@negativuashur: 5 MILLION TONNA PAXTA! UNDA DALADA QOLGANLARI KIMNIKI? O‘zbekistonda paxta hosili 5 million tonnadan oshgani e’lon qilindi. Rasmiylar buni tarixiy rekord sifatida taqdim etmoqda. Ammo «NEGATIV» tahririyatiga kelib tushayotgan video va audiomateriallar bu raqamlar qanday shakllangani haqida jiddiy savollar tug‘dirmoqda. Buxoro viloyati G‘ijduvon tumanidagi videoda hali terilmagan, ko‘saklari oppoq ochilgan katta paxta maydoni aks etgan. Mahalliy aholi aytishicha, 11-noyabr kuni ham bu dalada paxta terilmagan. Xo‘sh, 5 million tonna paxta yig‘ib olingan bo‘lsa, dalada qolgan hosil nima? Bu maydon hisobotga kiritilganmi? Masalaning yanada jiddiy tomoni bor. Tahririyatimizga paxtachilikda qo‘shib yozishlar, soxta hisobotlar va fermerlarga bosim o‘tkazilishi bilan bog‘liq video hamda audiomateriallar kelib tushmoqda. Ular orasida bir tirkamadagi paxtaning uch marta qayta tortilishi aks etgan video, fermerga nisbatan «Paxtani men aytganimdek topshirasan!» degan mazmundagi gaplar va «Yuqoriga reja kerak, sening tonnang emas!» degan audioyozuvlar borligi aytilmoqda. Bu materiallar hali mustaqil tekshiruvdan o‘tkazilishi kerak. Ammo ular ko‘targan savollar javobsiz qolmasligi lozim. Ayrim manbalar esa o‘z nomlarini oshkor qilmaslikni so‘rab, ertaga qo‘shib yozishlar bo‘yicha tekshiruv boshlansa, o‘zlariga bosim bo‘lishidan xavotirda ekanini bildirishmoqda. Ular taqdim etgan dalillar manbalar xavfsizligi sabab hozircha maxfiy saqlanmoqda. Biz Qishloq xo‘jaligi vazirligidan quyidagi savollarga ochiq javob kutamiz: — 5 million tonna raqami aynan terib olinib, tarozidan o‘tkazilgan paxta asosida hisoblanganmi? — Bir xil paxta yuki qayta-qayta hisobga kiritilmaganiga kim kafolat beradi? — Elektron tarozilar va qabul hujjatlari mustaqil tekshirilganmi? — G‘ijduvondagi terilmagan paxta qaysi hisobotda aks etgan? — Fermerlarga rejani bajartirish uchun bosim o‘tkazilmaganmi? Biz paxtachilikda rekord o‘rnatilishiga qarshi emasmiz. Ammo har qanday rekord haqiqiy bo‘lishi shart. Haqiqiy rekordni dala, tarozi va ombor tasdiqlaydi. Qog‘ozdagi raqamlar emas! Qishloq xo‘jaligi vazirligi, Buxoro viloyati va G‘ijduvon tumani mutasaddilari, 5 million tonna paxta yig‘ib olingan bo‘lsa, unda dalada qolgan paxta nima bo‘lyapti? Yoki uni ham hisobotga qo‘shib yozishdimi?! #NEGATIV #Paxta #QishloqXojaligi #Fermer #UlugbekAshur

Ulug'bek Ashur (NEGATIV)

Open In TikTok:

Region: FR

Friday 13 November 2026 07:00:00 GMT