धादिङ जिल्लाको गल्छी गाउँपालिका वडा नम्बर ८ मा अवस्थित प्राकृतिक सुन्दरताले भरिपूर्ण एउटा निकै रमणीय ठाउँ हो – रानीमाला। चारैतिर हरियालीले ढाकिएका डाँडाकाँडा, शान्त वातावरण र यहाँबाट देखिने मनमोहक हिमालका दृश्यहरूले यस ठाउँको सुन्दरतालाई अझ विशेष बनाएको छ। यहाँ आइपुग्दा प्रकृतिको वास्तविक सुन्दरता नजिकबाट नियाल्न सकिन्छ। त्यति मात्र होइन, यहाँ अवस्थित मन्दिरले यस ठाउँको धार्मिक महत्त्वलाई समेत झल्काउने गर्दछ। रानीमालाबाट देखिने हिमालको दृश्य साँच्चै मनमोहक छ। प्रकृतिप्रेमी, घुमफिर गर्न रुचाउने तथा नयाँ ठाउँको खोजीमा रहनेहरूका लागि यो ठाउँ एउटा उत्कृष्ट गन्तव्य बन्न सक्छ। अब कुरा गरौँ, रानीमाला कसरी पुग्ने भन्नेबारे। यदि तपाईंहरू धादिङको महादेवबेँसी हुँदै आउँदै हुनुहुन्छ भने मन्खु गाउँ हुँदै फेदी निस्किएर रानीमाला पुग्न सक्नुहुन्छ। त्यसैगरी, सीतापाइला हुँदै ठूलाखोला, जीवनपुर, चकमके र गोगनपानी आधारभूत विद्यालयबाट केही माथि पुगेपछि पनि रानीमाला भ्युटपइन्टसम्म पुग्न सकिन्छ। यद्यपि यहाँ पुग्ने बाटो केही अप्ठ्यारो भएकाले यात्रा गर्नुअघि बाटोको अवस्थाबारे जानकारी लिन र सावधानी अपनाउन नबिर्सनुहोला। हामीले घुम्नका लागि सधैँ टाढाका चर्चित पर्यटकीय स्थलहरू नै रोज्नुपर्छ भन्ने छैन। आफ्नै जिल्लाभित्र पनि यस्ता थुप्रै सुन्दर र सम्भावना बोकेका ठाउँहरू लुकेर रहेका छन्। त्यस्तै एउटा सुन्दर गन्तव्य हो – धादिङको रानीमाला। त्यसैले समय मिलाएर एकपटक रानीमाला घुम्न अवश्य आउनुहोला। आफ्नो ठाउँ चिनौँ, आफ्नो ठाउँको सुन्दरता संसारसामु पुर्‍याऔँ। #Dhading #viewofdhading01 #dhading #galchi #Goganpani - @view_of_dhading01