني راجع من الشغل. وجِه يوم ٢٧.. والمرتب ما نزلش. لأول مرة من ١٢ سنة، ما حوّلتش لأبويا حاجة. بعد العشا تليفوني رن أبويا وقال لى «الـ١٠٠ ما وصلوش». قلت له: «نسيت يا بابا.. بكرة إن شاء الله». سكت شوية، وبعدين قال: «تعالى دلوقتي.. لوحدك». دخلت البيت ولقيته قاعد في الصالة، وقدامه دفتر قديم وظرف. زق الدفتر ناحيتي وقال: «افتح». فتحت الدفتر.. كل سطر فيه تاريخ، و١٠٠ جنيه، واسمي. وبجنب كل سطر مكتوب الفلوس راحت فين: «برادة مية» «كفالة يتيم» «شنطة رمضان» «سقيا عمال» ١٤٤ سطر. بص لي وقال: «ولا جنيه واحد من فلوسك دخل جيبي». وبعدين اداني موبايله، وكان عليه صورة برادة مية عند مسجد، وعليها لوحة صغيرة مكتوب عليها: «صدقة عن ابني.. ربنا يحفظه». عرفتها فورًا. دي نفس برادة المية اللي جنب المسجد القريب من شغلي، اللي كنت كل يوم بشرب منها بعد الظهر. سنين وأنا بشرب من صدقة أبويا عليا.. وأنا ما أعرفش. وبعدين زق الظرف ناحيتي وقال: «وده مني أنا». فتحته.. لقيت فيه ٧٢ ألف جنيه. قال لي: «من أول مرتب ليك وأنا بحوش هنا ٥٠٠ جنيه كل شهر». «قلت أكيد هييجي يوم ما توصلنيش منك فيه الـ١٠٠.. واليوم ده هتكون محتاجني». بصيت له وقلت: «إنت عرفت إزاي يا بابا؟» قال: «١٢ سنة ما اتأخرتش غير يوم واحد.. والنهارده ما حولتش حاجة.. مش محتاج حد يقول لي». ما قدرتش أتكلم. قال لي: «الـ١٠٠ جنيه أنا عمري ما كنت محتاجهم.. أنا كنت محتاج أعرف كل شهر إنك بخير». «من غير ما أسألك وتقول لي: أنا تمام.. وإنت في الحقيقة مش تمام». بعد شهرين لقيت شغل. أول يوم ٢٧، حوّلت له الـ١٠٠ جنيه، وكتبت: «حق التربية». رد: «وصل.. ربنا يرزقك». وبعدها بدقيقة، لأول مرة، بعتلي رسالة تانية: «ولا عاد تخبي عليا». القصة مش عن الـ١٠٠ جنيه... القصة عن أب كان بيدور كل شهر على طريقة يطمن بيها على ابنه، من غير ما يجرحه أو يحسسه إنه محتاج يسأله. وأحيانًا حب الأب والام بيكون ساكت جدًا.. لدرجة إننا ما نفهموش غير بعد سنين. رب اغفر لي ولوالدي وللمؤمنين والمؤمنات والمسلمين والمسلمات، الأحياء منهم والأموات. مما راق لي .... - @fatima.shaban7