Një pjesë e komunitetit të fshatit Rrushkull, në Njësinë Administrative Sukth, zhvilluan sot një protestë për infrastrukturën e degraduar të rrugës kryesore që përshkon zonën e tyre. Punimet e kryera muaj më parë për sistemimin e rrjetit të kanalizimeve, pjesë e një investimi të Bashkisë Durrës me vlerë rreth 32.5 milionë lekë të reja, e kanë dëmtuar edhe më shumë këtë aks rrugor. Sipas banorëve, kanalizimet e hapura anash rrugës kanë mbetur të palidhura me rrjetin kryesor, ndërsa përgjatë gjithë gjatësisë së këtij aksi shfaqen gropa të mëdha që e bëjnë thuajse të pamundur lëvizjen e automjeteve dhe këmbësorëve. Sipas banorëve, një ditë më parë në zonë janë shfaqur punëtorët e firmës, të cilët u kanë thënë se do të shtrojnë me asfalt vetëm 3 metra të gjerësisë së rrugës, ndërkohë që ajo është 5 metra e gjerë. Në deklaratat e tyre, banorët theksojnë se kjo zonë është tërësisht jashtë vëmendjes së pushtetit vendor. Për këtë arsye, ata kërkojnë që drejtuesit e Bashkisë të vijnë dhe të mbajnë kontakte me komunitetin e zonës lidhur me ndërhyrjen që do të bëhet, pasi jetesa në këtë gjendje është shumë e vështirë. Në të njëjtën kohë, banorët deklaruan se, nëse vijon shtrimi vetëm i tre metrave gjerësi, ata do të përshkallëzojnë veprimet e tyre deri në bllokimin e autostradës Durrës-Tiranë. Në mbështetje të banorëve ishte edhe kreu i Partisë Demokratike, dega nr. 2 në Durrës, Osman Stafa. Gjatë fjalës së tij, Stafa e cilësoi këtë situatë si shpopullim me qëllim dhe braktisje institucionale të kësaj zone. Ai i bëri thirrje kryetares së Bashkisë Durrës, Emiriana Sako, që të vijë dhe të shohë nga afër problemet e zonës. “Zonjë, shkule b*thën nga karrigia e kryetares së Bashkisë dhe hajde rri një ditë me këta banorë për të kuptuar dhimbjen e tyre”, tha Stafa. - @durresilajm