@serhed.az: Jurnalist Sahil İmanov AEM-i tənqid etdi: “Saxta həkimlərlə mübarizə formal xarakter daşımamalıdır!” BTV xəbər verir ki, jurnalist, BTV Xəbərin rəhbəri Sahil İmanov özəl tibb müəssisələrində müvafiq tibbi təhsili və sertifikatı olmayan şəxslərin fəaliyyət göstərməsi ilə bağlı Səhiyyə Nazirliyinin Analitik Ekspertiza Mərkəzini (AEM) tənqid edib. Sahil İmanov bildirib ki, redaksiyaya mütəmadi olaraq özəl klinikalarda qanunsuz tibbi fəaliyyətlə bağlı vətəndaş şikayətləri daxil olur. BTV olaraq bu cür hallarla mübarizənin qanun çərçivəsində aparıldığını, qanuni fəaliyyət göstərən tibb işçilərinə qarşı heç bir etirazın olmadığını vurğulayıb. Onun sözlərinə görə, redaksiyaya daxil olan müraciətlər əsasında araşdırmalar aparılır, müvafiq görüntülər və faktlar ünvan məlumatları ilə birlikdə Analitik Ekspertiza Mərkəzinə təqdim edilir. Lakin müraciətlərdən bir neçə gün sonra həmin şəxslərin sosial şəbəkələrdə fəaliyyətlərini davam etdirdikləri və pasiyent topladıqları müşahidə olunur. Sahil İmanov AEM-ə çağırış edərək, daxil olan müraciətlərin aidiyyəti dövlət qurumları ilə birgə araşdırılmasının vacibliyini qeyd edib. O, yoxlama müddətində zərurət yaranarsa, şübhə doğuran şəxslərin və onların fəaliyyət göstərdiyi tibb müəssisələrinin fəaliyyətinin qanunvericiliyə uyğun şəkildə məhdudlaşdırılmasını təklif edib. Jurnalist çıxışında Türkiyə təcrübəsinə də toxunaraq, ciddi iddialar qarşısında müvafiq araşdırmaların aparılmasının vacibliyini vurğulayıb. Sahil İmanov hesab edir ki, vətəndaşların sağlamlığına birbaşa təsir edən məsələlər formal cavablarla yekunlaşmamalıdır. Hər bir müraciət operativ, obyektiv və nəticəyönümlü şəkildə araşdırılmalıdır.

Sərhəd.Az

Open In TikTok:

Region: AZ

Friday 13 November 2026 13:59:38 GMT