@bait.rasha: كيكة قدرة قادر 🤎 من أطيب الكيكات ، شكلا بجنن و طعمتا كمان بتجنن والأحلى إنها سهلة كتير و هيدي الطريقة اكيد مضمونة ✨ المقادير: الكراميل: * ¾ كوب سكر * ¼ كوب ماء ساخن طبقة الكريم: * 3 أكواب حليب * 3 ظروف كريم كراميل * علبة قشطة (155 غ) طبقة الكيك: * 2 بيض * 1 ملعقة صغيرة فانيلا * ½ كوب سكر * ½ كوب حليب * ½ كوب زيت نباتي * 1 كوب طحين * 3 ملاعق كبيرة كاكاو غير محلى * 2 ملعقة صغيرة بايكينغ باودر * رشة ملح الطريقة: أول شي الكراميل: بمقلى على النار منحط السكر ومنتركه من دون تحريك لحتى يبلّش يدوب من الأطراف. بعدها منبلّش نحرك شوي شوي لحتى يدوب كل السكر، منضيف الماء الساخن ومنضل نحرك لحتى يتجانسوا. بسرعة منسكب الكراميل بقالب الكيك ومنوزّعه بالقاع. طبقة الكريم: بطنجرة وعلى البارد، منخلط الحليب مع ظروف الكريم كراميل لحتى يدوبوا، منضيف القشطة ومنحط الطنجرة على النار مع التحريك المستمر. أول ما يبلّش الخليط يغلي، منسكبه فوق طبقة الكراميل. طبقة الكيك: بالستاند ميكسر منخفق البيض والفانيلا والسكر لحتى يفتح لون الخليط ويصير فاتح وكريمي. منضيف الحليب والزيت ومنخلط، بعدها مننخل الطحين والكاكاو والبايكينغ باودر ومنضيفن للخليط مع رشة الملح. منخلط بالسباتولا بس لحتى تتجانس المكونات، ومنسكب خليط الكيك فوق طبقة الكريم. الخبز: منحط القالب بصينية أكبر ومنضيف مي سخنة لنعمل حمام مائي. منخبز بفرن محمّى مسبقاً على حرارة 180 درجة، الرف الوسط، لمدة 50 دقيقة لساعة. التبريد والقلب: منتركها تبرد بحرارة الغرفة لمدة 3 ساعات، وبعدها منحطها بالبراد 24 ساعة. وقت بدنا نقلبها، منحط القالب بصينية فيها مي مغلية لمدة دقيقة لحتى يفصل الكراميل عن القالب، ومنقلبها على طبق التقديم. صحتين 💛

Bait Rasha ~ بيت رشا

Open In TikTok:

Region: AE

Thursday 12 November 2026 13:37:24 GMT