កម្មវិធី « 2026 Korea Consumer Brand Grand Prize Award» នៅថ្ងៃទី១០ ខែវិច្ឆិកា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញចូលរួមកម្មវិធី « 2026 Korea Consumer Brand Grand Prize Award» ដែលរៀបចំឡើងដោយ Korea Consumer Global Council នៅមជ្ឈមណ្ឌលសារព័ត៌មានកូរ៉េ (Korea Press Center) ក្នុងទីក្រុងសេអ៊ូល សាធារណរដ្ឋកូរ៉េ។ កម្មវិធីនេះធ្វើឡើងដើម្បីប្រគល់ពានរង្វាន់ដល់ម៉ាកយីហោ (Brand) ក្រុមហ៊ុន អាជីវកម្ម និងបុគ្គលដែលទទួលបានទំនុកចិត្ត និងការវាយតម្លៃល្អពីអ្នកប្រើប្រាស់ ហើយក៏មានរៀបចំពានរង្វាន់សម្រាប់ប្រធានស្ថានតំណាងបរទេសក្នុងប្រទេសកូរ៉េ ដែលបានជួយជំរុញការផ្លាស់ប្តូរទំនាក់ទំនងមិត្តភាពរវាងប្រទេសកូរ៉េ និងប្រទេសកំណើតរបស់ខ្លួន ។ ក្នុងឱកាសនោះផងដែរ ឯកឧត្តមឯកអគ្គរាជទូត ត្រូវបានគណៈកម្មាការរៀបចំកម្មវិធីជ្រើសរើសឱ្យទទួល «ពានរង្វាន់ឯកអគ្គរាជទូតឆ្នើមប្រចាំឆ្នាំ២០២៦ - 2026 Best Ambassador Award» ដោយឯកឧត្តមបានចូលរួមចំណែកក្នុងការលើកកម្ពស់ និងពង្រឹងទំនាក់ទំនងទ្វេភាគីរវាងព្រះរាជាណាចក្រកម្ពុជា និងសាធារណរដ្ឋកូរ៉េ លើវិស័យការទូត ពាណិជ្ជកម្ម ទេសចរណ៍ និងវប្បធម៌។ ក្នុងសុន្ទរកថាសម្តែងចំណាប់អារម្មណ៍សម្រាប់ការទទួលពានរង្វាន់ ឯកឧត្តមឯកអគ្គរាជទូត បានថ្លែងអំណរគុណចំពោះគណៈកម្មាការរៀបចំកម្មវិធី ដែលបានប្រគល់ពានរង្វាន់ដ៏មានតម្លៃនេះសម្រាប់ឯកឧត្តម ដែលវាជាកម្លាំងចិត្ត និងជួយជំរុញទឹកចិត្តឱ្យឯកឧត្តមបន្តខិតខំប្រឹងប្រែងធ្វើការបំរើជាតិមាតុភូមិ និងបងប្អូនសហគមន៍ខ្មែរនៅកូរ៉េទាំងអស់ ក៏ដូចជាបន្តចូលរួមលើកកម្ពស់បន្ថែមទៀតនូវចំណងមិត្តភាពដ៏យូរអង្វែងរវាងកម្ពុជា និងកូរ៉េ។ #korea #Cambodia #ពលករកូរ៉េ🇰🇷❤️🇰🇭 #ពលករខ្មែរនៅកូរ៉ #ខ្មែរស្រលាញ់ខ្មែរ - @khuonphonrattanak